ഇന്ത്യന്‍ നാവികസേന ഇന്ന് 48-ാം ദേശീയ നാവിക ദിനം ആഘോഷിക്കുകയാണ്. ലോകത്തിലെ ഏഴാമത്തെ നാവിക ശക്തിയും ഏറ്റവും മികച്ച സായുധ സേനയുമായ നാവിക സേനയുടേയും രാജ്യത്തിന്റേയും യശസ് ഒരുപോലെ ഉയര്‍ത്തിയ സൂപ്പര്‍ഹീറോകളെയും അവയുടെ രസകരമായ വസ്തുതകളേയും ഈ സുപ്രധാന ദിനത്തില്‍ പരിചയപ്പെടാം.
1971 ലെ ഇന്തോ-പാക് യുദ്ധത്തില്‍ രാജ്യത്തിന് വിജയം നേടിതന്ന നാവികസേനയുടെ കരുത്തിനേയും വീരതയേയും അനുസ്മരിച്ചാണ് ഈ ദിനം ആഘോഷിക്കുന്നത്. ഇന്ത്യന്‍ നാവികസേന കറാച്ചിയിലെ പാകിസ്ഥാന്‍ നാവിക ആസ്ഥാനത്തിന് നേരെ നടത്തിയ ഓപ്പറേഷന്‍ ട്രൈഡന്റ് വിജയാഘോഷം കൂടിയാണ് ഈ ദിനം.
തീരദേശ പരിപാലനവും സമുദ്രാതിര്‍ത്തി സംരക്ഷണവുമുള്‍പ്പെടെ വിശാലമായ നീലിമയില്‍ രാജ്യത്തിനായി കാവല്‍ നിന്ന് ദിനം പ്രതി നമ്മളില്‍ അഭിമാനാമുയര്‍ത്തുന്ന് സൂപ്പര്‍ഹീറോകളെക്കുറിച്ചുള്ള കൗതുകമുണര്‍ത്തുന്ന 12 വസ്തുതകള്‍ ചുവടെ.
1. റോയല്‍ ഇന്ത്യന്‍ നേവി എന്ന പേരില്‍ 1612ല്‍ സ്ഥാപിതമായ സായുധ സേന സ്വാതന്ത്ര്യലബ്ധിക്കുശേഷം 1950 ജനുവരി 26 ന് ഇന്ത്യന്‍ നേവി എന്ന് പേര് മാറ്റുകയായിരുന്നു.
2. ഇന്ത്യന്‍ നാവികസേനയുടെ ആദ്യത്തെ സ്വതന്ത്ര ദൗത്യം 1961ലെ ഗോവന്‍ വിമോചന സമയത്ത് പോര്‍ച്ചുഗീസ് നാവികസേനയ്‌ക്കെതിരെയായിരുന്നു.
3. രണ്ടാം ലോക യുദ്ധത്തില്‍ ഇന്ത്യയുടെ നാവിക സേന പ്രധാന പങ്കുവഹിച്ചിരുന്നു. പോര്‍മുഖത്തെ പ്രവര്‍ത്തനങ്ങള്‍ക്കപ്പുറം ബ്രിട്ടണിലെക്ക് അസംസ്‌കൃത വസ്തുക്കളും മറ്റും എത്തിക്കുന്നതിന് നാവിക സേനയും വ്യാപാര കപ്പലുകളും നിര്‍ണായക പങ്കുവഹിച്ചു.
4. ഛത്രപതി ശിവജി മഹാരാജിനെയാണ് ഇന്ത്യന്‍ നാവികസേനയുടെ പിതാവായി കണക്കാക്കപ്പെടുന്നത്. കടല്‍ വ്യാപാരം സംരക്ഷിക്കുന്നതിനായി കൊങ്കണ്‍, ഗോവ തീരങ്ങളില്‍ ശക്തമായ നാവിക സാന്നിധ്യം സ്ഥാപിച്ചതിനാലാണ് അദ്ദേഹത്തെ സേന ബഹുമാനിക്കുന്നത്.
5. രണ്ടാം ലോക മഹായുദ്ധത്തിനുശേഷം നടന്ന ഏറ്റവും വലിയ നാവിക പോരാട്ടങ്ങളിലൊന്നാണ് ഇന്ത്യന്‍ നാവികസേന 1971ല്‍ നടത്തിയത്. അക്കാലത്തെ തികച്ചും നൂതന വിദ്യയായ കപ്പല്‍ വിരുദ്ധ ക്രൂസ് മിസൈലുകള്‍ ഉപയോഗിച്ചാണ് പാക്കിസ്ഥാന്‍ ഓയില്‍ ടാങ്ക് ഫാമുകള്‍ നവിക സേന നശിപ്പിച്ചത്.
6. ലോകത്തിലെ മികച്ച പത്ത് നാവിക സേനകളില്‍ ഇന്ത്യന്‍ നാവികസേനയും ഉള്‍പ്പെടുന്നു. 2015ലെ കണക്കനുസരിച്ച് ഇന്ത്യന്‍ നാവികസേനയില്‍ 58,350 ഉദ്യോഗസ്ഥര്‍, രണ്ട് വിമാനവാഹിനിക്കപ്പലുകള്‍, ഒരു ഉഭയകക്ഷി ഗതാഗത ഡോക്ക്, ഒമ്പത് ലാന്‍ഡിംഗ് കപ്പല്‍ ടാങ്കുകള്‍, 10 ഡിസ്‌ട്രോയറുകള്‍, 15 ഫ്രിഗേറ്റുകള്‍, ഒരു ആണവോര്‍ജ്ജ അറ്റാക്ക് അന്തര്‍വാഹിനി, 14 പരമ്പരാഗത പവര്‍ അറ്റാക്ക് അന്തര്‍വാഹിനികള്‍, 25 കോര്‍വെറ്റുകള്‍, ഏഴ് മൈന്‍ പ്രതിരോധ കപ്പലുകള്‍, 47 പട്രോളിംഗ് കപ്പലുകള്‍, നാല് ഫ്‌ലീറ്റ് ടാങ്കറുകള്‍, മറ്റ് സഹായ കപ്പലുകളുമുണ്ട്.
7. ഏഷ്യയിലെ ഏറ്റവും വലിയ നാവിക അക്കാദമിയാണ് കേരളത്തിലെ ഏഴിമല നേവല്‍ അക്കാദമി.
8. ഐഎന്‍എസ് (ഇന്ത്യന്‍ നേവല്‍ ഷിപ്പ്)വിരാട്ട് ലോകത്തിലെ ഏറ്റവും പഴയതും നാവികസേനയുടെ ആദ്യത്തെ വിമാനവാഹിനിക്കപ്പലുമാണ്.
9. മിക്ക ഇന്ത്യന്‍ നേവി കപ്പലുകളും അന്തര്‍വാഹിനികളും ഇപ്പോള്‍ തദ്ദേശീയമായിട്ടാണ് നിര്‍മിക്കുന്നത്. 2025ഓടെ ഇന്ത്യയുടെ ആദ്യത്തെ സൂപ്പര്‍ കാരിയര്‍ ഐഎന്‍എസ് വിശാല്‍ സേവനമാരംഭിക്കും.
10. ഇന്ത്യന്‍ നേവിയിലെ 6,000 ടണ്ണുള്ള ഐഎന്‍എസ് അരിഹന്ത് ഇന്ത്യയിലെ ആണവോര്‍ജ്ജ ബാലിസ്റ്റിക് മിസൈല്‍ അന്തര്‍വാഹിനികളിലെ പ്രധമനാണ്. ഐക്യരാഷ്‌ട്രസഭയുടെ സുരക്ഷാ കൗണ്‍സിലിലെ അഞ്ച് സ്ഥിരം അംഗങ്ങളില്‍ നിന്ന് പുറത്തുള്ള ഒരു രാജ്യം നിര്‍മിച്ച ആദ്യത്തെ ബാലിസ്റ്റിക് മിസൈല്‍ അന്തര്‍വാഹിനിയാണ് ഐഎന്‍എസ് അരിഹന്ത്.
11. ലോകത്ത് രണ്ട് നാവിക എയറോബാറ്റിക് ടീമുകള്‍ മാത്രമേ ഉള്ളൂ, അവയിലൊന്ന് നമ്മുടെ രാജ്യത്തിന്റെ നാവികസേനയാണ്. സാഗര്‍ പവന്‍ എന്നാണ് ഇത് അറിയപ്പെടുന്നത്.
12. 2027ഓടെ 150 കപ്പലുകളും 500 വിമാനങ്ങളും ഉള്‍ക്കൊള്ളുന്ന ശക്തി ഇന്ത്യന്‍ നാവികസേന മാറും
