ന്യൂദല്ഹി: ഈ വര്ഷം ഏകദിന ക്രിക്കറ്റില് ഏറ്റവും കൂടുതല് റണ്സ് നേടിയ താരമെന്ന ബഹുമതി ഇന്ത്യന് സ്റ്റാര് ഓപ്പണര് രോഹിത് ശര്മയ്ക്ക്. ഇന്ത്യന് ക്യാപ്റ്റന് വിരാട് കോഹ്ലിയെ മറികടന്നാണ് ശര്മ ഒന്നാം സ്ഥാനത്തേക്ക് ഉയര്ന്നത്. കഴിഞ്ഞ രണ്ട് വര്ഷങ്ങളിലും ശര്മ കോഹ്ലിക്ക് പിന്നില് രണ്ടാം സ്ഥാനത്തായിരുന്നു.
ഈ വര്ഷം 28 ഏകദിനങ്ങള് കളിച്ച ശര്മ 27 ഇന്നിങ്സുകളിലായി 1490 റണ്സ് കുറിച്ചാണ് ഒന്നാം സ്ഥാനത്തേക്ക് ഉയര്ന്നത്. 57.30 മാണ് ശരാശരി. ഏഴു സെഞ്ചുറികള് നേടി. ഈ വര്ഷം ഏകദിനത്തില് ഏറ്റവും കൂടുതല് സെഞ്ചുറി കുറിച്ച ബാറ്റ്സ്മാനുമായി. ഓസ്ട്രേലിയ (133 സിഡ്നി) , ദക്ഷിണാഫ്രിക്ക (122 സതാംപ്ടണ്), പാക്കിസ്ഥാന് (140 മാഞ്ചസ്റ്റര്), ഇംഗ്ലണ്ട് (102, ബെര്മിങ്ഹാം), ബംഗ്ലാദേശ് (104 ബെര്മിങ്ഹാം), ശ്രീലങ്ക (103, ലീഡ്സ്), വിന്ഡീസ് (159, വിശാഖപട്ടണം) എന്നീ ടീമുകള്ക്കെതിരെയാണ് ശര്മ സെഞ്ചുറിയിടിച്ചത്. ഈ കലണ്ടര് വര്ഷത്തില് ആറ് അര്ധ സെഞ്ചുറികളും നേടി. 146 ഫോറുകളും 36 സിക്സുകളും ആ ബാറ്റില് നിന്ന് ബൗണ്ടറി കടന്നുപോയി.
2017, 2018 വര്ഷങ്ങളില് ഏകദിനത്തില് ഏറ്റവും കൂടുതല് റണ്സ് കുറിച്ച താരമായ കോഹ്ലിയാണ് ഈ വര്ഷം രണ്ടാം സ്ഥാനത്ത്. 2019- ല് 26 ഏകദിനങ്ങള് കളിച്ച കോഹ്ലി 25 ഇന്നിങ്സുകളിലായി 1377 റണ്സ് നേടി. 59.86 ശതമാനമാണ് ശരാശരി. അഞ്ച് സെഞ്ചുറികളും ഏഴ് അര്ധ സെഞ്ചുറികളും സ്വന്തം പേരില്കുറിച്ചു. 133 ഫോറും എട്ട് സിക്സും അടിച്ചു. ഓസ്ട്രേലിയക്കെതിരെ മൂന്ന് സെഞ്ചുറികളും (104, അഡ്ലെയ്ഡ്, 116 നാഗ്പൂര്, 123, റാഞ്ചി) വിന്ഡീസിനെതിരെ രണ്ട് സെഞ്ചുറികളും (120 ,പോര്ട്ട് ഓഫ് സ്പെയിന്, 114 പോര്ട്ട് ഓഫ് സ്പെയിന്).
വിന്ഡീസ് ബാറ്റ്സ്മാന് ഷായ് ഹോപ്പിനാണ് മൂന്നാം സ്ഥാനം. ഈ വര്ഷം നാല് സെഞ്ചുറികളും എട്ട് അര്ധ സെഞ്ചുറികളും അടക്കം 1345 റണ്സ് നേടി. ഇരുപത്തിയെ്ട്ട് മത്സരങ്ങള് കളിച്ച ഹോപ്പ് 26 ഇന്നിങ്സിലാണ് ഇത്രയും റണ്സ് നേടിയത്. 61.13 ആണ് ശരാശരി. അയര്ലന്ഡ് (170 ഡബ്ലിന്), ബംഗ്ലാദേശ് (109 ഡബ്ലിന് ), അഫ്ഗാനിസ്ഥാന് (109 ലക്നൗ) , ഇന്ത്യ ( 102 ചെന്നൈ) എന്നീ ടീമുകള്ക്കെതിരെയാണ് സെഞ്ചുറി നേടിയത്.
ഓസ്ട്രേലിയയുടെ ഏകദിന ക്യാപ്റ്റന് ആരോണ് ഫിഞ്ചാണ് നാലാം സ്ഥാനത്ത്. ഈ വര്ഷം 23 ഏകദിനങ്ങളില് നിന്ന് 1141 റണ്സ് നേടി. 51.86 ആണ് ശരാശരി. ഈ വര്ഷത്തില് നാലു സെഞ്ചുറികളും ആറ് അര്ധസെഞ്ചുറികളും കുറിച്ചു. പാക്കിസ്ഥാനെതിരെ രണ്ടും ശ്രീലങ്ക, ഇംഗ്ലണ്ട് ടീമുകള്ക്കെതിരെ ഓരോ സെഞ്ചുറികളും കുറിച്ചു.
പാക്കിസ്ഥാന്റെ ബാബര് അസമാണ് അഞ്ചാം സ്ഥാനത്ത്. ഇരുപത് ഏകദിനങ്ങളില 1092 റണ്സ്. 60.66 ശതമാനമാണ് ശരാശരി. മൂന്ന് സെഞ്ചുറികളും ആറ് അര്ധ സെഞ്ചുറികളും കുറിച്ചു. ഇംഗ്ലണ്ട്, ന്യൂസിലന്ഡ്, ശ്രീലങ്ക ടീമുകള്ക്കെതിരെയാണ് സെഞ്ചുറിയടിച്ചത്.
