ന്യൂദല്ഹി: രാജ്യത്ത് തടങ്കല് പാളയങ്ങളില്ലെന്ന് പ്രധാനമന്ത്രി നരേന്ദ്ര മോദി പറഞ്ഞതിന് പിന്നാലെ സമൂഹമാധ്യമങ്ങളിലൂടെ ഇന്ത്യയില് തടങ്കല് പാളയങ്ങളുണ്ടെന്ന രീതിയില് ചിലര് ചിത്രങ്ങള് പ്രചരിപ്പിച്ചിരുന്നു. തടങ്കല് പാളയത്തില് കിടക്കുന്ന അമ്മ കുട്ടിക്ക് മുലയൂട്ടുന്ന ചിത്രമാണ് വൈറലായത്. ഛോട്ടു ഖാനെന്ന ഫെയ്സ്ബുക്ക് ഉപയോക്താവാണ് ചിത്രങ്ങള് പോസ്റ്റ് ചെയ്തതും ബംഗ്ലാദേശില് നിന്നുള്ള ദമ്പതികളാണിവരെന്നും പ്രചരിപ്പിച്ചത്. ഇത് വ്യാജമാണെന്നാണ് ഇപ്പോള് തെളിയുന്നത്.
ഭാര്യ മുസ്ലീമായത് കൊണ്ട് എന്ആര്സി വിഷയത്തില് തടങ്കല് പാളയത്തില് കിടക്കേണ്ടി വന്നു. മറിച്ച്, ഭര്ത്താവാകട്ടെ ഹിന്ദുവും. അതുകൊണ്ട് തന്നെ പൗരത്വ നിയമ പ്രകാരം അദ്ദേഹത്തെ ശിക്ഷിക്കാതെ വെറുതെ വിട്ടു. എന്നിട്ടും തങ്ങള്ക്ക് ജനിച്ച കുട്ടിക്ക് യഥാസമയം പാല് നല്കാന് ബദ്ധപ്പെടുകയാണ് മാതാപിതാക്കള്. എന്നിങ്ങനെ പോകുന്നു ചിത്രത്തോടൊപ്പമുള്ള ഛോട്ടുവിന്റെ പോസ്റ്റ്. കൂടാതെ വരും ദിവസങ്ങളില് മോദിയുടെ അച്ഛാദിനിന്റെ കൂടുതല് ഉദാഹരണങ്ങള് കാണാമെന്നും പോസ്റ്റില് ഛോട്ടു ഖാന് പറയുന്നുണ്ട്.
എന്നാല് ഈ ചിത്രം ഇന്ത്യയില് നിന്നുള്ളതല്ലെന്നും അര്ജന്റീനയില് നിന്നുള്ള ഏതോ തടങ്കല് പാളയത്തിലെ ചിത്രമാണിതെന്നുമാണ് ദേശീയ മാധ്യമങ്ങള് ഇപ്പോള് പുറത്തു വിടുന്ന വാര്ത്ത. ആറ് വര്ഷങ്ങള്ക്ക് മുമ്പ് മുതല് പ്രചരിച്ച ചിത്രമാണിത്. ‘controappuntoblog.org’ എന്ന പേരിലുള്ള ബ്ലോഗിലെ ലോഖനത്തിലൂടെയാണ് ചിത്രം ആദ്യം പ്രത്യക്ഷപ്പെട്ടത്. അതും 2013 ജനുവരി 13ന്. ലേഖനത്തോടൊപ്പം ചേര്ത്തിരിക്കുന്ന വീഡിയോയില് ചില ആളുകള് പോര്ച്ചുഗീസ് സംസാരിക്കുന്നതും അതേ ഭാഷയില് മുദ്രാവാക്ക്യങ്ങള് വിളിക്കുന്നതും കാണാം. ഗൂഗിളില് ഈ വാക്കുകള് ഭരിഭാഷപ്പെടുത്തിയപ്പോള് ‘ ഇതാണ് തങ്ങളുടെ യാഥാര്ഥ്യം’ എന്നാണ് അവര് പറയുന്നത്.
ഛോട്ടു ഖാന് പ്രചരിപ്പിച്ച ചിത്രം 2013 മാര് 11ന് ‘IndymediaArgentina’ എന്ന വെബ് സൈറ്റിലും പ്രത്യക്ഷപ്പെട്ടിരുന്നു. പിന്റെസ്റ്റിലും, റെഡിറ്റിലുമെല്ലാം ചിത്രങ്ങള് നേരത്തെ തന്നെ വന്നിട്ടുള്ളതാണെന്നും തെളിഞ്ഞു.
ഹിന്ദുക്കളേയും മുസ്ലീമുകളേയും ഭിന്നിപ്പിക്കുക എന്ന ഉദ്ദേശത്തോടെയാണ് ഛോട്ടു ഖാനെ പോലുള്ളവര് ഇത്തരത്തിലുള്ള വ്യാജ ചിത്രങ്ങള് പ്രചരിപ്പിക്കുന്നത്. ഇതിന്റെ നിജ സ്ഥിതി പോലും പരിശോധിക്കാതെ മറ്റുള്ളര് ഇത്തരം വ്യാജ പ്രചരണങ്ങള് ഏറ്റെടുക്കുകയും ചെയ്യും.
