കണ്ണൂര്: ഓരോ രാജ്യത്തിന്റെയും സാംസ്ക്കാരിക അടിത്തറ കാത്തുസംരക്ഷിക്കേണ്ടത് അതത് സമൂഹത്തിന്റെ നിലനില്പ്പിന് അനിവാര്യമാണെന്ന് ആര്എസ്എസ് പ്രാന്തീയ വിദ്യാര്ത്ഥി പ്രമുഖ് വത്സന് തില്ലങ്കേരി പറഞ്ഞു. എന്ജിഒ സംഘ് സംസ്ഥാന സമ്മേളനത്തിന്റെ ഭാഗമായി നടന്ന സാംസ്ക്കാരിക സമ്മേളനത്തില് മുഖ്യപ്രഭാഷണം നടത്തുകയായിരുന്നു അദ്ദേഹം.
ഭാരതത്തിന്റെ പൗരാണികമായ സംസ്ക്കാരം നിലനിര്ത്തേണ്ടത് ഇന്നിന്റെ ആവശ്യമാണ്. ഛിദ്രശക്തികള് രാജ്യത്തെ ഭിന്നിപ്പിക്കാനും സാംസ്ക്കാരികത്തനിമ നശിപ്പിക്കാനും ഗൂഢനീക്കങ്ങള് നടത്തുകയാണ്. പ്രത്യയശാസ്ത്രത്തിന്റെ അടിത്തറയില് ഉറച്ചു നിന്നുകൊണ്ടു വേണം രാഷ്ട്രസ്നേഹം ഉള്ക്കൊണ്ടുകൊണ്ട് പ്രവര്ത്തിക്കുന്ന സംഘടനാ പ്രവര്ത്തകര് മുന്നോട്ട് പോകേണ്ടത്. വ്യക്തിക്ക് ആഭരണം അലങ്കാരമാണെങ്കില് സംസ്ക്കാരമാണ് സമൂഹത്തിന്റെ ആഭരണമായി വര്ത്തിക്കുന്നത്. മൂല്യബോധമുളള സമൂഹമാണ് നാടിനാവശ്യം. മൂല്യബോധത്തിന്റെ സങ്കരമാണ് സംസ്ക്കാരം. മഹത്തായ പാരമ്പര്യമാണ് ഭാരതത്തിനുളളത്. സംസ്ക്കാരത്തെ, പൂര്വ്വീക മഹത്വങ്ങളെ കാത്തുസംരക്ഷിക്കേണ്ടത് നാം ഒരോരുത്തരുടേയും കടമയാണ്.
ഭാരതീയ സംസ്കൃതിയുടെ അടിവേര് ഹിന്ദുത്വമാണ്. അതില്ലാതെ പോയാല് ഭാരതം നശിക്കും. നാടിന്റെ ഉള്ക്കാമ്പായ ഹിന്ദുത്വം നശിച്ചാല് രാഷ്ട്രം ജഡമാവും. അതിനാല് രാഷ്ട്രത്തിന്റെ സംസ്ക്കാരം നിലനിര്ത്താന് എല്ലാവരും പ്രവര്ത്തിക്കണം. സമൂഹവുമായി വളരെ അടുത്ത ബന്ധപ്പെടുന്നവരെന്ന നിലയില് സര്ക്കാര് ജീവനക്കാര്ക്ക് ഇക്കാര്യത്തില് വലിയ കടമയാണ് നിര്വ്വഹിക്കാനുളളതെന്നും അദ്ദേഹം പറഞ്ഞു. പൗരത്വ ഭേദഗതി ബില്ലിന്റെ പേരില് സമൂഹത്തില് വര്ഗ്ഗീയ വിഷം പരത്താന് ഒരു വിഭാഗം ശ്രമിക്കുകയാണെന്നും എന്നാല് രാജ്യത്തിന്റെ സുരക്ഷയ്ക്കായാണ് ഇത്തരം നിയമനിര്മ്മാണങ്ങള് നടത്തുന്നതെന്നും അദ്ദേഹം ചൂണ്ടിക്കാട്ടി.
