തിരുവനന്തപുരം : ഗോവ ഫിലിം ഫെസ്റ്റിവലില് (ഇഫി) ഉദ്യോഗസ്ഥരാണ് എല്ലാം തീരുമാനിക്കുന്നതെന്ന് സംവിധായകന് അടൂര് ഗോപാലകൃഷ്ണന്. ചലച്ചിത്രമേളയുടെ അമ്പതാം വാര്ഷിക വേളയില് അമിതാഭ് ബച്ചനും രജനീകാന്തിനേയുമാണ് സംഘാടകര് ക്ഷണിച്ചിട്ടുള്ളത്. താന് അവര്ക്ക് അസ്വീകാര്യനും അനഭിമതനുമാണെന്ന് അടൂര് അറിയിച്ചു. സ്വകാര്യ മാധ്യമത്തിന് നല്കിയ പ്രതികരണത്തിലാണ് ഇക്കാര്യം അറിയിച്ചത്.
ഫെസ്റ്റിവല് സംഘടിപ്പിക്കുന്ന ഉദ്യോഗസ്ഥര്ക്ക് സിനിമയെക്കുറിച്ച് എന്തറിയാം. താന് ആരുടേയും പിടിയില് നില്ക്കുന്നയാളല്ല. സ്വാധീനത്തിലും വഴങ്ങുകയില്ല. സ്വന്തം കാലിലാണ് താന് നില്ക്കുന്നത്.
ചടങ്ങിലേക്ക് വിളിക്കാത്തതില് തനിക്കൊരു നഷ്ടവുമില്ല. അവര്ക്കാണ് നഷ്ടം. നമ്മളൊക്കെ ചേര്ന്നുണ്ടാക്കിയ ഫെസ്റ്റിവലാണല്ലോ അത്. മുമ്പ് മേള മെച്ചപ്പെടുത്തുന്നതിനെക്കുറിച്ച് ആലോചിക്കാന് സംഘാടകര് ഒരു യോഗം വിളിച്ചിരുന്നു. മുംബൈയില് വച്ചുകൂടിയ ആ യോഗത്തില് താന് മുന്നോട്ടു വച്ച നിര്ദ്ദേശങ്ങളാണ് ഇഫിയില് ഇപ്പോള് പ്രാവര്ത്തികമായിട്ടുള്ള പലകാര്യങ്ങളും. മേളയ്ക്ക് അന്തര്ദ്ദേശീയ പരിവേഷം വേണമെന്നും സമ്മാനത്തുക ഉയര്ത്തണമെന്നതുമൊക്കെ തന്റെ നിര്ദ്ദേശങ്ങളാണ്. ഐഎഫ്എഫ്എഫ്കെ യില് താന് നടപ്പിലാക്കിയ കാര്യങ്ങളും അവര് പകര്ത്തിയിട്ടുണ്ട്.
തിരുവനന്തപുരം ഫെസ്റ്റിവലില് അന്താരാഷ്ട്ര മത്സര വിഭാഗത്തില് രണ്ട് മലയാള ചിത്രങ്ങള് ഉള്പ്പെടുത്തണമെന്ന നിര്ദ്ദേശവും തന്റേതാണ്. അതില് ഉള്പ്പെടാത്ത രണ്ട് ചിത്രങ്ങള് മലയാളം സിനിമ ഇന്ന് എന്ന വിഭാഗമായി കാണിക്കണമെന്ന നിര്ദ്ദേശവും നടപ്പിലാക്കി. അത്തരം ചിത്രങ്ങളുടെ സംവിധായകര്ക്ക് രണ്ട് ലക്ഷം രൂപയും നല്കുന്നുണ്ട്. എന്നാല് അതില് സംഘാടകര് വെള്ളം ചേര്ത്തു. രണ്ടെന്നത് ഏഴാക്കി. ഇപ്പോഴത് 12 ആക്കി. എല്ലാ ചവറുകളും കുത്തി നിറയ്ക്കുന്നു. കലാ മികവുള്ള ചിത്രങ്ങളെയും സംവിധായകരേയും പ്രോത്സാഹിപ്പിക്കാനുള്ള ഒരു അവസരത്തെ തകര്ക്കരുത്. ഇതിനെതിരെ കുറേ ചെറുപ്പക്കാര് കോടതിയെ സമീപിച്ചിരിക്കുകയാണ്.
അതേസമയം രാജ്യാന്തര ചലച്ചിത്രോത്സവം ഇത്തവണ അമ്പതാം വാര്ഷികം ആഘോഷിക്കുന്നതിന്റെ കണക്ക് വ്യക്തമായില്ലെന്നും അദ്ദേഹം പറഞ്ഞു. തന്റെ അറിവനുസരിച്ച് 1952 ലാണ് ചലച്ചിത്രോത്സവം തുടങ്ങിയത്. ഈ അമ്പതിന്റെ കണക്ക് സംഘാടകര്ക്ക് എങ്ങനെ കിട്ടിയെന്ന് അറിയില്ല.
സത്യജിത് റേ ചെയര്മാനായിരുന്ന 1965 ലെ ചലച്ചിത്രോത്സവത്തില് പങ്കെടുത്തിട്ടുണ്ട്. അന്നുതൊട്ട് മുടങ്ങാതെ നടക്കുന്നുമുണ്ട്. അങ്ങനെയാണെങ്കില്ത്തന്നെ അമ്പത് വര്ഷം കഴിഞ്ഞെന്നും അദ്ദേഹം കൂട്ടിച്ചേര്ത്തു.
