കാളപെറ്റു എന്ന് കേള്‍ക്കുമ്പോഴേ കയറെടുക്കുന്നവരാണ് ഒരുകൂട്ടം മാധ്യമപ്രവര്‍ത്തകരും സോഷ്യല്‍ മീഡിയയില്‍ വാസ്തവം മനസ്സിലാക്കാതെ പ്രതികരിക്കുന്നവരും. വാരാണസി ബനാറസ് ഹിന്ദു സര്‍വ്വകലാശാലയില്‍ സംസ്‌കൃത വിഭാഗമായ സംസ്‌കൃത വിദ്യാ ധര്‍മ്മ വിഗ്യാനില്‍ സാഹിത്യ വിഭാഗം അസിസ്റ്റന്റ് പ്രൊഫസറായി മുസ്ലിമായ ഡോ. ഫിറോസ് ഖാനെ നിയമിച്ചതിനെ തുടര്‍ന്നുണ്ടായ പ്രശ്‌നങ്ങള്‍ പര്‍വ്വതീകരിക്കുകയാണ് ഈ വിഭാഗം. മുസ്ലിം ആയ ഒരാള്‍ സംസ്‌കൃത അധ്യാപകന്‍ ആയതിനെതിരെ ബനാറസ് ഹിന്ദു സര്‍വ്വകലാശാലയിലെ വിദ്യാര്‍ത്ഥികള്‍ അവിടെ കോലാഹലം ഉണ്ടാക്കി എന്നാണ് മാധ്യമ റിപ്പോര്‍ട്ട്. പക്ഷേ, വസ്തുതകള്‍ അവിടെ വളച്ചൊടിക്കപ്പെട്ടു. രാജ്യത്തിന്റെ മതനിരപേക്ഷതയ്‌ക്കുമേല്‍ വിദ്യാര്‍ത്ഥികളും അവരെ പിന്തുണയ്‌ക്കുന്നവരും കളങ്കം ചാര്‍ത്തി എന്ന് വരുത്തിത്തീര്‍ക്കാന്‍ അവര്‍ ആവുന്നതെല്ലാം ചെയ്തു. എന്നാല്‍ ബനാറസ് ഹിന്ദു സര്‍വ്വകലാശാല സ്ഥാപിതമായതിനുപിന്നിലുള്ള ഉദ്ദേശ്യം എന്തെന്ന് മനസ്സിലാക്കിയിട്ടുള്ളവര്‍ അതൊന്നും മുഖവിലയ്‌ക്കെടുത്തില്ല. അക്കാര്യമെല്ലാം സര്‍വ്വകലാശാലയുടെ വെബ് സൈറ്റില്‍ വളരെ വ്യക്തമായി പരാമര്‍ശിച്ചിട്ടുമുണ്ട്. ഹിന്ദു ശാസ്ത്രങ്ങളേയും സംസ്‌കൃത ഭാഷയേയും പ്രോത്സാഹിപ്പിക്കുകയും പരിപോഷിപ്പിക്കുകയുമാണ് ലക്ഷ്യമെന്ന് അതില്‍ വ്യക്തമാക്കിയിട്ടുമുണ്ട്. പൗരാണിക ഭാരതത്തിന്റെ മഹത്തായ സംസ്‌കാരവും ദര്‍ശനവും പരിപാലിക്കുകയും ജനകീയമാക്കുകയും ചെയ്യുക, അത് ഹിന്ദു സമൂഹത്തിന് വേണ്ടി പ്രയോജനപ്പെടുത്തുക എന്നീ ധര്‍മ്മവും ഈ സര്‍വ്വകലാശാല നിറവേറ്റിവരുന്നു.
സംസ്‌കൃത ഭാഷാ പഠനത്തിനായി ആര്‍ട്‌സ് അധ്യയന വിഭാഗവും ഹിന്ദു ശാസ്ത്ര പഠനത്തിനായി സംസ്‌കൃത വിദ്യാധര്‍മ്മ വിഗ്യാന്‍ സാംഖ്യ അധ്യയന (എസ്‌വിഡിവിഎസ്) വിഭാഗവുമാണുള്ളത്. വേദം, വ്യാകരണം, സാഹിത്യം, ജ്യോതിഷം, ധര്‍മ്മശാസ്ത്രം, ജൈന-ബുദ്ധ ദര്‍ശനം, വേദിക് ദര്‍ശനം എന്നിങ്ങനെ എട്ട് ഡിപ്പാര്‍ട്ടുമെന്റുകളാണ് എസ്‌വിഡിവിഎസിനുള്ളത്. ഇതില്‍ ബിരുദ, ബിരുദാനന്തര, പിഎച്ച്ഡി കോഴ്‌സുകള്‍ നടക്കുന്നു. സംസ്‌കൃതത്തിന് മാത്രമല്ല ഭോജ്പുരി തുടങ്ങിയ ഇന്ത്യന്‍ ഭാഷകള്‍ക്കും മറ്റ് വിദേശ ഭാഷകള്‍ക്കും അര്‍ഹമായ പ്രാധാന്യം നല്‍കുന്നു. സംസ്‌കൃത ഭാഷയെ സ്‌നേഹിക്കുന്നവരും മതപരമായ ആചാരാനുഷ്ഠാനങ്ങള്‍ പഠിക്കുന്നതിനും പരിശീലിക്കുന്നതിനും താല്‍പര്യമുള്ളവരുമാണ് സംസ്‌കൃതം പഠിക്കാനെത്തുന്നത്.
സംസ്‌കൃതം ഒരു ഭാഷ എന്ന നിലയില്‍ മനസ്സിലാക്കുക, വേദം, വ്യാകരണം, സാഹിത്യം, ജ്യോതിഷം, ധര്‍മ്മശാസ്ത്രം തുടങ്ങിയ വിജ്ഞാനശാഖകള്‍ പഠിക്കുന്നതിനൊപ്പം പ്രായോഗികമാക്കുക തുടങ്ങിയ ലക്ഷ്യങ്ങള്‍ മുന്‍നിര്‍ത്തിയാണ് മദന്‍ മോഹന്‍ മാളവ്യ 1916 ല്‍ ബനാറസ് ഹിന്ദു സര്‍വ്വകലാശാല സ്ഥാപിച്ചത്.
സംസ്‌കൃത വിദ്യാധര്‍മ്മ വിഗ്യാന്‍ അധ്യയന വിഭാഗത്തിന്റെ പ്രവര്‍ത്തനങ്ങള്‍ക്ക് സവിശേഷ പ്രാധാന്യമാണ് സര്‍വ്വകലാശാല നല്‍കുന്നതും. ഹിന്ദു ശാസ്ത്രങ്ങളുടെ സാഹിത്യം മനസ്സിലാക്കുക, പ്രാവര്‍ത്തികമാക്കുക എന്നീ ലക്ഷ്യങ്ങളോടെയുള്ള പഠനമാണ് ഇതിന്റെ കീഴില്‍ നടക്കുന്നത്. ഹൈന്ദവ ദര്‍ശനങ്ങളും സംസ്‌കാരവും അതില്‍ അന്തര്‍ലീനമായിരിക്കുന്ന ധര്‍മ്മചിന്തയും പരിപാലിക്കുക എന്നതാണ് അതുകൊണ്ട് ലക്ഷ്യമാക്കുന്നത്. സംസ്‌കൃത ഗ്രന്ഥങ്ങളെ വിമര്‍ശനാത്മകമായി വിലയിരുത്തുകയല്ല, മറിച്ച് ധര്‍മ്മനിഷ്ഠയോടെ മതാചാരങ്ങളും അനുഷ്ഠാനങ്ങളും പിന്തുടരുകയെന്നതാണ്. അതുകൊണ്ടുതന്നെ ഇക്കാര്യങ്ങള്‍ ആചരിക്കുന്ന ഒരാളാവണം പഠിപ്പിക്കുന്ന അധ്യാപകനും. അല്ലാത്തപക്ഷം അധ്യയനം അപൂര്‍ണ്ണമാവും. നീന്തല്‍ വശമില്ലാത്ത ഒരാള്‍, അതിന്റെ നിയമാവലി മാത്രം പഠിച്ച് കുട്ടികളെ പരിശീലിപ്പിക്കുന്നതുപോലെയായിരിക്കും ആ പഠനം.
ഇന്ത്യ സ്വതന്ത്രയാകുന്നതിനും മുമ്പേ സ്ഥാപിതമായ ബനാറസ് ഹിന്ദു സര്‍വ്വകലാശാല, ഹിന്ദു ആചാരങ്ങള്‍ തനിമയോടെ പിന്തുടരുന്നവരെ വാര്‍ത്തെടുക്കുന്നതിനുള്ള പരിശീലനസ്ഥലമാണ്. മതത്തിന്റേയും മതനിരപേക്ഷതയുടേയും പേരില്‍ കാലങ്ങളായുള്ള അധ്യയന രീതിയെ വിമര്‍ശിക്കുന്നതിന് മുമ്പ് ഈ സര്‍വ്വകലാശാലയുടെ സ്ഥാപിത ഉദ്ദേശ്യം എന്തെന്ന് മനസ്സിലാകുന്നത് നല്ലതായിരിക്കും.
