കൊച്ചി: കേരളത്തിലെ തീവ്രവാദ കേന്ദ്രങ്ങളാണ് പൗരത്വ ഭേദഗതി നിയമത്തിനെതിരേ രാജ്യവ്യാപകമായ പ്രചാരണം നടത്തുന്നതെന്ന് ബിജെപി ജനറല്‍ സെക്രട്ടറി കെ. സുരേന്ദ്രന്‍. ബിജെപി സംസ്ഥാന ശില്‍പ്പശാല ഉദ്ഘാടനം ചെയ്ത് സംസാരിക്കുകയായിരുന്നു.
കേരളത്തിലെ ഇടതു, വലതു മുന്നണികളും, മതമൗലികവാദികളും ചില മാധ്യമങ്ങളുമാണ് തെറ്റായ പ്രചാരണം നടത്തുന്നത്. ബീഫിന്റെയും ആള്‍ക്കൂട്ടകൊലപാതകത്തിന്റെയും പേരില്‍ നടന്നതുപോലുള്ളതാണിത്. കോഴിക്കോട് രണ്ട് ഡിവൈഎഫ്‌ഐ പ്രവര്‍ത്തകരെ യുഎപിഎ വകുപ്പ് ചുമത്തി അറസ്റ്റ് ചെയ്തപ്പോള്‍ നിരപരാധികളെന്ന് ആദ്യം പറഞ്ഞ മുഖ്യമന്ത്രിയുടെയും ധനകാര്യമന്ത്രിയുടെയും നിലപാട് ഒന്നരമാസങ്ങള്‍ക്കുശേഷം മാറി. സംസ്ഥാനത്തിന്റെ സുരക്ഷയെ ബാധിക്കുന്ന, മതതീവ്രവാദ ബന്ധം ഈ കേസിനുണ്ടെന്നും എന്‍െഎഎ അന്വേഷിക്കണമെന്നും ആവശ്യപ്പെട്ട് ഇപ്പോള്‍ കേന്ദ്രത്തെ സമീപിച്ചിരിക്കുകയാണ്. ഇവരുടെ പ്രചാരണങ്ങളിലെ വിശ്വാസ്യത അത്രയേ ഉള്ളു.
രാജ്യത്തെ സര്‍വകലാശാലകളിലെ സമരം ആരാണ് നടത്തുന്നതെന്നത് സംബന്ധിച്ച് ദേശീയ മാധ്യമങ്ങള്‍ എല്ലാ രേഖകളും സഹിതം പുറത്തുവിട്ടിട്ടും കേരളത്തില്‍ അതൊരുവാര്‍ത്തയായില്ല. ചരിത്രത്തില്‍ ആദ്യമായി സെക്രട്ടേറിയറ്റിന്റെ മുന്നില്‍ അര്‍ധരാത്രിയില്‍ മയ്യത്ത് സമസ്‌കാരം നടത്തി. ജാമിയ മിലിയ സര്‍വകലാശാലയില്‍ രണ്ട് വിദ്യാര്‍ഥികള്‍ വെടിയേറ്റ് കൊല്ലപ്പെട്ടെന്നുള്ള കുപ്രചരണത്തിന്റെ ഫലമായിരുന്നു മയ്യത്ത് നമസ്‌ക്കാരം. കേരളത്തില്‍നിന്നുള്ള ജിഹാദി മാധ്യമപ്രവര്‍ത്തകനാണ് കുപ്രചാരണങ്ങളുടെ ഉറവിടം. മറ്റുള്ളവരുടെ തിരക്കഥയിലാണ് താരങ്ങള്‍ സിനിമയില്‍ അഭിനയിക്കുന്നത്. എന്നാല്‍ ജീവിത്തില്‍ അങ്ങനെയാവരുത്. സിനിമാതാരങ്ങള്‍ പൗരത്വനിയമ ഭേദഗതി ഒരുതവണയെങ്കിലും വായിക്കണമെന്നും വസ്തുത നോക്കി പ്രതികരിക്കാനുള്ള സാമാന്യനീതി താരങ്ങള്‍ പുലര്‍ത്തണമെന്നും കെ. സുരേന്ദ്രന്‍ പറഞ്ഞു. കലാപകാരികളുടെ വികാരമല്ല ജനവികാരം. അര്‍ബന്‍ നക്‌സലുകള്‍ തെരുവില്‍ ഇറങ്ങിക്കാണിക്കുന്നതല്ല ജനവികാരം. മഹാഭൂരിപക്ഷം വരുന്ന, നിശബ്ദരായിരിക്കുന്നവര്‍ അഭിപ്രായം പ്രകടിപ്പിക്കാന്‍ ഇറങ്ങിയാല്‍ പ്രത്യാഘാതം വലുതായിരിക്കും,സുരേന്ദ്രന്‍ പറഞ്ഞു.ബിജെപി സംസ്ഥാന ഉപാധ്യക്ഷന്‍ പി.എം. വേലായുധന്‍ അധ്യക്ഷനായി. സംസ്ഥാന ജനറല്‍ സെക്രട്ടറി എം.ടി. രമേശ്, ജില്ലാ പ്രസിഡന്റ് വി.എന്‍. വിജയന്‍ പങ്കെടുത്തു.
