ലഖ്നൗ: പൗരത്വ നിയമത്തിനെതിരായി ജിഹാദി സംഘടനയായ പോപ്പുലര് ഫ്രണ്ടിനോടൊപ്പം യുപിയില് കലാപം അഴിച്ചുവിട്ട എല്ലാ സിപിഎം നേതാക്കളെയും പോലീസ് അറസ്റ്റ് ചെയ്തു. വരണാസിയിലെ സിപിഎം ജില്ല കമ്മിറ്റിയിലെ മുഴുവന് അംഗങ്ങളെയുമാണ് കലാപം നടത്തിയതിന് പോലീസ് ജയിലില് അടച്ചത്. വാരാണാസി സിപിഎം ജില്ല കമ്മിറ്റിയില് ആകെ മൂന്നു പേരാണ് ഉള്ളത്. സമരത്തിന് പിന്നില് ചുവപ്പ് ജിഹാദി സംഘടനകളാണെന്നുള്ളതിന്റെ തെളിവുകളാണ് വാരണാസിയില് നിന്ന് പുറത്തുവരുന്നത്. അക്രമം നടത്തുന്നവരുടെ പാര്ട്ടി നോക്കാതെ നടപടി സ്വീകരിക്കുമെന്ന് മുഖ്യമന്ത്രി യോഗി ആദിദ്യനാഥ് പറഞ്ഞു.
നിയമത്തിനെതിരെന്ന വ്യാജേന പോപ്പുലര് ഫ്രണ്ട് ഓഫ് ഇന്ത്യ കരുതിക്കൂട്ടി പ്രതിഷേധങ്ങള് സൃഷ്ടിക്കുകയാണെന്ന് ഉത്തര്പ്രദേശ് പോലീസ് കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് നടപടി. പൗരത്വ നിയമത്തിന്റെ പേരില് സംസ്ഥാനത്ത് വന് കലാപങ്ങളാണ് നടന്നത്. ഇതിനു പിന്നില് ജിഹാദി സംഘടനകള്ക്ക് വ്യക്തമായ പങ്കുള്ളതായി തെളിഞ്ഞിരുന്നു. പോലീസിന് നേരെയും പലയിടത്തും ആക്രമണമുണ്ടായി.
മാത്രമല്ല, യുപിയിലെ കലാപകാരികള്ക്ക് സഹായവാഗ്ദാനവുമായി പോപ്പുലര് ഫ്രണ്ടും സിപിഎമ്മും ഇപ്പോള് രംഗത്തെത്തിയിട്ടുമുണ്ട് . പൗരത്വ ഭേദഗതി നിയമത്തിനെതിരെ കലാപം നടത്തിയതിനു അറസ്റ്റിലായ പ്രതിഷേധക്കാരെ ജാമ്യത്തിലെടുക്കാനെത്തിയ പോപ്പുലര് ഫ്രണ്ട് അഭിഭാഷകനെ കഴിഞ്ഞ ദിവസം പോലീസ് അറസ്റ്റ് ചെയ്തിരുന്നു. രാജസ്ഥാനില് നിന്നുള്ള പോപ്പുലര് ഫ്രണ്ട് പ്രവര്ത്തകന് മുഹമ്മദ് ഫൈസലിനെയാണ് ഉത്തര്പ്രദേശ് പോലീസ് അറസ്റ്റ് ചെയ്തത്. ഐപിസി 145,149,153(അ),505 എന്നീ വകുപ്പുകള് അനുസരിച്ചാണ് ഇയാള്ക്കെതിരെ കേസ് രജിസ്റ്റര് ചെയ്തത് .
