കോട്ടയം: ഇരുസഭകളും പാസാക്കി രാഷ്‌ട്രപതി ഒപ്പുവച്ച് നിയമമായ പൗരത്വ നിയമ ഭേദഗതി ബില്‍ സംസ്ഥാനത്ത് നടപ്പാക്കില്ലെന്ന മുഖ്യമന്ത്രിയുടെ പ്രസ്താവന ഭരണഘനാ വിരുദ്ധവും സത്യപ്രതിജ്ഞാ ലംഘനവുമാണെന്ന് ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ കോട്ടയം പ്രസ്‌ക്ലബില്‍ മുഖാമുഖം പരിപാടിയില്‍ പറഞ്ഞു.
മുഖ്യമന്ത്രിയുടെ പ്രസ്താവന കലാപത്തിനുള്ള ആഹ്വാനമാണ്. വിധ്വംസക ശക്തികള്‍ക്ക് ഊര്‍ജം പകരുന്നതാണ്. നിയമം പാലിക്കാന്‍ എല്ലാ സംസ്ഥാനങ്ങള്‍ക്കും ഉത്തരവാദിത്വമുണ്ട്. കേരളത്തെ നേരിട്ട് ബാധിക്കാത്ത കാര്യത്തിലാണ് മുഖ്യമന്ത്രി തെറ്റിദ്ധാരണ പരത്തുന്നത്. പൗരത്വം നല്‍കുന്നത് കേന്ദ്രമാണ്. അഭയാര്‍ത്ഥികള്‍ക്ക് പൗരത്വം നല്‍കുന്നതില്‍ മുഖ്യമന്ത്രിക്ക് എന്തിനാണ് വേവലാതി. കേരളം വിധ്വംസക ശക്തികളുടെ താവളമാണ്. മാവോയിസ്റ്റുകളും ഇസ്ലാമിക ഭീകരരും കൈകോര്‍ക്കുന്നതായി മുഖ്യമന്ത്രി തന്നെ സമ്മതിച്ചതാണ്. മാത്രമല്ല, സിപിഎം പാര്‍ട്ടി കോണ്‍ഗ്രസില്‍ ബംഗാളിലെ ബംഗ്ലാദേശ് അഭയാര്‍ത്ഥികള്‍ക്ക് പൗരത്വം നല്‍കണമെന്നും അതിനായി പൗരത്വ നിയമം ഭേദഗതി ചെയ്യണമെന്നും പ്രമേയം പാസാക്കിയിരുന്നു. ഇക്കാര്യം ആവശ്യപ്പെട്ട് അന്നത്തെ പാര്‍ട്ടി സെക്രട്ടറി പ്രകാശ് കാരാട്ട് പ്രധാനമന്ത്രി മന്‍മോഹന്‍ സിങ്ങിന് കത്തെഴുതിയതായും സുരേന്ദ്രന്‍ പറഞ്ഞു.
മുഖ്യമന്ത്രിയും പ്രതിപക്ഷവും ചില മാധ്യമങ്ങളും ചേര്‍ന്ന് പൗരത്വ ഭേദഗതി ബില്‍ മുസ്ലിം മതത്തിനെതിരെന്ന് പ്രചരിപ്പിക്കുന്നു. പിണറായിയുടേത് വിനാശകാലേ വിപരീത ബുദ്ധിയാണ്. നിയമ സംവിധാനത്തെക്കുറിച്ച് അദ്ദേഹത്തിന് അറിവില്ലെന്ന് വേണം ധരിക്കാന്‍. ശബരിമലയില്‍ സര്‍ക്കാര്‍ നിലപാട് സ്വാഗതാര്‍ഹമാണ്. സര്‍ക്കാര്‍ നയം മാറ്റിയാല്‍ ബിജെപിയും നയം മാറ്റുമെന്നും അദ്ദേഹം പറഞ്ഞു.
