മംഗളൂരു: ദേശീയ പൗരത്വ ഭേദഗതി ബില്ലിനെതിരെ മംഗളൂരുവില് നടത്തിയ പ്രതിഷേധം അക്രമാസക്തമായി. നിരോധനാജ്ഞ ലംഘിച്ച് ഇന്നലെ രാവിലെ പതിനൊന്നരയോടെ ഡിസ്ട്രിക്ട് കമ്മീഷണര് ഓഫീസിനു സമീപമുള്ള സ്റ്റേറ്റ് ബാങ്ക് സിറ്റി ബസ് സ്റ്റാന്ഡിലായിരുന്നു പ്രതിഷേധക്കാര് സംഘടിച്ചത്.
ഇവര് പോലീസിനു നേരെ കല്ലും സോഡാക്കുപ്പികളും വലിച്ചെറിഞ്ഞു. പ്രതിഷേധക്കാരില് പലരും ഹെല്മറ്റ് ധരിച്ചിരുന്നു. ഇതോടെ പ്രതിഷേധക്കാരെ പോലീസ് വിരട്ടി ഓടിച്ചു. കണ്ണീര് വാതകം പ്രയോഗിച്ചു. സംഘര്ഷ സാധ്യത കണക്കിലെടുത്ത് സര്ക്കാര് നിരോധനാജ്ഞ പ്രഖ്യാപിച്ചിട്ടുണ്ട്.
പിന്നീട് പ്രതിഷേധക്കാര് റോഡുകളില് ടയറുകളും പഴയ സാധനങ്ങളും ഇട്ടു കത്തിച്ചു. കടകള് ബലമായി അടപ്പിച്ച പ്രതിഷേധക്കാര് ഒരു ബൈക്ക് കത്തിക്കുകയും കെഎസ്ആര്ടിസി ബസ് ഉള്പ്പെടെ നിരവധി വാഹനങ്ങള് തകര്ക്കുകയുംചെയ്തു. പ്രതിഷേധം അക്രമാസക്തമായതോടെ നഗരത്തിലെ റോഡുകളിലൂടെയുള്ള ഗതാഗതം പൂര്ണമായും സ്തംഭിച്ചു. ഉന്നത പോലീസ് ഉദ്യോഗസ്ഥര് സ്ഥിതി വിലയിരുത്തി. നിയമം കയ്യിലെടുക്കാന് ആരെയും അനുവദിക്കില്ലെന്ന് സിറ്റി പോലീസ് കമ്മീഷണര് ഡോ. പി.എസ്. ഹര്ഷ പറഞ്ഞു. പത്തിലേറെ പോലീസുകാര്ക്ക് അക്രമത്തില് പരിക്കേറ്റു. നൂറിലേറെ അക്രമികളെ അറസ്റ്റുചെയ്തിട്ടുണ്ട്.
സംഘര്ഷ സാധ്യത ഉണ്ടാകാന് സാധ്യതയുള്ള സ്ഥലങ്ങളില് കൂടുതല് പോലീസിനെ വിന്യസിച്ചു. സാമൂഹ്യമാധ്യമങ്ങള് നിരീക്ഷണത്തിലാണ്. വിദ്വേഷ പ്രചാരണം നടത്തുന്നവര്ക്കെതിരെ നിയമനടപടി സ്വീകരിക്കുമെന്ന് കമ്മീഷണര് മുന്നറിയിപ്പ് നല്കി.മംഗളൂരുവില് അക്രമം നടക്കാന് സാധ്യതയുണ്ടെന്ന രഹസ്യാന്വേഷണ ഏജന്സികളുടെ മുന്നറിയിപ്പിനെ തുടര്ന്ന് ബുധനാഴ്ച വൈകിട്ട് ആറുമുതല് ഇന്ന് അര്ധരാത്രിവരെ നിരോധനാജ്ഞ ഏര്പ്പെടുത്തിയിട്ടുണ്ട്. ഇന്നലത്തെ അക്രമ സംഭവങ്ങളുടെ പശ്ചാത്തലത്തില് നിരോധനാജ്ഞ നീട്ടുമെന്ന സൂചനയും പോലീസ് ഉദ്യോഗസ്ഥര് നല്കി.
