കൊല്ലം: പൗരത്വ നിയമത്തിനെതിരെ പ്രതിഷേധിക്കാന് രക്തസാക്ഷികളെ മറന്ന സിപിഎം-എസ്എഫ്ഐ നേതാക്കള്, പോപ്പുലര് ഫ്രണ്ട് വെല്ഫെയര് പാര്ട്ടി നേതാക്കളോടൊപ്പം വേദി പങ്കിട്ടു. കൊല്ലം അഞ്ചലില് നടന്ന പരിപാടിയിലായിരുന്നു പാര്ട്ടിക്ക് വേണ്ടി ജീവത്യാഗം ചെയ്തവരെ ബോധപൂര്വ്വം കമ്മ്യൂണിസ്റ്റ് അപ്പോസ്തലന്മാര് മറന്ന് കളഞ്ഞത്.
പോപ്പുലര് ഫണ്ടിന്റെ കത്തിക്കിരയായി രക്തസാക്ഷികളായവരാണ് അഭിന്യു അടക്കമുള്ള രക്തസാക്ഷികള്. സിപിഎം പ്രവര്ത്തകന് അഞ്ചല് തടിക്കാട് എം.എ അഷറഫിനെ വെട്ടിക്കൊന്ന കേസിലെ പ്രതികളും പോപ്പുലര് ഫ്രണ്ട് പ്രവര്ത്തകരാണ്. നേരത്തെ മേഖലയില് സിപിഎം- പോപ്പുലര് ഫ്രണ്ട് സംഘര്ഷങ്ങളും നിലനിന്നിരുന്നു. പൗരത്വ നിയമത്തിനെതിരായ പ്രതിഷേധത്തിന്റെ പേരിലാണെങ്കിലും കഴിഞ്ഞതെല്ലാം മറന്ന് പോപ്പുലര് ഫ്രണ്ടുമായി കൊകോര്ത്ത സിപിഎമ്മിന്റെ നടപടിയില് പാര്ട്ടിയില് തന്നെ ഭിന്നത രൂപപ്പെട്ടിട്ടുണ്ട്.
പാര്ട്ടിയില് കോണ്ഗ്രസും പങ്കെടുത്തിരുന്നു. സിപിഎമ്മുമായി വേദി പങ്കിട്ടത് കോണ്ഗ്രസിനുള്ളിലും എതിര്പ്പുണ്ടാക്കിയിട്ടുണ്ട്. കോണ്ഗ്രസ് നേതാവായിരുന്ന നെട്ടയം രാമഭദ്രനെ വെട്ടിക്കൊന്ന കേസിലെ പ്രതിയും സിപിഎം നേതാവുമായ വ്യക്തിയോടൊപ്പമാണ് പാര്ട്ടി വേദി പങ്കിട്ടത്.
അഞ്ചല് മേഖല മഹല്ല് കമ്മറ്റിയുടെ പേരിലാണ് പൗരത്വ ബില്ലിനെതിരെ റാലിയും പൊതുസമ്മേളനവും സംഘടിപ്പിച്ചതെങ്കിലും പോപ്പുലര് ഫ്രണ്ടാണ് പരിപാടിക്ക് നേതൃത്വം നല്കിയെതെന്ന് പാര്ട്ടിക്കാര് തന്നെ ചൂണ്ടിക്കാട്ടുന്നു. മഹല്ല് കമ്മിറ്റി, ജനകീയ പൗരത്വ സംരക്ഷണ വേദി എന്നിങ്ങനെ വിവിധ ബാനറുകള് ഉപയോഗിച്ച് നടത്തിയ പ്രകടനത്തിലുടനീളം തക്ബീര് വിളികള് മുഴക്കിയിരുന്നു.
കശുവണ്ടി വികസന കോര്പ്പറേഷന് ചെയര്മാനും സിഐടിയു ജില്ലാ സെക്രട്ടറിയുമായ എസ്. ജയമോഹന്, കെപിസിസി ജനറല് സെക്രട്ടറി ജ്യോതികുമാര് ചാമക്കാല , വ്യാപാരി വ്യവസായി ഏകോപന സമിതി ജില്ലാ പ്രസിഡന്റ് എസ്.ദേവരാജന്, കബീര് ബാഖവി, മുസ്ലീം ലീഗ് ജില്ലാ പ്രസിഡന്റ് അന്സറുദീന്, വെല്ഫെയര് പാര്ട്ടി സംസ്ഥാന സെക്രട്ടറി സജീദ് ഖാലിദ് ഏരൂര് ഷംസുദീന് മദനി അല് ഖാദിരി, അഞ്ചല് ബദറുദ്ദീന്, തുടങ്ങിയവരും പരിപാടിയില് പങ്കെടുത്തിരുന്നു.
