ലഖ്നൗ: രാജ്യത്ത് അടുത്തിടെ കൊണ്ടുവന്ന പൗരത്വ ഭേദഗതി നിയമം രാജ്യത്തെ മുസ്ലിംകള്ക്ക് എതിരല്ലെന്ന് ദേശീയ ന്യൂനപക്ഷ കമ്മിഷന് അധ്യക്ഷന് സയ്യിദ് ഗൈറുള് ഹസന് റിസ്വി. നിയമത്തിനെതിരെ രാജ്യത്തിന്റെ വിവിധ ഭാഗങ്ങളിലായി അരങ്ങേറുന്ന പ്രതിഷേധം അനാവശ്യനാണെന്നും അദ്ദേഹം പറഞ്ഞു.
നിയമത്തിനെതിരെ പ്രതിഷേധിക്കുകയാണെങ്കില് ജനങ്ങള് സമാധാനപരമായി നടത്തേണ്ടതാണ്. പോലീസും സംയമനം പാലിക്കണമെന്നും അദ്ദേഹം പറഞ്ഞു. അതേസമയം പൗരത്വബില്ലില് ജാമിയയില് നടന്ന അതിക്രമങ്ങള് ഇന്ന് സുപ്രീം കോടതി പരിഗണിക്കും. ദേശീയ പൗരത്വ നിയമത്തിനെതിരെ തെരുവുകളില് നടക്കുന്ന കലാപം നിറുത്തണമെന്ന് സുപ്രീംകോടതി ആവശ്യപ്പെട്ടു.
ആദ്യം സമാധാനം വരട്ടെ, പിന്നീടാവാം കേസെന്നും ചീഫ് ജസ്റ്റിസ് പറഞ്ഞു. ജാമിയ മിലിയ അലിഗഡ് വിദ്യാര്ത്ഥികള്ക്ക് നേരെ നടന്ന അതിക്രമത്തില് സുപ്രീംകോടതി ഇടപടണമെന്ന് ആവശ്യപ്പെട്ട് വിവിധ മനുഷ്യാവകാശ സംഘടനകള് നല്കിയ ഹര്ജിക്കായി ഹാജരായ മുതിര്ന്ന അഭിഭാഷക ഇന്ദിര ജെയ്സിംഗിന്റെ ആവശ്യത്തോട് പ്രതികരിക്കുകയായിരുന്നു ചീഫ് ജസ്റ്റിസ് എസ്. എ. ബോബ്ഡെ. പ്രതിഷേധം തുടര്ന്നാല് കേസ് പരിഗണിക്കാമെന്ന തീരുമാനം മാറ്റുമെന്നും ചീഫ്ജസ്റ്റിസ് കൂട്ടിച്ചേര്ത്തു.
കുറ്റവാളി ആര്, നിരപരാധി ആര് എന്ന് ഇപ്പോള് പറയുന്നില്ല. എന്നാല് സമാധാനപരമായ പ്രതിഷേധങ്ങളോട് യോജിക്കും. പൊതു മുതല് നശിപ്പിക്കുന്നത് അംഗീകരിക്കാനാകില്ല. ഇതില് കോടതികള്ക്ക് കൂടുതലായി ഒന്നും ചെയ്യാനാകില്ല. ഇത് ക്രമസമാധാന പ്രശ്നമാണ്. പോലീസാണ് കൈകാര്യം ചെയ്യേണ്ടത്. വിദ്യാര്ത്ഥികളാണെന്നു കരുതി നിയമം കൈയിലെടുക്കരുത്. ഈ അക്രമങ്ങളാണ് ആദ്യം അവസാനിപ്പിക്കേണ്ടത്. എന്നിട്ട് സ്വമേധയാ കേസെടുക്കാമെന്നും ചീഫ് ജസ്റ്റിസ് കൂട്ടിച്ചേര്ത്തു.
