കറാച്ചി: ഓപ്പണര്മാരായ ഷാന് മസൂദ്, അബിദ് അലി എന്നിവരുടെ സെഞ്ചുറികളില് പാക്കിസ്ഥാന് ശ്രീലങ്കക്കെതിരായ രണ്ടാം ക്രിക്കറ്റ് ടെസ്റ്റില് ശക്തമായ തിരിച്ചുവരവ് നടത്തി. ആദ്യ ഇന്നിങ്സില് 80 റണ്സ് ലീഡ് വഴങ്ങിയ പാക്കിസ്ഥാന് മൂന്നാം ദിനം കളിനിര്ത്തുമ്പോള് രണ്ട് വിക്കറ്റിന് 395 റണ്സ് എടുത്തു. ഇതോടെ ആതിഥേയര്ക്ക് 315 റണ്സ് ലീഡായി. എട്ട് വിക്കറ്റും കൈവശമുണ്ട്.
ഓപ്പണര് ഷാന് മസൂദ് 198 പന്തില് 135 റണ്സ് നേടി. ഏഴു ഫോറും മൂന്ന് സിക്സറും അടിച്ചു. അബിദ് അലി 174 റണ്സ് സ്വന്തം പേരില് കുറിച്ചു. 281 പന്ത് നേരിട്ട അബിദ് അലി 21 ഫോറും ഒരു സിക്സറും അടിച്ചു. ആദ്യ വിക്കറ്റില് ഇവര് 278 റണ്സിന്റെ കൂട്ടുകെട്ടുണ്ടാക്കി. സ്റ്റമ്പെടുക്കുമ്പോള് ക്യാപ്്റ്റന് അസര് അലിയും (57), ബാബര് അസമും (22) കീഴടങ്ങാതെ നില്ക്കുകയാണ്.
വിക്കറ്റ് നഷ്ടം കൂടാതെ 57 റണ്സെന്ന സ്കോറിനാണ് പാക്കിസ്ഥാന് ഇന്നലെ ഇന്നിങ്സ് പുനരാരംഭിച്ചത്. ശ്രീലങ്കയുടെ ലാഹിരു കുമാര 22 ഓവറില് 88 റണ്സിന് രണ്ട് വിക്കറ്റ് വീഴ്ത്തി.
അലിക്ക് റെക്കോഡ്
കറാച്ചി: തുടര്ച്ചയായ രണ്ട് ടെസ്റ്റുകളില് സെഞ്ചുറി നേടുന്ന ആദ്യ പാക് താരമെന്ന റെക്കോഡ് ഓപ്പണര് അബിദ് അലിക്ക് സ്വന്തമായി. ശ്രീലങ്കക്കെതിരായ രണ്ടാം ടെസ്റ്റിന്റെ മൂന്നാം ദിനത്തില് സെഞ്ചുറി കുറിച്ചാണ് അബിദ് ഈ നേട്ടം കൈവരിച്ചത്. അബിദ് 174 റണ്സ്് നേടി.
ശ്രീലങ്കക്കെതിരെ റാവല്പിണ്ടിയില് നടന്ന ആദ്യ ടെസ്റ്റിലും അബിദ് അലി ശതകം കുറിച്ചു. 109 റണ്സുമായി കീഴടങ്ങാതെ നിന്നു. ഈ മികവിന് കളിയിലെ കേമനുള്ള പുരസ്കാരവും ലഭിച്ചു. റാവല്പിണ്ടിയില് സെഞ്ചുറി കുറിച്ചതോടെ ഒരു ലോക റെക്കോഡും അബിദിന് സ്വന്തമായി. ഏകദിനത്തിലും ടെസ്റ്റിലെയും അരങ്ങേറ്റ മത്സരത്തില് സെഞ്ചുറി നേടിയ ലോകത്തെ ആദ്യ ബാറ്റ്സ്മാനാണ് അബിദ്. ഈ വര്ഷം മാര്ച്ചില് ഓസ്ട്രേലിയക്കെതിരായ ഏകദിത്തില് അരങ്ങേറിയ അബിദ് അന്ന് 112 റണ്സ് സ്വന്തം പേരില് കുറിച്ചു.
