മുംബൈ: വീര സവര്ക്കര് രാജ്യസ്നേഹിയല്ലെന്നാണ് രാഹുല് ഗാന്ധി കരുതുന്നതെങ്കില് കോണ്ഗ്രസുമായി ഇനിയും ശിവസേന സഖ്യം തുടരുന്നതെന്തിനെന്ന് കേന്ദ്രമന്ത്രിയും റിപ്പബ്ലിക്കന് പാര്ട്ടി നേതാവുമായ രാംദാസ് അത്വാലെ ചോദിച്ചു. മാപ്പു പറയാന് ഞാന് രാഹുല് സവര്ക്കറല്ല എന്നു പ്രസ്താവിച്ച് വീര സവര്ക്കറെ രാഹുല് അപമാനിച്ച സംഭവത്തോടു പ്രതികരിക്കുകയായിരുന്നു അദ്ദേഹം.
സവര്ക്കര് വീരനായ രാജ്യസ്നേഹിയാണെന്നാണ് ശിവസേന വിശ്വസിക്കുന്നത്. എന്നാല് കോണ്ഗ്രസ് അങ്ങനെ കരുതുന്നില്ല എന്നാണ് രാഹുലിന്റെ പ്രസ്താവന തെളിയിക്കുന്നത്. ഇനിയും കോണ്ഗ്രസ്സുമായി ശിവസേന സഖ്യം തുടരുന്നത് അവരും സവര്ക്കറെ അപമാനിക്കുന്നതിനു തുല്യമാണ്. കോണ്ഗ്രസ്-ശിവസേന സഖ്യത്തെക്കുറിച്ച് എനിക്ക് സംശയം തോന്നിത്തുടങ്ങിയിരിക്കുന്നു. അതിന് അധികം ആയുസ്സുണ്ടെന്നു തോന്നുന്നില്ല, അത്വാലെ പറഞ്ഞു.
സവര്ക്കര് രാജ്യസ്നേഹിയല്ലെന്നാണ് രാഹുല് കരുതുന്നതെങ്കില് ശിവസേനയെ കോണ്ഗ്രസ് പിന്തുണയ്ക്കുന്നത് എന്തിനെന്ന ചോദ്യവും ഉയരുന്നുണ്ടെന്ന് അത്വാലെ പറഞ്ഞു. കോണ്ഗ്രസ് ഇതെക്കുറിച്ച് അടിയന്തിരമായി ചിന്തിക്കണം. സഖ്യം ഉപേക്ഷിച്ച് മഹാരാഷ്ട്രയില് ബിജെപി-ശിവസേന-ആര്പിഐ സര്ക്കാര് രൂപീകരണത്തിന് ഉദ്ധവ് താക്കറെ ശ്രമിക്കണമെന്നും അത്വാലെ ആവശ്യപ്പെട്ടു.
