വട്ടിയൂര്ക്കാവ്: യുഡിഎഫും എല്ഡിഎഫും 42 വര്ഷം മാറി ഭരിച്ചിട്ടും വട്ടിയൂര്ക്കാവ് മണ്ഡലത്തില് വികസനം എത്തിക്കാന് ഇരു മുന്നണികള്ക്കും സാധിച്ചിട്ടില്ല. ഇത് ജനവഞ്ചനയുടേയും പിടിപ്പുകേടിന്റെയും കഴിവുകേടിന്റെയും ഉദാഹരണമാണ്. വട്ടിയൂര്ക്കാവില് വികസനമെത്തിക്കാന് എന്ഡിഎയ്ക്ക് അവസരം നല്കണമെന്ന് സ്ഥാനാര്ഥി അഡ്വ. എസ്. സുരേഷ്. തെരഞ്ഞെടുപ്പ് പ്രചാരണവുമായി ബന്ധപ്പെട്ട് വട്ടിയൂര്ക്കാവിലെ എന്ഡിഎ സ്ഥാനാര്ഥിയോട് ‘എന്തും ചോദിക്കാം’ എന്ന ഫേസ്ബുക്ക് ലൈവില് വോട്ടര്മാരുടെ ചോദ്യങ്ങള്ക്ക് മറുപടി പറയുകയായിരുന്നു അദ്ദേഹം. ഇന്നലെ രാവിലെ 11 മണി മുതല് 12 മണി വരെയായിരുന്നു പരിപാടി.
പരിപാടിയില് സ്ഥാനാര്ഥിയോട് വോട്ടര്മാര് ചോദിച്ച ചില ചോദ്യങ്ങളും ഉത്തരങ്ങളും
* ഈ തെരഞ്ഞെടുപ്പ് കെ. മുരളീധരനും കോണ്ഗ്രസ്സും ജനങ്ങളില് അടിച്ചേല്പ്പിച്ചതാണെന്നു പരക്കെ ആക്ഷേപമുണ്ട്. അപ്രതീക്ഷിതമായാണ് താങ്കള് സ്ഥാനാര്ഥിയായത്. എത്രത്തോളം വിജയപ്രതീക്ഷയുണ്ട്?
സമഗ്രമായ വികസനം ഉറപ്പാക്കുമെന്നാണ് മുന് എംഎല്എ മണ്ഡലത്തിലെ വോട്ടര്മാര്ക്ക് നല്കിയിരുന്ന ഉറപ്പ്. എന്നാല് അത് പാലിക്കപ്പെട്ടില്ല. വ്യക്തിപരമായ വികസനം മാത്രമാണ് അദ്ദേഹം നടത്തിയത്. ഉപതെരഞ്ഞെടുപ്പില് എന്ഡിഎ വന് ഭൂരിപക്ഷത്തില് വിജയിക്കും.
* വട്ടിയൂര്ക്കാവിന്റെ വികസനം സംബന്ധിച്ചുള്ള താങ്കളുടെ വീക്ഷണം എന്താണ്? താങ്കള് എംഎല്എ ആയാല് എന്തൊക്കെ വികസനപ്രവര്ത്തനങ്ങളാണ് വട്ടിയൂര്ക്കാവില് കൊണ്ടുവരിക?
കേന്ദ്രസര്ക്കാരിന്റെ നിരവധി സ്ഥാപനങ്ങള് സ്ഥിതിചെയ്യുന്ന മണ്ഡലമാണ് വട്ടിയൂര്ക്കാവ്. കേന്ദ്ര സര്ക്കാരിന്റെ പിന്തുണയോടെ നിരവധി വികസനങ്ങള് മണ്ഡലത്തില് കൊണ്ടുവരാന് സാധിക്കും. ഈ കുറഞ്ഞ കാലയളവിനുള്ളില് വട്ടിയൂര്ക്കാവ് ജംഗ്ഷന് വികസനം ആരംഭിക്കും. അത് അട്ടിമറിക്കാന് സംസ്ഥാന സര്ക്കാര് ശ്രമിച്ചാല് ജനങ്ങളെ അണിനിരത്തി വന് പ്രക്ഷോഭങ്ങള് സംഘടിപ്പിക്കും. വേണ്ടിവന്നാല് നിയമസഭയ്ക്കുള്ളില് അനിശ്ചിതകാല നിരാഹാര സമരവും നടത്തും.
* അങ്ങ് ജയിച്ചാല് തിരുവനന്തപുരം മെട്രോ യാഥാര്ഥ്യമാക്കാന് കേന്ദ്രസര്ക്കാരില് സമ്മര്ദം ചെലുത്തുമോ?
തീര്ച്ചയായും. വികസന വിരോധികളായിട്ടുള്ള ചിലരാണ് തിരുവനന്തപുരം മെട്രോ അട്ടിമറിക്കുന്നത്. വികസനത്തിന് എല്ഡിഎഫിനും യുഡിഎഫിനും താല്പ്പര്യമില്ല. എന്തിനാണ് ഇവര് തടസ്സം നില്ക്കുന്നതെന്ന് അറിയില്ല. ഞാന് ജയിച്ചാല് മാതൃകാപരമായ വികസനം കൊണ്ടുവരും.
* കേരളത്തില് തൊഴിലില്ലായ്മ രൂക്ഷമാണ്, യുവാക്കള്ക്ക് വേണ്ടി എന്തൊക്കെ ചെയ്യാന് സാധിക്കും?
മണ്ഡലത്തില് ആയിരം യുവാക്കള്ക്ക് തൊഴില് നല്കാന് വേണ്ടിയുള്ള പുതിയ സംരംഭം കൊണ്ടുവരും. യുവജനതയെ വഞ്ചിക്കുന്നതിന്റെ തെളിവാണ് സംസ്ഥാന സര്ക്കാര് ഇന്ന് നടത്തിക്കൊണ്ടിരിക്കുന്നത്. യാതൊരു വികസന സംരംഭങ്ങളും സംസ്ഥാന സര്ക്കാര് കൊണ്ടുവന്നിട്ടില്ല. പിഎസ്സിയുടെ വിശ്വാസ്യത പോലും തകര്ന്നിരിക്കുകയാണിപ്പോള്.
* ശബരിമല വിഷയത്തില് താങ്കളുടെ പാര്ട്ടിയുടെ നിലപാടെന്താണ്?
വിശ്വാസികള്ക്ക് അനുകൂലമായ തീരുമാനം സുപ്രീംകോടതിയുടെ ഭാഗത്ത് നിന്നുണ്ടാകുമെന്നാണ് പ്രതീക്ഷ. മറിച്ചാണെങ്കില് വിശ്വാസികളുടെ വിശ്വാസം സംരക്ഷിക്കാന് നിയമനിര്മാണം നടത്തുമെന്ന് കേന്ദ്രസര്ക്കാര് പറഞ്ഞിട്ടുള്ളതാണ്. അത് ചെയ്യും.
* വട്ടിയൂര്ക്കാവില് മാലിന്യപ്രശ്നം രൂക്ഷമാണ്. മാര്ക്കറ്റുകളിലും കോളനികളുമൊക്കെ മാലിന്യക്കൂമ്പാരമാണ്. ഇതുമൂലം ജനങ്ങളില് രോഗം പടരുകയാണ്. പനി മരണങ്ങള് കൂടുതലുള്ള ജില്ലകളില് ഒന്നാണ് തിരുവനന്തപുരം. ഇതിലുള്ള താങ്കളുടെ അഭിപ്രായമെന്താണ്?
വട്ടിയൂര്ക്കാവ് മാത്രമല്ല നഗരം മൊത്തം മാലിന്യക്കൂമ്പാരമാണ്. മാലിന്യ നിര്മാര്ജനത്തിനായി നിരവധി പദ്ധതികളാണ് സംസ്ഥാന സര്ക്കാര് കൊണ്ടുവന്നത്. ഒന്നും വിജയിച്ചില്ല. മാലിന്യ നിര്മാര്ജനത്തിന്റെ പേരില് കോടികളാണ് സംസ്ഥാന സര്ക്കാര് വെട്ടിക്കുന്നത്. മേയറുടെയും നഗരസഭയുടേയും പിടിപ്പുകേടുകൊണ്ടാണ് നഗരത്തിലെ മാലിന്യപ്രശ്നത്തിന് പരിഹാരം കാണാന് സാധിക്കാത്തത്. മാലിന്യപ്രശ്നത്തിന് പരിഹാരം കാണുമായിരുന്ന കേന്ദ്ര സര്ക്കാരിന്റെ പദ്ധതിയായ അമൃത് പദ്ധതി നടപ്പാക്കിയതുമില്ല.
* ബിജെപി എന്നും വോട്ട് കച്ചവടം നടത്തുന്ന പാര്ട്ടിയാണെന്ന് വട്ടിയൂര്ക്കാവില് അവകാശപ്പെടുന്ന ഇടതു വലതു മുന്നണികളോട് എന്താണ് പറയാനുള്ളത്?
വട്ടിയൂര്ക്കാവിലെ യുഡിഎഫ് സ്ഥാനാര്ഥി കെ. മോഹന്കുമാറിന്റെ പാര്ട്ടിയുടെ പിന്തുണയോടെയാണ് തിരുവനന്തപുരം നഗരസഭ മേയര് വി.കെ. പ്രശാന്ത് ഭരിക്കുന്നത്. എല്ലാ തെരഞ്ഞെടുപ്പിലും എന്ഡിഎയെ തോല്പ്പിക്കാനാണ് യുഡിഎഫും എല്ഡിഎഫും വോട്ട് കച്ചവടം നടത്തുന്നത്. ഇത്തരത്തിലുള്ള ആരോപണം ഉന്നയിക്കാന് ഇരുമുന്നണികള്ക്കും അവകാശമില്ല. വട്ടിയൂര്ക്കാവില് എന്ഡിഎയും കോണ്ഗ്രസ്സും തമ്മിലാണ് മത്സരം.
