ബെംഗളുരു: ഇന്ത്യയുടെ മൂന്നാം ചാന്ദ്ര പര്യവേക്ഷണത്തിന് കേന്ദ്ര സര്ക്കാരിന്റെ അംഗീകാരം. ഐഎസ്ആര്ഒ മേധാവി കെ. ശിവനാണ് ചന്ദ്രയാന്- 3ന് അനുമതി ലഭിച്ചതായി അറിയിച്ചത്. അനുമതി ലഭിച്ചതിനെ തുടര്ന്ന് പദ്ധതിയുടെ പ്രാരംഭ നടപടികള്ക്ക് ഐഎസ്ആര്ഒ തുടക്കമിട്ട് കഴിഞ്ഞു.
2020-ല് തന്നെ ചന്ദ്രയാന്- 3 നിര്മിക്കുമെന്ന് കേന്ദ്രമന്ത്രി ജിതേന്ദ്ര സിങ് നേരത്തെ പ്രഖ്യാപിച്ചിരുന്നതാണ്. അതേസമയം ചന്ദ്രയാന് – 2-ന് പ്രതീക്ഷിച്ച ലക്ഷ്യത്തില് എത്താനായില്ലെങ്കിലും പദ്ധതി പൂര്ണപരാജയമാണെന്ന് പറയാനാകില്ലെന്ന് കെ ശിവന് ആവര്ത്തിച്ചു.
ലാന്ഡറിന് കൃത്യമായി ലാന്ഡ് ചെയ്യാനായില്ല എന്നത് മാത്രമാണ് പദ്ധതിയില് പോരായ്മ പറ്റിയത്. പദ്ധതിയിലെ ഓര്ബിറ്റര് ഇപ്പോഴും പ്രവര്ത്തനക്ഷമമാണ്. അടുത്ത ഏഴ് വര്ഷം ചന്ദ്രോപരിതലത്തിന് ചുറ്റും കറങ്ങി ചിത്രങ്ങളെടുക്കാന് ചന്ദ്രയാന്- 2ന്റെ ഓര്ബിറ്ററിന് കഴിയുമെന്നും കെ. ശിവന് ആവര്ത്തിച്ചു.
14 മുതല് 16 മാസങ്ങളുടെ കാലാവധിയില് ചന്ദ്രയാന് – 3 പൂര്ത്തിയാക്കി വിക്ഷേപിക്കാന് സാധിക്കുമെന്നാണ് പ്രതീക്ഷിക്കുന്നത്. അതിനിടെ മനുഷ്യനെ ബഹിരാകാശത്തേക്ക് അയക്കാനുള്ള ഇന്ത്യയുടെ സ്വപ്ന പദ്ധതി ഗഗന്യാനുവേണ്ടിയുള്ള പരിശീലനം ഈ വര്ഷം തുടങ്ങുമെന്ന് കെ. ശിവന് വ്യക്തമാക്കി. ഗഗന്യാന് വേണ്ടി വ്യോമസേനയില് നിന്ന് തെരഞ്ഞെടുക്കപ്പെട്ട നാല് പേരെ പരിശീലനത്തിനായി റഷ്യയിലേക്ക് വിടും. ചന്ദ്രയാന് – 2ന്റെ ഓര്ബിറ്റര് ഇപ്പോഴും ചന്ദ്രോപരിതലത്തില് ഭ്രമണം തുടരുന്നതിനാല് അതിന് പാകത്തിലുള്ള, ലാന്ഡറും റോവറും തന്നെയാകും ചന്ദ്രയാന് – 3 ദൗത്യത്തിലുമുണ്ടാവുക എന്നും കെ. ശിവന് കൂട്ടിച്ചേര്ത്തു.
