സൂറത്ത്: പരിക്കില്‍ നിന്ന് മോചിതനായി ദേശീയ ടീമില്‍ തിരിച്ചെത്തിയ ഇന്ത്യയുടെ ഒന്നാം നമ്പര്‍ പേസര്‍ ജസ്പ്രീത് ബുംറ രഞ്ജിട്രോഫിയില്‍ ഗുജറാത്തിനായി ഇന്ന്് കേരളത്തിനെതിരെ പോരിനിറങ്ങും. പൂര്‍ണ്ണമായി ആരോഗ്യം വീണ്ടെടുത്തെന്ന് തെളിയിക്കാന്‍ ബുംറയ്‌ക്ക് ലഭിക്കുന്ന അവസരമാണിത്. ബുംറയുടെ സാന്നിദ്ധ്യം കേരളത്തിന് കടുത്ത വെല്ലുവിളിയാകും.
സെപ്തംബര്‍ മുതല്‍ പരിക്കിന്റെ പിടിയിലായിരുന്ന ബുംറയെ കഴിഞ്ഞ ദിവസം ശ്രീലങ്ക, ഓസ്‌ട്രേലിയ ടീമുകള്‍ക്കെതിരായ പരമ്പരയ്‌ക്കുള്ള ഇന്ത്യന്‍ ടീമിലുള്‍പ്പെടുത്തി. ശാരീരിക ക്ഷമത വീണ്ടെടുക്കുന്നതിനായാണ് ബുംറ കേരളത്തിനെതിരെ കളിക്കാനിറങ്ങുന്നത്. ദേശീയ സെലക്ഷന്‍ കമ്മിറ്റി ചെയര്‍മാന്‍ എംഎസ്‌കെ പ്രസാദ് ഉള്‍പ്പെടെയുള്ളവര്‍ മത്സരം കാണാനെത്തുമെന്നാണ് പ്രതീക്ഷ.
മൂന്ന് ഫോര്‍മാറ്റിലും ഇന്ത്യയുടെ തുറുപ്പ് ചീട്ടാണ് ബുംറ. വിന്‍ഡീസിനെതിരായ ടെസ്റ്റ് പരമ്പരയിലാണ് ബുംറ അവസാനമായി കളിച്ചത്. ജമൈക്കയിലെ രണ്ടാം ടെസ്റ്റില്‍ ഹാട്രിക്ക് കറുിച്ചു. ഹര്‍ഭജന്‍ സിങ്ങിനും ഇര്‍ഫാന്‍ പഠാനും ശേഷം ടെസ്റ്റില്‍ ഹാട്രിക്ക് നേടുന്ന ഇന്ത്യന്‍ താരമാണ് ബുംറ. 12 ടെസ്റ്റില്‍ 62 വിക്കറ്റ്‌നേടിയ ബുംറ ഏകദിനത്തില്‍ 103 ഉം ടി 20 യില്‍ 51 വിക്കറ്റും കരസ്ഥമാക്കിയിട്ടുണ്ട്.
രഞ്ജി ട്രോഫിയില്‍ ഗുജറാത്തിന്റെ രണ്ടാം മത്സരമാണിത്. ആദ്യ മത്സരത്തില്‍ അവര്‍ ഹൈദരാബാദിനെ പരാജയപ്പെടുത്തി. അതേസമയം കേരളത്തിന്റെ മൂന്നാം മത്സരമാണിത്. ആദ്യ മത്സരത്തില്‍ ദല്‍ഹിക്കെതിരെ വിജയത്തിലേക്ക് നീങ്ങി കേരളം ഒടുവില്‍ സമനില വഴങ്ങി. രണ്ടാം മത്സരത്തില്‍ ബംഗാളിനോട് തോറ്റു.
ഇന്ത്യയുടെ ടി 20 ടീമില്‍ ഇടം നേടിയ സഞ്ജു സാംസണിലാണ് കേരളത്തിന്റെ പ്രതീക്ഷ. ഈ സീസണില്‍ മികച്ച ഫോം തുടരുന്ന സഞ്ജു സാംസണ്‍ ബംഗാളിനെതിരായ മത്സരത്തില്‍ സെഞ്ചുറി നേടിയിരുന്നു. രണ്ട് മത്സരങ്ങളില്‍ ഒരു സമനിലയും ഒരു തോല്‍വിയും ഏറ്റുവാങ്ങിയ കേരളം ഗ്രൂപ്പ് എ യില്‍ ആറാം സ്ഥാനത്താണ്.
