മലപ്പുറം: താനൂരില് മുസ്ലിം ലീഗ് പ്രവര്ത്തകന്റെ കൊല്ലപ്പെട്ടതിനു പിന്നില് നാലംഗ സംഘമെന്ന് മലപ്പുറം എസ്പി യു.അബ്ദുള് കരീം. നടന്നത് രാഷ്ട്രീയ കൊലപാതകമാണെന്നാണ് പോലീസ് നിഗമനം. അക്രമികളെ തിരിച്ചറിഞ്ഞിട്ടുണ്ടെന്നും വൈകാതെ തന്നെ അറസ്റ്റ് ഉണ്ടാകുമെന്നും പോലീസ് അറിയിച്ചു.
അഞ്ചുടി സ്വദേശിയും മുസ്ലീം ലീഗ് പ്രവര്ത്തകനുമായ ഇസ്ഹാഖിനെ വ്യാഴാഴ്ച്ച രാത്രിയാണ് ഒരു സംഘം ആളുകള് ചേര്ന്ന് വെട്ടിക്കൊന്നത്. ആക്രമണത്തിനു പിന്നില് സിപിഎം ആയിരുന്നെന്നാണ് റിപ്പോര്ട്ട്. വീട്ടില് നിന്നും കവലയിലേക്ക് വരുന്നതിനിടെ ആളൊഴിഞ്ഞ സ്ഥലത്തു വച്ചായിരുന്നു ആക്രമണം. വെട്ടേറ്റ് ഗുരുതരാവസ്ഥയിലായ ഇസ്ഹാഖിനെ തിരൂര് ജില്ലാ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
മുസ്ലിം ലീഗ്- സിപിഎം പ്രവര്ത്തകര് തമ്മില് നേരത്തെ നിരവധി തവണ താനൂരിലും അഞ്ചുടിയിലും സംഘര്ഷമുണ്ടായിട്ടുണ്ട്. ആക്രമണത്തിനു പിന്നില് വന് ഗൂഡാലോചനയുണ്ടെന്നാണ് മുസ്ലിം ലീഗ് ആരോപണം. സംഘര്ഷ സാധ്യത കണക്കിലെടുത്ത് പ്രദേശത്ത് പോലീസ് സുരക്ഷ ഏര്പ്പെടുത്തിയിരിക്കുകയാണ്.
കൊലപാതകത്തില് പ്രതിഷേധിച്ച് മലപ്പുറം ജില്ലയിലെ തീരദേശ മേഖലയില് ഇന്ന് യുഡിഎഫ് ഹര്ത്താല് നടത്തുകയാണ്. വള്ളിക്കുന്ന് മുതല് പൊന്നാനി വരെയുള്ള ആറ് നിയോജക മണ്ഡലങ്ങളിലാണ് ഹര്ത്താല്. രാവിലെ ആറ് മണിമുതല് വൈകിട്ട് ആറ് മണിവരെയാണ് ഹര്ത്താല്.
അതേസമയം ലീഗ് പ്രവര്ത്തകന് കൊല്ലപ്പെട്ട സംഭവത്തില് സിപിഐഎം സംസ്ഥാന സമിതി അംഗം പി.ജയരാജന്റെ ബന്ധം അന്വേഷിക്കണമെന്ന് യൂത്ത് ലീഗ് നേതാവ് പി.കെ. ഫിറോസ്. പ്രദേശത്ത് ഒരാഴ്ച മുമ്പ് പി.ജയരാജന് സന്ദര്ശനം നടത്തിയിരുന്നു. അതിന് ശേഷമാണ് ഇസ്ഹാഖിന്റെ കൊലപാതകം നടന്നതെന്നാണ് ഫിറോസ് ആരോപിക്കുന്നത്.
ഒരാഴ്ച മുമ്പാണ് പി.ജയരാജന് പ്രദേശത്ത് സന്ദര്ശനം നടത്തിയത്. അതിന് ശേഷം സിപിഐഎം പ്രവര്ത്തകര് ‘കൗണ്ട് ഡൗണ്’ എന്ന് സമൂഹ മാധ്യമങ്ങള് വഴി പ്രചരിപ്പിച്ചിരുന്നു. ഇസ്ഹാഖിനെ കൊലപ്പെടുത്തിയപ്പോഴാണ് വാട്സ്അപ്പ് സ്റ്റാറ്റസിന്റെ ഉദ്ദേശം മനസ്സിലാക്കാനായതെന്നും ഫിറോസ് കൂട്ടിച്ചേര്ത്തു.
