തിരുവനന്തപുരം: പൗരത്വ ഭേദഗതി ബില്ലിനെതിരേ ഡല്ഹി ജാമിയ മിലിയ ഇസ്ലാമിയ യൂണിവേഴ്സിറ്റിയിലും അലിഗഡ് മുസ്ലിം സര്വകലാശാലയിലും നടന്ന അക്രമങ്ങളുടെ പേരില് സോഷ്യല് മീഡിയയില് അടക്കം പ്രചരിക്കുന്നത് കലാപത്തിന് ആഹ്വാനം ചെയ്യുന്ന തരത്തിലുള്ള സന്ദേശങ്ങള്. ദല്ഹിയിലെ മാധ്യമപ്രവര്ത്തകരുടെ വാട്സ്ആപ്പ് ഗ്രൂപ്പുകള് കേന്ദ്രീകരിച്ചാണ് കേരളത്തില് കലാപം നടത്താന് ആഹ്വാനം നല്കിയതിന്റെ തെളിവുകള് പുറത്തുവന്നിരുന്നു. വ്യാജവാര്ത്തകള് അടക്കം ഗ്രൂപ്പുകളിലൂടെ പ്രചരിപ്പിച്ച് എല്ലാ മാധ്യമ പ്രവര്ത്തകരെയും തെറ്റിദ്ധരിപ്പിക്കുകയായിരുന്നു. ജാമില മില്ലിയ ഇസ്ലാമിയില് മൂന്ന് വിദ്യാര്ത്ഥികള് പോലീസിന്റെ വെടിയേറ്റു മരിച്ചുവെന്നുള്ളതടക്കമുള്ള വ്യാജവാര്ത്തകള് ഗ്രൂപ്പുകളിലൂടെ പ്രചരിപ്പിച്ചു. ഈ വ്യാജ പ്രചരണം ഏറ്റുപിടിച്ചാണ് മനോരമയും, ഏഷ്യാനെറ്റും, 24 ന്യൂസും, മീഡിയാവണ്ണും അടക്കമുള്ള മാധ്യമങ്ങള് വാര്ത്ത നല്കിയിരുന്നു.
ഇതുകൂടാതെ, ഇന്നലെ എസ്ഡിപിഐ സംഘടിപ്പിച്ചത് മരിക്കാത്ത യുവാവിന്റെ പേരില് മയ്യത്ത് നമസ്കാരം. ജാമിയ മിലിയ സര്വകലാശാലയില് പൊലീസ് വെടിവെയ്പ്പല് രാജസ്ഥാനില് നിന്നുള്ള ഷാക്കീര് എന്ന വിദ്യാര്ത്ഥി കൊല്ലപ്പെട്ടു എന്ന് വ്യാജ പ്രചാരണം നടത്തി ഇന്നലെ രാത്രിയാണ് സെക്രട്ടറിയേറ്റ് നടയില് എസ്ഡിപിഐ നടത്തിയ മയ്യത്ത് നമസ്കാരം നടത്തിയത്. എന്നാല്, ദല്ഹിയില് ഇന്നലെ ഒരു തരത്തിലുള്ള വെടിവയ്പ്പും ഉണ്ടായിട്ടില്ല. വിദ്യാര്ഥി പ്രക്ഷോഭം അക്രമത്തിലേക്ക് വഴിമാറിയപ്പോള് പോലീസ് ടിയര് ഗ്യാസും ഗ്രനേഡും പ്രയോഗിച്ചിരുന്നു. ഇതെല്ലാം ദേശീയ മാധ്യമങ്ങളടക്കം റിപ്പോര്ട്ട് ചെയ്തിരുന്നതുമാണ്. എന്നാല്, വാട്ട്സ്ആപ്പ് വഴി എവിടെ നിന്നോ ലഭിച്ച സന്ദേശത്തിന്റെ പേരിലാണ് രാത്രിയില് പൊടുന്നനേ സെക്രട്ടേറിയറ്റ് നടയില് മതവികാരം ഇളക്കി വിടാനുള്ള ഗൂഢാലോചനയുടെ ഭാഗമായി തീവ്രഇസ്ലാമിക ഗ്രൂപ്പായ എസ്ഡിപിഐ മയ്യത്ത് നമസ്കാരം നടത്തിയത്. കലാപത്തിനുള്ള ആഹ്വാനമാണ് ഇതെന്ന് ബിജെപി ആരോപിച്ചു. പാര്ട്ടി സംസ്ഥാന കമ്മിറ്റി അംഗം സന്ദീപ് വചസ്പതി ഇതു സംബന്ധിച്ച് തിരുവനന്തപുരം സിറ്റി പോലീസ് കമ്മിഷണര് എം.ആര്. അജിത് കുമാറിന് പരാതിയും നല്കി.
