കൊച്ചി: വരാപ്പുഴ ശ്രീജിത്തിന്റെ കസ്റ്റഡി മരണക്കേസില് പോലീസുകാര്ക്കെതിരെ ക്രൈംബ്രാഞ്ചിന്റെ കുറ്റപത്രം. പോലീസ് ബോധപൂര്വം നിയമം ലംഘിച്ചതായും പോലീസുകാര്ക്കെതിരെ നേരിട്ടുള്ള തെളിവുകളുണ്ടെന്നും ശ്രീജിത്തിനെ കള്ളക്കേസില് കുടുക്കി വീട്ടിലും വഴിയിലും ജീപ്പിലും സ്റ്റേഷനിലും വച്ച് ക്രൂരമായി മര്ദിച്ചെന്നും കുറ്റപത്രത്തില് പറയുന്നു.
മുന് ആലുവ റൂറല് എസ്പിയായിരുന്ന എ.വി. ജോര്ജിന്റെ ടൈഗര് ഫോഴ്സില് അംഗങ്ങളായിരുന്ന പി.പി. സന്തോഷ് കുമാര്, റിബിന് രാജ്, എം.എസ്. സുമേഷ്, വരാപ്പുഴ എസ്ഐ ആയിരുന്ന ദീപക്ക് എന്നിവര്ക്കെതിരെയാണ് കുറ്റപത്രത്തില് ശക്തമായ വിമര്ശനമുള്ളത്. നാലുപേരും അറിഞ്ഞുകൊണ്ട് നിയമം ലംഘിക്കുകയായിരുന്നെന്നും പറയുന്നുണ്ട്.
നാലാം പ്രതി ദീപക്കാണ് പോലീസ് സ്റ്റേഷനില് വച്ച് മര്ദിച്ചത്. കസ്റ്റഡിയിലെടുത്തതായി സ്റ്റേഷനില് രേഖപ്പെടുത്തിയില്ല. ഇത് ഗുരുതരമായ കുറ്റമാണെന്നും കുറ്റപത്രത്തില് പറയുന്നു. ഒമ്പതു പ്രതികളുള്ള കേസില് എ.വി. ജോര്ജ് ഉള്പ്പെടെ കേസില് ആകെ 175 സാക്ഷികളുണ്ട്.
വരാപ്പുഴ സ്വദേശി വാസുദേവന്റെ വീടാക്രമിച്ചുവെന്ന പരാതിയില് 2018 ഏപ്രില് ആറിന് രാത്രിയാണ് ആലുവ റൂറല് എസ്പി യുടെ റൂറല് ടൈഗര് ഫോഴ്സ് ശ്രീജിത്തിനെ കസ്റ്റഡിയിലെടുക്കുന്നത്. തുടര്ന്ന് മര്ദിച്ചു കൊലപ്പെടുത്തിയെന്നാണ് കേസ്.
