പത്തനംതിട്ട: മകരവിളക്ക് മഹോത്സവത്തിന് തുടക്കം കുറിച്ച് ശബരിമല ക്ഷേത്രനട ഇന്ന് തുറക്കും. വൈകിട്ട് അഞ്ചിന് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി എ.കെ. സുധീര് നമ്പൂതിരി നട തുറക്കും. തുടര്ന്ന് ആഴി തെളിയിക്കും. അതിനുശേഷം തീര്ത്ഥാടകര്ക്ക് ദര്ശനം അനുവദിക്കും. ഇന്ന് പൂജകളുണ്ടാകില്ല.
നാളെ മുതല് പൂജകളും നെയ്യഭിഷേകവും തുടങ്ങും. ജനുവരി 15ന് ആണ് മകരവിളക്ക് മഹോത്സവം. പുലര്ച്ചെ 2.30ന് മകരസംക്രമ പൂജ. ജനുവരി 19 വരെ നെയ്യഭിഷേകമുണ്ടാകും. 20 വരെ ഭക്തര്ക്ക് ദര്ശനം നടത്താം. ഒരു തീര്ത്ഥാടനക്കാലത്തിനു കൂടി സമാപനം കുറിച്ച് 21ന് രാവിലെ ഏഴിന് നട അടയ്ക്കും.
മകരവിളക്ക് മഹോത്സവത്തിന് ഒരുക്കങ്ങള് വിവിധ വകുപ്പുകളുടെ നേതൃത്വത്തില് പൂര്ത്തിയായി. ശബരിമലയില് സുരക്ഷയും ദുരന്തനിവാരണവും ഉറപ്പാക്കാന് ജില്ലാ കളക്ടര് ചെയര്മാനായ ജില്ലാ ദുരന്ത നിവാരണ അതോറിറ്റിയുടെ മേല്നോട്ടത്തില് പോലീസ്, ഫയര് ആന്ഡ് റെസ്ക്യൂ, എന്ഡിആര്എഫ്, ആര്എഎഫ് തുടങ്ങി സേനാവിഭാഗങ്ങളും വനം, ആരോഗ്യ വകുപ്പുകളും അയ്യപ്പ സേവാ സംഘം, വിശുദ്ധിസേന എന്നിവയും സജ്ജമാണ്.
