തിരുവനന്തപുരം: നെയ്യാര്ഡാം കള്ളിക്കാട് കിക്മാ കോളേജ് പരിസരത്തു തൊഴിലുറപ്പ് തൊഴിലാളിയുടെ കഴുത്തില് പെരുമ്പാമ്പ് ചുറ്റി. കൂടെയുണ്ടായിരുന്നവരുടെ സമയോചിത ഇടപെടലില് പെരുമ്പാമ്പിന്റെ വായില് അകപ്പെടാതെ തൊഴിലാളി രക്ഷപ്പെട്ടു.
കള്ളിക്കാട് പെരുംകുളങ്ങര പത്മ വിലാസത്തില് ഭുവനചന്ദ്രന് നായര് (58) ന്റെ കഴുത്തിലാണ് ചൊവാഴ്ച 11 മണിയോടെ പെരുമ്പാമ്പ് ചുറ്റിയത്. ഇതു കണ്ട് കൂടെയുണ്ടായിരുന്ന തൊഴിലാളികളില് ഒരാള് പാമ്പിന്റെ കഴുത്തിലും ഒരാള് വാലിലും പിടിച്ചുവലിച്ച് പാമ്പിനെ കഴുത്തില്നിന്നും വേര്പെടുത്തി ഭുവനചന്ദ്രന്നായരെ രക്ഷപ്പെടുത്തി. കുറച്ചു സമയംകൂടി കഴിഞ്ഞിരുന്നുവെങ്കില് ശ്വാസം കിട്ടാതെ ഭുവനചന്ദ്രന് നായരുടെ ജീവന് ഭീഷണിയാവുമായിരുന്നു.
പാമ്പിനെ വേര്പ്പെടുത്തി ചാക്കിലാക്കിയ ശേഷം തൊഴിലാളികള് നെയ്യാര്ഡാം വനംവകുപ്പില് വിവരമറിയിച്ചു. സ്ഥലത്തെത്തിയ വനപാലകര്ക്ക് പാമ്പിനെ കൈമാറി. ഉദ്യോഗസ്ഥര് പാമ്പിനെ ഉള്വനത്തിലേക്ക് കയറ്റിവിട്ടു.
