ന്യൂദല്‍ഹി: മുന്‍ പ്രധാനമന്ത്രിയും ബിജെപിയുടെ മുതിര്‍ന്ന നേതാവുമായിരുന്ന അടല്‍ ബിഹാരി വാജ്‌പേയിയുടെ 95-ാം ജന്മദിനം രാജ്യമെങ്ങും ആഘോഷിക്കുന്നു. രാഷ്‌ട്രപതി രാമ്‌നാഥ് കോവിന്ദും പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തര മന്ത്രി അമിത് ഷായും പ്രതിരോധ മന്ത്രി രാജ്‌നാഥ് സിംഗും അടക്കമുള്ള പ്രമുഖര്‍ വാജ്‌പേയിക്ക് ആദരാഞ്ജലി അര്‍പ്പിച്ചു. വാജ്‌പേയിയുടെ സ്മൃതിമണ്ഡപമായ സദൈവ് അടല്‍ സന്ദര്‍ശിച്ചാണ് നേതാക്കള്‍ അദ്ദേഹത്തിന് ആദരമര്‍പ്പിച്ചത്.
വാജ്‌പേയുടെ വളര്‍ത്തുമകള്‍ നമിത കൗള്‍ ഭട്ടാചാര്യയും കൊച്ചുമകള്‍ നിഹാരികയും അദ്ദേഹത്തിന് ആദരാഞ്ജലിയര്‍പ്പിക്കാന്‍ എത്തിയിരുന്നു. അടല്‍ ബിഹാരി വാജ്‌പേയ് എന്നും ഇന്ത്യയിലെ ജനങ്ങളുടെ മനസ്സില്‍ ജീവിക്കുമെന്നും അദ്ദേഹത്തിന് ഏവരും ആദരമര്‍പ്പിക്കുകയാണെന്നും പ്രധാനമന്ത്രി നരേന്ദ്ര മോദി ട്വീറ്റ് ചെയ്തിരുന്നു. മൂന്ന് തവണ ഇന്ത്യയുടെ പ്രധാനമന്ത്രിയായിരുന്ന വാജ്‌പേയെക്കുറിച്ച് ഒരു വീഡിയോയും അദ്ദേഹം ട്വീറ്റില്‍ പങ്കു വെച്ചിരുന്നു.
ലഖ്‌നൗവിലെ ലോക് ഭവനില്‍ അടല്‍ജിയുടെ പൂര്‍ണ്ണകായ വെങ്കല പ്രതിമ ഇന്ന് പ്രധാനമന്ത്രി നരേന്ദ്ര മോദി അനാച്ഛാദനം ചെയ്യും. അടല്‍ജിയുടെ പേരിലുള്ള മെഡിക്കല്‍ യൂണിവേഴ്‌സിറ്റിയുടെ ശിലാസ്ഥാപനവും പ്രധാനമന്ത്രി നിര്‍വഹിക്കും. യുപി ഗവര്‍ണര്‍ ആനന്ദിബെന്‍ പട്ടേല്‍, മുഖ്യമന്ത്രി യോഗി ആദിത്യനാഥ്, ലഖ്‌നൗ എംപി കൂടിയായ കേന്ദ്ര പ്രതിരോധമന്ത്രി രാജ്‌നാഥ് സിങ് എന്നിവര്‍ പങ്കെടുക്കും. അടല്‍ ജല്‍ യോജനയ്‌ക്ക് മൂവായിരം കോടി രൂപ ഇന്നലെ ചേര്‍ന്ന കേന്ദ്ര മന്ത്രിസഭ വകയിരുത്തിയിരുന്നു. അടല്‍ജി ജന്മദിനമായ ഇന്ന് സദ്ഭരണ ദിനമായി ആചരിക്കാന്‍ പ്രധാനമന്ത്രിയുടെ ഓഫീസ് എല്ലാ മന്ത്രാലയങ്ങള്‍ക്കും നിര്‍ദേശം നല്‍കി.
