തിരുവനന്തപുരം: ശബരിമല സന്നിധാനത്ത് നിയോഗിച്ചിരിക്കുന്ന ദേവസ്വം താത്കാലിക ജീവനക്കാരില് ഒരു വിഭാഗം ക്രിമിനലുകളെന്ന് പോലീസ് റിപ്പോര്ട്ട്. ഇതുസംബന്ധിച്ച വിശദമായ റിപ്പോര്ട്ട് പോലീസ് മേധാവി ലോക്നാഥ് ബെഹ്റക്ക് കൈമാറി. ശബരിമലയിലേക്ക് ദേവസ്വം ബോര്ഡ് താത്കാലികമായി നിയമിച്ച ഉദ്യോഗസ്ഥരില് ക്രിമിനലുകള് കടന്നു കൂടിയിട്ടുണ്ടെന്ന് തെളിഞ്ഞെന്നാണ് പോലീസ് വ്യക്തമാക്കുന്നത്. എന്നാല്, ഇതിനെതിരേ ദേവസ്വം ബോര്ഡ് പ്രസിഡന്റ് തന്നെ രംഗത്തെത്തിയതോടെ ഇരുവിഭാഗം തമ്മിലുള്ള തര്ക്കം രൂക്ഷമാവുകയാണ്. പോലീസുകാരാണ് പ്രശ്നക്കാരെന്നും സന്നിധാനത്തെ വിഷയങ്ങളില് പോലീസ് അമിതമായി ഇടപെടുന്നെന്നും ദേവസ്വം ഉദ്യോഗസ്ഥര് വാദിക്കുന്നു. ദേവസ്വം ഉദ്യോഗസ്ഥരില് ക്രിനിമലുകള് ഉണ്ടെന്ന പോലീസ് റിപ്പോര്ട്ട് വാസ്തവത്തിനു നിരക്കുന്നതല്ലെന്ന് ബോര്ഡ് പ്രസിഡന്റ് എന്.വാസു വ്യക്തമാക്കി. സന്നിധാനത്തടക്കം ദേവസ്വം ജീവനക്കാരെ പോലീസ് നിയന്ത്രിക്കേണ്ടതില്ലെന്നും വാസു.
ശബരിമലയില് ദര്ശനത്തിനെത്തിയ ഭക്തനെ ദേവസ്വം സെക്യൂരിറ്റി കൈയേറ്റം ചെയ്തെന്ന റിപ്പോര്ട്ട് പുറത്തുവന്നതിനു പിന്നാലെയാണു ഇരുവിഭാഗവും തമ്മിലുള്ള തര്ക്കം രൂക്ഷമായത്. ഇതേ തുടര്ന്ന് പൊലീസ് നടത്തിയ അന്വേഷണത്തിലാണ് ക്രിമിനല് പശ്ചാത്തലമുള്ള ആളുകള് താത്കാലിക നിയമനം തേടി ദേവസ്വം ഉദ്യോഗസ്ഥരായി ശബരിമലയില് ജോലി നോക്കുന്നതായി കണ്ടെത്തിയത്. എന്നാല് പൊലീസ് റിപ്പോര്ട്ടില് പറയുന്നത് കളവാണെന്നും, സോപാനത്ത് ജോലി നോക്കിയിരുന്ന പൊലീസ് ഉദ്യോഗസ്ഥന്റെ സഹോദരന് ദര്ശനത്തിനെത്തിയപ്പോള് ക്യൂ പാലിക്കാതെ സോപാനത്തിന് മുന്നില് കൂടുതല് സമയം നില്ക്കുന്നത് ശ്രദ്ധയില്പെട്ട ദേവസ്വം സെക്യൂരിറ്റി ഉദ്യോഗസ്ഥന് തൊഴുതുമാറാന് ആവശ്യപ്പെടുകയായിരുന്നു എന്നുമാണ് ദേവസ്വം ഉദ്യോഗസ്ഥരുടെ വാദാം. പൊലീസ് ഉദ്യോഗസ്ഥന്റെ സഹോദരനാണന്ന് അറിയാതെ മാറാന് ആവശ്യപ്പെട്ട ദേവസ്വം ജീവനക്കാരനെ പൊലീസുകാര് സ്റ്റേഷനിലേക്ക് കൊണ്ടുപോയി കേസെടുക്കുമെന്ന് ഭീഷണിപ്പെടുത്തിയെന്നാണ് ദേവസ്വം ഉദ്യോഗസ്ഥര് ആരോപിക്കുന്നത്.
