തിരുവനന്തപുരം: വീട്ടില് വീട്ടിലേക്ക് അതിക്രമിച്ചു കയറുകയും സദാചാരപ്പൊലീസ് ചമയുകയും ചെയ്തുവെന്നാരോപിച്ച് സഹപ്രവര്ത്തകയായ മാധ്യമപ്രവര്ത്തക നല്കിയ പരാതിയില് തിരുവനന്തപുരം പ്രസ്ക്ലബ് സെക്രട്ടറി എം.രാധാകൃഷ്ണന് അറസ്റ്റില്. ഇന്നു വൈകിട്ട് പ്രസ്ക്ലബ് ഓഫിസിലെത്തി പേട്ട പോലീസാണു രാധാകൃഷ്ണനെ കസ്റ്റഡിയില് എടുത്തത്. സഹപ്രവര്ത്തകയെയും കുടുംബത്തെയും രാത്രിയില് വീട്ടില് അതിക്രമിച്ച് കയറി അപമാനിച്ച തിരുവനന്തപുരം പ്രസ് ക്ലബ് സെക്രട്ടറി എം രാധാകൃഷ്ണനെ പുറത്താക്കണമെന്നാവശ്യപ്പെട്ട് വനിതാ മാധ്യമ പ്രവര്ത്തകര് രാവിലെ പ്രസ്ക്ലബില് പ്രതിഷേധം സംഘടിപ്പിച്ചിരുന്നു. ഇന്നു നടന്ന മാനെജിങ് കമ്മിറ്റി യോഗത്തില് പരിഹാരം കാണമെന്ന് പ്രസിഡന്റ് അറിയിച്ചതിനെ തുടര്ന്നാണ് പ്രതിഷേധം അവസാനിപ്പിച്ചത്. എന്നാല്, മാനെജിങ് കമ്മിറ്റി യോഗത്തില് അഞ്ചംഗ അന്വേഷണ കമ്മിഷനെ നിയോഗിക്കാന് മാത്രമാണ് തീരുമാനിച്ചത്. രാധാകൃഷ്ണനെ ഭാരവാഹിത്വത്തില് നിന്നു മാറ്റിയില്ലെന്നറിഞ്ഞോടെ വൈകിട്ട് വീണ്ടും വനിത മാധ്യമപ്രവര്ത്തകര് പ്രസ്ക്ലബ് ഓഫിസ് ഉപരോധിച്ചു. ഈ സമയം സെക്രട്ടറിയും ഓഫിസില് ഉണ്ടായിരുന്നു. പ്രതിഷേധം കനത്തതോടെയാണു മൂന്നു ദിവസം മുന്പ് ചുമത്തിയ ജാമ്യമില്ല വകുപ്പ് പ്രകാരം പേട്ട പോലീസ് സെക്രട്ടറിയെ അറസ്റ്റ് ചെയ്തത്.
ശനിയാഴ്ച രാത്രിയാണ് സംഭവം. സഹപ്രവര്ത്തകനും കുടുംബ സുഹൃത്തുമായ വ്യക്തി വീട്ടില് വന്നതിന്റെ പേരിലാണ് പ്രസ്ക്ലബ് സെക്രട്ടറിയായ എം.രാധാകൃഷ്ണനും മൂന്ന് പേരും സദാചാരപ്പൊലീസിങ് നടത്തിയതെന്ന് പരാതി ഉയര്ന്നത്. പത്രപ്രവര്ത്തക യൂണിയന് തിരഞ്ഞെടുപ്പില് ഉണ്ടായ അഭിപ്രായ വ്യത്യാസമാണ് ഇതിന് കാരണമെന്നും പരാതിയില് പറയുന്നു. യുവതിയുടെ വീട്ടില് വന്ന സുഹൃത്ത് വീട്ടില് നിന്ന് ഇറങ്ങിയതും പ്രസ്ക്ലബ് സെക്രട്ടറിയും കുറച്ചാളുകളും വീട്ടിലേക്ക് കയറി വന്നുവെന്നും പുരുഷ സുഹൃത്ത് വരുന്നതിനെ ചോദ്യംചെയ്തുവെന്നും പരാതിക്കാരി പോലീസിനു മൊഴി നല്കിയിരുന്നു. മക്കളെയും തന്നെയും ബലപ്രയോഗത്തിലൂടെ മുറിയിലേക്ക് കയറ്റിയെന്നും വീട്ടില് വന്ന സുഹൃത്തിനെ തല്ലിയെന്നും പരാതിയിലുണ്ട്. ഗൂഢാലോചനയ്ക്കൊടുവിലാണ് ഈ ആക്രമണമെന്നും പരാതിയില് വ്യക്തമാക്കുന്നു. രാധാകൃഷ്ണനെതിരേ വനിതകമ്മിഷനും സ്വമേധയാ കേസെടുത്തിരുന്നു.
