തിരുവനന്തപുരം: വിരമിച്ച ക്രിസ്ത്യന് സൈനികരെയും അര്ദ്ധസൈനികരെയും ഉപയോഗിച്ച് ‘ഗബ്രിയേല് സേന’ രൂപീകരിക്കാനൊരുങ്ങി െ്രെകസ്തവ സഭ. ബലാത്സംഗ ആരോപണം, ഭൂമി തട്ടിപ്പ് തുടങ്ങി വിവാദങ്ങളും പ്രശ്നങ്ങളും തുടരെ സഭയ്ക്കുനേരെ നേരിടുന്നതില് പരിഹാരമായാണ് സേന രൂപികരണമെന്നാണ് സൂചന. ഇതിന്റെ ആദ്യ മീറ്റിങ് നംവബര് 15ന് കണ്ണൂരില് നടക്കും. ബൈബിളില് നിന്നുളള ഗബ്രിയേല് മാലാഖയില് നിന്നാണ് സേനയ്ക്കായി ‘ഗബ്രിയേല്’എന്നപേര് സ്വീകരിച്ചിരിക്കുന്നതെന്നും ഇന്ത്യന് എക്സ്പ്രസ് ദിനപത്രം റിപ്പോര്ട്ട് ചെയ്യുന്നു.
ജലന്ധര് ആര്ച്ച് ബിഷപ്പായിരുന്ന ഫ്രാങ്കോ മുളയ്ക്കല് കന്യാസ്ത്രീയെ ബലാത്സംഗം ചെയ്തെന്ന കേസിനെത്തുടര്ന്ന് ഫ്രാങ്കോ മുളയ്ക്കലിനെ അറസ്റ്റ് ചെയ്യാനായി കന്യാസ്ത്രീകള് നടത്തിയ സമരം സഭയ്ക്ക് തലവേദനയുണ്ടാക്കിയിരുന്നു. നിലവില് സിസ്റ്റര് ലൂസിയടക്കമുളളവരുടെ സഭയ്ക്കുളളിലെ പോരാട്ടവും ശ്രദ്ധേയമായിരിക്കുന്ന സാഹചര്യത്തില് പ്രതിരോധമെന്ന നിലയിലാണ് വിരമിച്ച സൈനികരെ ഉപയോഗിച്ചുള്ള സഭയുടെ സേന വരുന്നത്. എറണാകുളത്തെ സഭാ ആസ്ഥാനമായ കര്ദിനാള് ഹൗസിലേയ്ക്ക് കര്ദിനാള് ജോര്ജ് ആലഞ്ചേരി രാജിവെക്കണമെന്ന് ആവശ്യപ്പെട്ട് വിശ്വാസികളില് ഒരു വിഭാഗം നടത്തിയ മാര്ച്ച് സഭയ്ക്ക് നേരിടാന് സാധിക്കാതിരുന്നത് ശ്രദ്ധേയമാണ്.
സഭയുമായി ബന്ധപ്പെട്ട പരിപാടികളില് ആള്ക്കൂട്ടത്തെ നിയന്ത്രിക്കുകയാണ് ഇതുകൊണ്ട് ഉദ്ദേശിക്കുന്നതെന്നാണ് ഗബ്രിയേല് സേന ഡയറക്ടറായ ഫാദര് മാത്യു ആശാരിപ്പറമ്പില് ദ ഇന്ത്യന് എക്സപ്രസിനോട് പറഞ്ഞത്. വിശ്വാസത്തിന്റെ സംരക്ഷകരും ആദര്ശത്തിന്റെ പോരാളികളുമായിരിയ്ക്കും ഗബ്രിയേല് സേന. ഡിസംബറില് കണ്ണൂരില് പളളിയുടെ നേതൃത്വത്തില് നടത്തുന്ന കര്ഷക റാലിയാണ് ഗബ്രിയേല് സേന ആദ്യമായി പങ്കെടുക്കുന്ന പരിപാടി.
