തിരുവനന്തപുരം: ശബരിമല മാസ്റ്റര് പ്ലാനിന്റെ ഭാഗമായി മാളികപ്പുറവും ചന്ദ്രാനന്ദന് റോഡും തമ്മില് ബന്ധിപ്പിച്ച് നിര്മിക്കുന്ന മേല്പ്പാലത്തിന്റെ നിര്മാണം കേരള ഇലക്ട്രിക്കല് ആന്ഡ് അലൈഡ് എഞ്ചിനീയറിങ് കമ്പനി ലിമിറ്റഡ് (കെല്) നിര്വഹിക്കും. പദ്ധതിയുടെ അന്തിമ രൂപം തിരുവിതാംകൂര് ദേവസ്വം ബോര്ഡും ശബരിമല മാസ്റ്റര്പ്ലാന് ഉന്നതാധികാര സമിതിയും അംഗീകരിച്ചു.
ഇരുപത്തിയൊന്ന് കോടി രൂപ ചെലവു പ്രതീക്ഷിക്കുന്ന പാലം 18 മാസത്തിനുളളില് പൂര്ത്തിയാക്കാനാണ് തീരുമാനം. 375 മീറ്റര് നീളവും 6.4 മീറ്റര് വീതിയും മൂന്ന് മീറ്റര് ഉയരവുമാണ് പാലത്തിനുണ്ടാവുക.
തീര്ത്ഥാടന കാലത്തെ തിരക്ക് നിയന്ത്രിക്കാനാണ് പുതിയ മേല്പ്പാലം. ദര്ശനം കഴിഞ്ഞ് മടങ്ങുന്നവരെയാണ് ഇതിലൂടെ കടത്തിവിടുക. പരിസ്ഥിതി സൗഹൃദമായാണ് പാലം രൂപകല്പ്പന ചെയ്തിട്ടുള്ളത്. ദിവസം മൂന്നു ലക്ഷത്തോളം ഭക്തര്ക്ക് സഞ്ചരിക്കാന് സാധിക്കുന്ന പാലത്തില് അടിയന്തരഘട്ടങ്ങളില് ഉപയോഗിക്കുന്നതിന് സുരക്ഷാ ഇടനാഴികളുമുണ്ടാകും. നിബിഡ വനത്തിലൂടെ നിര്മിക്കുന്ന പാലം ആനത്താരയ്ക്ക് തടസ്സമാകാത്ത രീതിയിലാണ് സജ്ജമാക്കുന്നത്.
