തിരുവനന്തപുരം: ദേശീയ പൗരത്വ ഭേദഗതി നിയമത്തിനെതിരെ സംസ്ഥാനത്ത് വിവിധ സംഘടനകള് ആഹ്വാനം ചെയ്ത ഹര്ത്താല് തുടങ്ങി. രാവിലെ ആറ് മണി മുതല് വൈകിട്ട് ആറ് മണി വരെയാണ് ഹര്ത്താല്. മുന്കൂര് അനുമതി ഇല്ലാത്തതിനാല് ഹര്ത്താല് നിമയവിരുദ്ധമാണെന്ന് പോലീസ് പ്രഖ്യാപിച്ചിട്ടുണ്ട്.
വെല്ഫയര് പാര്ട്ടി, എസ്ഡിപിഐ, ബിഎസ്പി, ഡിഎച്ച്ആര്എം പോരാട്ടം തുടങ്ങിയ സംഘടനകളാണ് ഇന്നത്തെ ഹര്ത്താലിന് ആഹ്വാനം ചെയ്തിരിക്കുന്നത്. ഹര്ത്താലുമായി ബന്ധപ്പെട്ട് കോഴിക്കോട് രണ്ട് പേരെ അറസ്റ്റ് ചെയ്തു. കടകള് നിര്ബന്ധിപ്പിച്ച് അടപ്പിച്ചതിനെ തുടര്ന്നാണ് അറസ്റ്റ്. കെഎസ്ആര്ടിസി സര്വ്വീസ് നടത്തുന്നുണ്ട്.
അതേസമയം ഹര്ത്താലിനെ തുടര്ന്ന് സ്കൂള് പരീക്ഷകള്ക്ക് മാറ്റമില്ലെന്ന് പൊതുവിദ്യാഭ്യാസ ഡയറക്ടര് അറിയിച്ചു. സര്വകലാശാലകള് നടത്താനിരുന്ന പരീക്ഷകളിലും മാറ്റമില്ല. പിഎസ് സി പരീക്ഷകള്ക്കും മാറ്റമില്ല.
ഹര്ത്താലിന്റെ മറവില് ആക്രമണം നടത്തുന്നവര്ക്കെതിരെ കര്ശന നടപടി സ്വീകരിക്കുമെന്ന് പോലീസ് വ്യക്തമാക്കിയിട്ടുണ്ട്. മുന്കരുതലിന്റെ ഭാഗമായി സംസ്ഥാനത്തിന്റെ പല ഭാഗങ്ങളിലും നേതാക്കളെ പോലീസ് കരുതല് തടങ്കലിലാണ്. എറണാകുളത്ത് നിരവധി നേതാക്കളെ പോലീസ് കസ്റ്റഡിയിലെടുത്തു. ഹര്ത്താല് ദിവസം പൊതു സ്ഥലങ്ങളില് കൂട്ടം കൂടി നില്ക്കാന് അനുവദിക്കില്ല. പൊതുമുതല് നശിപ്പിച്ചാല് കേസെടുക്കും. സമരവുമായി ബന്ധപ്പെട്ട് ഉച്ചഭാഷിണികള് ഉപയോഗിക്കരുതെന്നും പോലീസ് അറിയിച്ചിട്ടുണ്ട്.
ചില സ്ഥലങ്ങളില് ആക്രമണങ്ങള് റിപ്പോര്ട്ട് ചെയ്തിട്ടുണ്ട്. വാളയാറില് തമിഴ്നാട് ബസിനു നേരെ കല്ലേറ്. കഞ്ചിക്കോട് കൊയ്യാമരക്കാട് ദേശീയപാത മേല്പാലത്തില് വച്ചാണ് ബസിനു നേരെ കല്ലേറുണ്ടായത്. ബൈക്കിലെത്തിയവര് എതിര്വശത്തെ റോഡില് നിന്നു കല്ലെറിയുകയായിരുന്നു. ആര്ക്കും പരിക്കില്ല. പാലക്കാട് കെഎസ്ആര്ടിസി ബസ് തടയാനെത്തിയ ഏതാനും പേരെ പോലീസ് കസ്റ്റഡിയിലെടുത്തു.
ഇന്ന് വാഹനങ്ങള് തടയാനോ കടകള് അടപ്പിക്കാനോ സമ്മതിക്കില്ലെന്ന് പൊലീസ് അറിയിച്ചിട്ടുണ്ട്. നാശനഷ്ടമുണ്ടായാല് ഉത്തരവാദിത്തം ഹര്ത്താല് പ്രഖ്യാപിച്ച സംഘടനകളുടെ ജില്ലാ, സംസ്ഥാന നേതാക്കള്ക്കായിരിക്കും. അവരുടെ പേരില് നിയമനടപടിയെടുക്കും. സര്വീസുകള് നടത്തുമെന്ന് കെഎസ്ആര്ടിസി അറിയിച്ചു. ആവശ്യമെങ്കില് പോലീസ് സഹായം തേടും. സര്ക്കാര് ജീവനക്കാര്ക്ക് ആരോഗ്യ കാരണത്താലല്ലാതെ അവധി നല്കില്ല.
