തിരുവനന്തപുരം: കഴിഞ്ഞ വര്ഷം നവോത്ഥാന സംരക്ഷണ സമിതി രൂപികരിച്ച് വനിത മതില് നിര്മ്മിച്ചതു പോലെ ഈ വര്ഷം ഭരണഘടന സംരക്ഷണസമിതി രൂപികരിച്ച് മനുഷ്യ ചങ്ങല ഉണ്ടാക്കാര് സര്ക്കാര് തീരുമാനം. കേന്ദ്ര സര്ക്കാര് പാസാക്കിയ പൗരത്വനിയമ ഭേദഗതിക്കെതിരെയാണ് സര്ക്കാര് ഭരണഘടന സംരക്ഷണസമിതി രൂപികരിക്കുന്നത്. ശബരിമല വിഷയത്തില് രൂപീകരിച്ച നവോത്ഥാന സംരക്ഷണസമതിയുടെ മാതൃകയിലാവും ഭരണഘടന സംരക്ഷണസമിതിയും പ്രവര്ത്തിക്കുക.
മുഖ്യമന്ത്രി വിളിച്ചുചേര്ത്ത സര്വകക്ഷിയോഗത്തിലേക്ക് മതസാമുദായിക സംഘടനാ നേതാക്കളെയും ക്ഷണിക്കുമെന്നാണ് പുറത്തുവരുന്ന റിപ്പോര്ട്ടുകള്. ഇതില് നടക്കുന്ന ചര്ച്ചയുടെ അടിസ്ഥാനത്തില് സംരക്ഷണസമിതി രൂപീകരിക്കാനാണ് നിര്ദ്ദേശം. പൗരത്വഭേദഗതി നിയമത്തിനെതിരെ ഒരു സമിതി എന്ന നിലയില്ല ഭരണഘടനാ സംരക്ഷണ സമിതി രൂപികരിക്കുന്നത്. കേന്ദ്രസര്ക്കാരിനെ എതിര്ക്കാനുള്ള ഒരു സ്ഥിരം പ്ലാറ്റ് ഫോം എന്നനിലയിലാണ് സര്ക്കാര് സമിതി രൂപികരിക്കുന്നത്. കഴിഞ്ഞ ദിവസം ചേര്ന്ന സിപിഎം സെക്രട്ടറിയേറ്റ് യോഗത്തില് ഇക്കാര്യം വിശദമായി ചര്ച്ച ചെയ്തിരുന്നു. മുഖ്യമന്ത്രി പിണറായി വിജയനാണ് ഇക്കാര്യം യോഗത്തില് അവതരിപ്പിച്ചത്.
അടുത്ത വര്ഷം ജനുവരി 26ന് എല്ഡിഎഫ് നേതൃത്വത്തില് നടക്കുന്ന മനുഷ്യചങ്ങലയില് പ്രതിപക്ഷപാര്ട്ടികളെയും പങ്കെടുപ്പിക്കാന് ശ്രമം നടത്തും. എസ്ഡിപിഐ, വെല്ഫെയര് പാര്ട്ടി ഒഴികെയുള്ള എല്ലാ സംഘടനകളെയും മനുഷ്യചങ്ങലയില് പങ്കെടുപ്പിക്കാനാണ് തീരുമാനമെന്ന് എംവി ഗോവിന്ദന് വ്യക്തമാക്കി.
