പത്തനംതിട്ട: ടോഡി ബോര്ഡില് നിന്ന് 500 കോടി രൂപ പിന്വലിക്കാനുള്ള സര്ക്കാര് നടപടി ഉപേക്ഷിക്കണമെന്ന് കേരളാ പ്രദേശ് ടോഡി ആന്ഡ് അബ്കാരി മസ്ദൂര് ഫെഡറേഷന് (ബിഎംഎസ്) സംസ്ഥാന ജനറല് സെക്രട്ടറി പി.എസ്. ശശി. ടോഡി വെല്ഫെയര് ഫണ്ടില് നിന്ന് തുക പിന്വലിക്കുന്നത് ക്ഷേമനിധി ബോര്ഡിന്റെ പ്രവര്ത്തനത്തെ ബാധിക്കുമെന്ന് അദ്ദേഹം പറഞ്ഞു. തൊഴിലാളികള്ക്ക് നിലവില് നല്കുന്ന ക്ഷേമനിധി ആനുകൂല്യങ്ങള് തടസ്സപ്പെടും.
പണം ട്രഷറിയിലേക്ക് മാറ്റുന്നതിലൂടെ ക്ഷേമനിധി ബോര്ഡിനെ ഇടത് സര്ക്കാര് ഞെക്കിക്കൊല്ലുകയാണ്. കോടിക്കണക്കിന് രൂപയാണ് അബ്കാരി മേഖലയില് നിന്ന് ക്ഷേമനിധി ബോര്ഡിലേക്ക് അടയ്ക്കാനുള്ളത്. ഈ തുക പിരിച്ചെടുക്കാന് ബോര്ഡിനെ സഹായിക്കുന്നതിന് നടപടി സ്വീകരിക്കുന്നില്ല. ചെത്ത് തൊഴിലാളികള്ക്കും വ്യവസായ തൊഴിലാളികള്ക്കും ഓണക്കാലത്ത് നല്കിയിരുന്ന സാമ്പത്തിക സഹായം 2019ല് ഇടതു സര്ക്കാര് നല്കിയില്ല.
സര്ക്കാരിന്റെ തികഞ്ഞ തൊഴിലാളി വഞ്ചനയാണിതെന്നും അദ്ദേഹം പറഞ്ഞു. അടഞ്ഞു കിടക്കുന്ന ഷാപ്പുകള് തുറന്ന് പ്രവര്ത്തിപ്പിക്കാന് സര്ക്കാര് മുന്കൈയെടുക്കണം. കള്ള് ഉത്പാദിപ്പിക്കാന് സര്ക്കാര് സ്ഥലങ്ങളില് അത്യുത്പാദന ശേഷിയുള്ള തെങ്ങും പനയും വളര്ത്തി കള്ളുത്പാദനത്തിന് നല്കണമെന്നും അദ്ദേഹം ആവശ്യപ്പെട്ടു.
