ഇരിങ്ങാലക്കുട: പഴയതെല്ലാം അന്ധവിശ്വാസവും ഇന്നുള്ളതെല്ലാം ശാസ്ത്രീയവുമെന്ന് പ്രചരിപ്പിക്കാനുള്ള ബോധപൂര്വമായ ശ്രമങ്ങളാണ് നടക്കുന്നതെന്ന് കേന്ദ്രമന്ത്രി വി. മുരളീധരന്. മാധവ ഗണിത കേന്ദ്രത്തിന്റെ നേതൃത്വത്തില് നടന്ന സംഗമഗ്രാമമാധവന് അനുസ്മരണവും മാധവ ഗണിത പുരസ്കാര സമര്പ്പണവും നിര്വഹിച്ച് സംസാരിക്കുകയായിരുന്നു അദ്ദേഹം.
സൂര്യഗ്രഹണ ദിനത്തില് വീട്ടില് നിന്ന് പുറത്തിറങ്ങരുതെന്ന ചിന്തകളെ അന്ധവിശ്വാസമായാണ് പലരും വ്യാഖ്യാനിക്കുന്നത്. എന്നാല് അന്നത്തെ പരിമിതികളില് പൂര്വികര് കണ്ടെത്തിയ മാര്ഗം മാത്രമായിരുന്നു പ്രസ്തുത നിര്ദേശങ്ങളെന്ന് മന്ത്രി പറഞ്ഞു. വൈദേശികഭരണത്തോടെ രാജ്യത്തിന്റെ വിവിധ ശാസ്ത്ര ശാഖകള്ക്ക് മങ്ങലേല്ക്കുകയായിരുന്നുവെന്നും അദ്ദേഹം പറഞ്ഞു.
ആളൂര് ശ്രീനാരായണ ഹാളില് നടന്ന സമ്മേളനത്തില് സ്വാഗതസംഘം ചെയര്മാന് ഡോ.കെ.എസ്. രാധാകൃഷ്ണന് അധ്യക്ഷനായി. ഈ വര്ഷത്തെ മാധവ ഗണിത പുരസ്കാരം കെ. ചന്ദ്രഹരിക്ക് മന്ത്രി സമ്മാനിച്ചു.
സ്വാഗത സംഘം ജനറല് സെക്രട്ടറി സതീശന് അവിട്ടത്തൂര്, ഗണിത കേന്ദ്രം സെക്രട്ടറി എ. വിനോദ്, ഡോ.എന്.സി. ഇന്ദുചൂഡന്, ഡോ. ആലപ്പാട് രാമചന്ദ്രന്, സുഭാഷ് കല്ലേറ്റുങ്കര എന്നിവര് സംസാരിച്ചു.
