കൊച്ചി: സംസ്ഥാനത്തെ ചില സിനിമാ ലൊക്കേഷനുകളില് എക്സൈസ് റെയ്ഡ് നടത്തി. സിനിമാ ലൊക്കേഷനുകളില് വ്യാപക ലഹരി മരുന്നുപയോഗം ഉണ്ടെന്ന നിര്മാതാക്കളുടെ സംഘടന പരസ്യപ്രസ്താവന നടത്തിയതിനെ തുടര്ന്നായിരുന്നു പരിശോധന. എന്നാല് പരിശോധനയില് ഒന്നും ലഭിച്ചില്ലെന്നും വരും ദിവസങ്ങളിലും പരിശോധന തുടരുമെന്നും എക്സൈസ് അസി. കമ്മീഷണര് ദാം ക്രിസ്റ്റി ഡാനിയേല് പറഞ്ഞു.
ഏതൊക്കെ ലൊക്കേഷനുകളിലാണ് പരിശോധന നടത്തിയതെന്ന് എക്സൈസ് ഇതുവരെയും വ്യക്തമാക്കിയിട്ടില്ല. പരിശോധനയില് ഒരുവിഭാഗത്തെയും മാറ്റിനിര്ത്തിയിട്ടില്ലെന്നും നിരോധിച്ച മയക്കുമരുന്നുകള് ഉപയോഗിക്കുന്നതായി കണ്ടെത്തിയാല് കര്ശന നടപടിയെടുക്കുമെന്ന് അസി.കമ്മീഷണര് വ്യക്തമാക്കി.
സിനിമാ താരം ഷെയ്ന് നിഗവുമായി ബന്ധപ്പെട്ട വിവാദത്തില് താരത്തെ വിലക്കിയതിനൊപ്പം പുതുതലമുറ താരങ്ങള്ക്ക് എതിരെ ഗുരുതരമായ ആരോപണങ്ങളുമായി പ്രൊഡ്യൂസേഴ്സ് അസോസിയേഷന് രംഗത്തു വന്നിരുന്നു. ലഹരിവസ്തുക്കള് പലപ്പോഴും ലൊക്കേഷനുകളിലേക്ക് എത്തുന്നുവെന്നും വിശദമായ അന്വേഷണത്തിനായി ലൊക്കേഷനുകളില് പോലീസ് പരിശോധന നടത്തണമെന്നും പ്രൊഡ്യൂസേഴ്സ് അസോസിയേഷന് ആവശ്യപ്പെട്ടിരുന്നു.ഇതിന് പിന്നാലെയാണ് എക്സൈസ് പരിശോധന ആരംഭിച്ചത്.
