കണ്ണൂര്: വലയ സൂര്യഗ്രഹണം സുരക്ഷിതമായി നിരീക്ഷിക്കുന്നതിന് നൂതന ഗ്രഹണദര്ശനികളുമായി തോട്ടട വെസ്റ്റ് യുപി സ്കൂള് ശാസ്ത്രാധ്യാപകന് കെ.സി. ഗിരീഷ് ബാബു, ഇരുനൂറോളം ഗ്രഹണദര്ശിനികളാണ് കുട്ടികള്ക്കും നാട്ടുകാര്ക്കുമായി നിര്മ്മിച്ച് വിതരണം ചെയ്തത്.
സൂര്യഗ്രഹണം സ്കൂള് അവധിദിവസം നടക്കുന്നതിനാല്, കുട്ടികള് സോളാര് ഫില്ട്ടറുകള് ഉപയോഗിച്ച് ഗ്രഹണനിരീക്ഷണം നടത്തുമ്പോള് ഉണ്ടായേക്കാവുന്ന അപകടസാധ്യത പൂര്ണമായും പരിഹരിക്കുക എന്ന ലക്ഷ്യത്തോടെയാണ് വലയസൂര്യദര്ശിനി എന്ന പേരില് പേപ്പര് ഗ്ലാസും ഐസ്ക്രീം ബോളും മിററും ഉപയോഗിച്ചുകൊണ്ടുള്ള ഉപകരണം നിര്മ്മിച്ചത്. ഇത് ഉപയോഗിച്ച് സൂര്യഗ്രഹണം വീട്ടിനുള്ളിലെ ചുമരിലേക്ക് പ്രതിഫലിപ്പിക്കുകയും തുടര്ന്ന് വീട്ടിലെ മുഴുവന് പേര്ക്കും ഒരേസമയം വീട്ടിലിരുന്ന് സുരക്ഷിതമായി കൂടുതല് സമയം സൂര്യനില് ദൃശ്യമാകുന്ന അപൂര്വ്വ രൂപമാറ്റം ദര്ശിക്കാനുമാകും എന്നതാണ് ഇതിന്റെ സവിശേഷത. കഴിഞ്ഞ വ്യാഴം, വെള്ളി ദിവസങ്ങളിലായി സ്കൂളില് ഉപകരണ പ്രദര്ശനവും ഗ്രഹണ വിശദീകരണ ക്ലാസും സംഘടിപ്പിച്ചു. ചാന്ദ്രദര്ശിനി, സൂര്യദര്ശിനി എന്നീ ഉപകരണങ്ങള് ഉപയോഗിച്ച് ഗ്രഹണാനുഭവം ആസ്വദിക്കുവാനുള്ള അവസരവും ഒരുക്കിയിരുന്നു. വിവിധ ഗ്രഹണഘട്ടങ്ങള് വ്യക്തമാക്കുന്ന ഫോട്ടോ പ്രദര്ശനവും ഒരുക്കിയിരുന്നു. വലയസൂര്യദര്ശിനിയുടെ വിതരണോദ്ഘാടനം കണ്ണൂര് സൗത്ത് എഇഒ സുരേഷ് ബാബു നിര്വ്വഹിച്ചു.
പേപ്പര് വിത്ത് പേന നിര്മ്മാണത്തിലൂടെ ശ്രദ്ധേയനായ ഗിരീഷ് ബാബു ഇന്നൊവേറ്റീവ് ടീച്ചേഴ്സ് അവാര്ഡ്, ദ്രോണാചാര്യ, ഗുരുശ്രേഷ്ഠ അവാര്ഡുകള്ക്ക് അര്ഹനായിട്ടുണ്ട്. ഈ വര്ഷം ശാസ്ത്രോത്സവത്തില് അധ്യാപകര്ക്കായുള്ള സയന്സ് ടീച്ചേഴ്സ് എയ്ഡ് മത്സരത്തില് സംസ്ഥാനതലത്തില് ഒന്നാംസ്ഥാനം ലഭിച്ചത് ഇദ്ദേഹത്തിന്റെ കണ്ടുപിടുത്തങ്ങള്ക്കായിരുന്നു. കിഴുന്നപ്പാറ സ്വദേശിയാണ്.
