ഭോപ്പാല്: വിപ്ലവകാരികളെ ഭീകരരാക്കി മധ്യപ്രദേശിലെ കോണ്ഗ്രസ് സര്ക്കാരിന്റെ അധിക്ഷേപം. ഗ്വാളിയോറിലെ ജിവാജി സര്വകലാശാലയുടെ ചോദ്യപേപ്പറിലാണ് വിപ്ലവകാരികളെ ഭീകരരായി പരാമര്ശിച്ചത്.
സര്വകലാശാലയുടെ കീഴിലുള്ള ഗുണ പിജി കോളേജിലെ വിദ്യാര്ഥികള്ക്കാണ് വിവാദ ചോദ്യപേപ്പര് ലഭിച്ചത്. വിപ്ലവകാരികളായ ഭീകരരുടെ പ്രവര്ത്തനങ്ങള് വിശദീകരിക്കുക? ഇവരും ഭീകരരും തമ്മിലുള്ള വ്യത്യാസങ്ങള് എന്തൊക്കെ? എന്നായിരുന്നു ചോദ്യം. ചോദ്യങ്ങളില് പ്രതിഷേധിച്ച് വിദ്യാര്ഥികള് രംഗത്തെത്തിയതോടെ സര്ക്കാര് പ്രതിസന്ധിയിലായി.
അന്വേഷണം പ്രഖ്യാപിച്ച് തലയൂരാനാണ് സര്ക്കാരിന്റെ ശ്രമം. സംഭവത്തില് അന്വേഷണത്തിന് ഉത്തരവിട്ടതായി മധ്യപ്രദേശ് ഉന്നത വിദ്യാഭ്യാസ മന്ത്രി ജിതു പത്വാരി അറിയിച്ചു.
രാജ്യത്തിനായി ജീവന് ബലിയര്പ്പിച്ച ധീരരാണ് വിപ്ലവകാരികള്. പകരം ഭീകരരെന്നാണ് അവരെ വിളിച്ചിരിക്കുന്നത്. ഇതില് അപലപിക്കുന്നുവെന്നും ചോദ്യപേപ്പര് പിന്വലിക്കണമെന്നും വിദ്യാര്ഥികള് ആവശ്യപ്പെട്ടു.
വിപ്ലവകാരികളെ ഭീകരരെന്ന് മുദ്ര കുത്തിയത് ലജ്ജാകരവും വേദനാജനകവുമെന്ന് മുന് മുഖ്യമന്ത്രിയും ബിജെപി നേതാവുമായ ശിവരാജ് സിങ് ചൗഹാന് ട്വീറ്റ് ചെയ്തു.
ചോദ്യപേപ്പര് തയാറാക്കിയവരില് നിന്ന് വിശദീകരണം ആവശ്യപ്പെടുമെന്നും അന്വേഷണത്തിനായി കമ്മിറ്റി രൂപീകരിച്ചുവെന്നും സര്വകലാശാല രജിസ്ട്രാര് ഐ.കെ. മന്സൂരി പറഞ്ഞു.
