തിരുവനന്തപുരം: ഇന്ത്യന് പാര്ലമെന്റ് പാസ്സാക്കി രാഷ്ട്രപതി ഒപ്പുവച്ച് നിയമമാക്കിയ ദേശീയ പൗരത്വ ഭേദഗതി നിയമത്തിനെതിരെ പ്രമേയം പാസ്സാക്കിയ കേരള നിയമസഭയുടെ നടപടി രാജ്യത്തെ ഫെഡറല് സംവിധാനത്തെ തകര്ക്കുന്നതാണെന്ന് ഫെറ്റോ സംസ്ഥാന പ്രസിഡന്റ് എം. ശിവദാസും ജനറല് സെക്രട്ടറി എസ്.കെ. ജയകുമാറും അറിയിച്ചു.
നിയമസഭ പാസ്സാക്കിയ പ്രമേയം ഭരണഘടനാ വിരുദ്ധമായതിനാല് രാജ്യതാത്പര്യത്തെ മുന്നിര്ത്തി പ്രമേയം പിന്വലിക്കണമെന്നും ഫെഡറേഷന് ഓഫ് എംപ്ലോയീസ് ആന്ഡ് ടീച്ചേഴ്സ് ഓര്ഗനൈസേഷന്സ് ആവശ്യപ്പെട്ടു. കേന്ദ്ര നിയമത്തെ അനുകൂലിച്ചതിന്റെ പേരില് ഭരണഘടനാ പദവി വഹിക്കുന്ന ഗവര്ണറെ ആസൂത്രിതമായി അപമാനിക്കുകയെന്ന ഗൂഢലക്ഷ്യത്തോടെയാണ് ഭരണ, പ്രതിപക്ഷ സംഘടനകള് പ്രതിഷേധങ്ങള് നടത്തുന്നത്.
ഗവര്ണര്ക്കെതിരെ അപമര്യാദയായി പെരുമാറിയ ഇര്ഫാന് ഹബീബിനെതിരെ പോലീസ് ശക്തമായ നിയമനടപടി സ്വീകരിക്കണം. ഗവര്ണര്ക്ക് മതിയായ സുരക്ഷ ഒരുക്കുന്നതില് സംസ്ഥാന സര്ക്കാര് പരാജയപ്പെട്ട സ്ഥിതിക്ക് കേന്ദ്രസേനയുടെ സുരക്ഷ നല്കണമെന്നും ഫെറ്റോ നേതാക്കള് ആവശ്യപ്പെട്ടു.
പണിമുടക്ക് രാഷ്ട്രീയ പ്രേരിതം; ഫെറ്റോ സംഘടനകള് പങ്കെടുക്കില്ല
പ്രതിപക്ഷ ട്രേഡ് യൂണിയനുകള് എട്ടിന് നടത്താന് നിശ്ചയിച്ചിരിക്കുന്ന പണിമുടക്കില് ഫെറ്റോ സംഘടനകള് പങ്കെടുക്കല്ലെന്ന് സംസ്ഥാന പ്രസിഡന്റ് എം. ശിവദാസും സംസ്ഥാന ജനറല് സെക്രട്ടറി എസ്.കെ. ജയകുമാറും അറിയിച്ചു. വിവിധ ആവശ്യങ്ങള് ഉന്നയിച്ച് തൊഴിലാളി സംഘടനകള് ആഹ്വാനം ചെയ്തിരിക്കുന്ന പണിമുടക്ക് തികച്ചും രാഷ്ട്രീയ പ്രേരിതമാണ്. രാജ്യത്തെ തൊഴില്മേഖലയുമായി ബന്ധപ്പെട്ട് ഉണ്ടായിട്ടുള്ള പ്രശ്നങ്ങള് പരിഹരിക്കാന് ആത്മാര്ത്ഥമായ ശ്രമമാണ് മോദി സര്ക്കാര് നടത്തിയത്.
തൊഴില് മേഖലയിലെ ഒട്ടനവധി പ്രശ്നങ്ങള്ക്ക് ക്രിയാത്മകമായ പരിഹാരമുണ്ടാക്കാന് കേന്ദ്ര സര്ക്കാരിന് കഴിഞ്ഞിട്ടും പണിമുടക്ക് ആഹ്വാനവുമായി മുന്നോട്ടുപോകുന്നത് പ്രതിപക്ഷ രാഷ്ട്രീയ പാര്ട്ടികളുടെ താത്പര്യാര്ഥമാണ്. ഈ സാഹചര്യത്തില് പണിമുടക്കില് ബിഎംഎസ് ആഭിമുഖ്യമുള്ള സര്വീസ് സംഘടനകള് പങ്കെടുക്കില്ലെന്നും ഫെറ്റോ ഭാരവാഹികള് അറിയിച്ചു.
കേരള എന്ജിഒ സംഘ്, നാഷണല് ടീച്ചേഴ്സ് യൂണിയന്, സെക്രട്ടറിയേറ്റ് എംപ്ലോയീസ് സംഘ്, കേരള ഗസറ്റഡ് ഓഫീസേഴ്സ് സംഘ്, കേരള പിഎസ്സി എംപ്ലോയീസ് സംഘ്, ഫെഡറേഷന് ഓഫ് യൂണിവേഴ്സിറ്റി എംപ്ലോയീസ് സംഘ്, കേരള പ്രൈവറ്റ് കോളേജ് എംപ്ലോയീസ് സംഘ്, കേരള മുനിസിപ്പല് കോര്പ്പറേഷന് സ്റ്റാഫ് സംഘ്, ഗവ. പ്രസ്സ് വര്ക്കേഴ്സ് സംഘ്, ഫോറസ്റ്റ് പ്രൊട്ടക്ടീവ് സ്റ്റാഫ് സംഘ് തുടങ്ങിയ സംഘടനകള് പണിമുടക്കില് പങ്കെടുക്കില്ല.
പണിമുടക്കില് പങ്കെടുക്കാത്ത ജീവനക്കാര്ക്ക് സംരക്ഷണം ഉറപ്പാക്കാനും ഓഫീസുകള് തുറന്ന് പ്രവര്ത്തിക്കാനും സംസ്ഥാന സര്ക്കാര് നടപടി സ്വീകരിക്കണമെന്നും ഫെറ്റോ ഭാരവാഹികള് ആവശ്യപ്പെട്ടു.
