റാഞ്ചി: ഝാര്ഖണ്ഡ് നിയമസഭ തെരഞ്ഞെടുപ്പുകളുടെ ചരിത്രത്തില് ഇതുവരെ ഒരു മുഖ്യമന്ത്രിയും തുടര്ച്ചയായി രണ്ട് തവണ അധികാരത്തിലെത്തിയിട്ടില്ല. ഈ ചരിത്രം തിരുത്തി കുറിക്കാന് ഒരുങ്ങുകയാണ് മുഖ്യമന്ത്രി രഘുബര്ദാസ്.
വീണ്ടും മുഖ്യമന്ത്രിയായി അധികാരത്തില് തിരിച്ചെത്തിയാല് ഝാര്ഖണ്ഡിന്റെ 19 വര്ഷത്തെ ചരിത്രമാകും രഘുബര് ദാസ് തിരുത്തിക്കുറിക്കുക. മുന് മുഖ്യമന്ത്രിമാരെല്ലാം പരാജയപ്പെട്ടിടത്ത് രഘുബര് ദാസ് വിജയിക്കുമെന്നു തന്നെയാണ് ബിജെപി ആത്മവിശ്വാസം പ്രകടിപ്പിക്കുന്നത്. 2014ല് നടന്ന തെരഞ്ഞെടുപ്പില് ജംഷ്ഡ്പൂര് ഈസ്റ്റ് മണ്ഡലത്തില് നിന്നും മത്സരിച്ച രഘുബര് ദാസ് 70,000ത്തോളം വോട്ടുകളുടെ ഭൂരിപക്ഷത്തിലാണ് വിജയിച്ചത്.
2000ത്തില് രൂപീകൃതമായ ഝാര്ഖണ്ഡില് മൂന്ന് തെരഞ്ഞെടുപ്പുകളാണ് ഇതുവരെ പൂര്ത്തിയായത്. ഇക്കാലയളവില് ആറ് മുഖ്യമന്ത്രിമാര് സംസ്ഥാനം ഭരിച്ചു. ബാബുലാല് മറാണ്ടി, അര്ജുന് മുണ്ട, ഷിബു സോറന്, മധു കോഡ, ഹേമന്ത് സോറന്, രഘുബാര് ദാസ് എന്നിവര് ഝാര്ഖണ്ഡിലെ മുഖ്യമന്ത്രിമാരായി തെരഞ്ഞെടുക്കപ്പെട്ടു. നാലാമത്തെ നിയമസഭ തെരഞ്ഞെടുപ്പാണ് സംസ്ഥാനത്ത് പുരോഗമിക്കുന്നത്.
2014ലെ നിയമസഭ തെരഞ്ഞെടുപ്പില് നാല് മുന് മുഖ്യമന്ത്രിമാരാണ് പരാജയപ്പെട്ടത്. ഝാര്ഖണ്ഡിലെ ആദ്യ മുഖ്യമന്ത്രിയായ ബാബുലാല് മറാണ്ടി രണ്ട് സീറ്റുകളില് നിന്ന് മത്സരിച്ചെങ്കിലും രണ്ടിലും പരാജയപ്പെടുകയായിരുന്നു.
ധന്വര്, ഗിരിധ് മണ്ഡലങ്ങളില് നിന്നാണ് അദ്ദേഹം മത്സരിച്ചിരുന്നത്. ഗിരിധില് ബിജെപി സ്ഥാനാര്ത്ഥിയായ നിര്ഭയ് ഷഹബധിയോട് 31,000ത്തോളം വോട്ടുകള്ക്കാണ് മറാണ്ടി അടിയറവു പറഞ്ഞത്. ധന്വറില് സിപിഐ(എംഎല്) സ്ഥാനാര്ത്ഥിയോടും അദ്ദേഹം പരാജയപ്പെട്ടു.
അര്ജുന് മുണ്ട ജെഎംഎം സ്ഥാനാര്ത്ഥി ദശ്രഥ് ഗഗ്രായിയോട് 12,000 വോട്ടിന് തോറ്റിരുന്നു. മധു കോഡ മജ്ഗാവോണില് നിന്നും മത്സരിച്ച് പരാജയപ്പെട്ടു. ഹേമന്ത് സോറനും പരാജയമറിഞ്ഞു.
