ആലപ്പുഴ: അരൂരിലെ തെരഞ്ഞെടുപ്പ് ചരിത്രത്തില് പുതിയ അധ്യായം രചിക്കുമെന്ന് ഉത്തമവിശ്വാസത്തിലാണ് എന്ഡിഎ സ്ഥാനാര്ത്ഥി കെ.പി പ്രകാശ് ബാബുവിന്റെ പ്രചാരണ പരിപാടികള്. ആത്മവിശ്വാസം പകരുന്നതാണ് മണ്ഡലത്തിലെ വോട്ടര്മാരുടെ പ്രതികരണങ്ങള്. ചുട്ടുപൊള്ളുന്ന വെയിലിനെ അവഗണിച്ചും പ്രവര്ത്തകരോടൊപ്പം നിറസാന്നിധ്യമായി മാറുകയാണ് സ്ഥാനാര്ത്ഥി.
രാവിലെ ഏഴരയോടെ തുറവൂര് മാധവം ബാലികാ സദനത്തില് എത്തിയ പ്രകാശ് ബാബു കുട്ടികളോടൊപ്പം പ്രഭാതഭക്ഷണം കഴിച്ച ശേഷമാണ് പര്യടനത്തിനിറങ്ങിയത്. അരൂക്കുറ്റിയില്നിന്ന് ആരംഭിച്ച റോഡ് ഷോ ഉച്ചയോടെ പാണാവള്ളിയില് സമാപിച്ചു. കാരാളപ്പതിയില് നടന്ന കുടുംബസംഗമത്തിന് ശേഷം മേഖലയിലെ പീലിങ് ഷെഡുകളിലും സന്ദര്ശനം നടത്തി വോട്ട് അഭ്യര്ത്ഥിച്ചു.
ഇന്ന് രാവിലെ അരൂര് പഞ്ചായത്തില് റോഡ് ഷോ നടക്കും. ഉച്ചകഴിഞ്ഞ് തൈക്കാട്ടുശേരിയിലും പാണാവള്ളി തെക്കന്മേഖലയിലും പര്യടനം നടത്തും. ബിജെപി സംസ്ഥാന അധ്യക്ഷന് അഡ്വ.പി.എസ്. ശ്രീധരന്പിള്ള ഉള്പ്പടെയുള്ള നേതാക്കള് പ്രചാരണപരിപാടികളില് സജീവമായുണ്ട്.
ഘടകകക്ഷി നേതാക്കളുടെയും, പ്രവര്ത്തകരുടെയും സാന്നിധ്യവും സ്ഥാനാര്ത്ഥിക്കും പ്രവര്ത്തകര്ക്കും കുടുതല് ആവേശം പകരുന്നു.
