കോഴിക്കോട്: ആചാര്യശ്രീ രാജേഷിന്റെ നേതൃത്വത്തില് കാശ്യപ വേദ റിസര്ച്ച് ഫൗണ്ടേഷന് കേരളത്തിലെ 14 ജില്ലകളില് 180 ഇടങ്ങളിലും, യു.എ.ഇയിലും നവരാത്രിപൂജയും എഴുത്തിനിരുത്തും സംഘടിപ്പിക്കുന്നു. ഒക്ടോബര് 6, 7, 8 തിയ്യതികളില് ഇവിടങ്ങളില് സരസ്വതിയജ്ഞം നടക്കും.
കൂടാതെ കോഴിക്കോട് കാശ്യപാശ്രമം, കക്കോടി ഒറ്റത്തെങ്ങ് വേദമഹാമന്ദിരം, കണ്ണൂര് വേദഗുരുകുലം, വയനാട് മഹര്ഷി ദയാനന്ദ സരസ്വതി വേദഗുരുകുലം എന്നീ നാല് പ്രധാനകേന്ദ്രങ്ങളില് സെപ്തംബര് 29 മുതല് ഒക്ടോബര് 8 വരെയുള്ള ഒന്പത് ദിവസങ്ങളിലും കലാപരിപാടികളും ചിത്രപ്രദര്ശനവും പ്രഭാഷണവുമുള്പ്പെടെ നവരാത്രിച്ചടങ്ങുകള് നടക്കും. അഗ്നിസാക്ഷിയായി വൈദിക വിധിപ്രകാരമുള്ള സരസ്വതിയജ്ഞത്തോടുകൂടി വിദ്യാരംഭം കുറിക്കുവാന് ആഗ്രഹിക്കുന്നവര്ക്ക് ഈ 180 സ്ഥലങ്ങളിലും യു.എ.ഇയിലും അവസരമുണ്ടായിരിക്കും.
ഋഗ്വേദീയ സാരസ്വത മന്ത്രങ്ങളും യജുര്വേദീയ മേധാസൂക്ത മന്ത്രങ്ങളും ഗായത്രിമന്ത്രവും വിനിയോഗിക്കുകയും ആയുര്വേദവിധിപ്രകാരമുള്ള അപൂര്വ ഔഷധക്കൂട്ടുകള് ഹോമദ്രവ്യമായി അഗ്നിയില് അര്പ്പിക്കുകയും ചെയ്യുന്ന അതിവിശിഷ്ടമായ യജ്ഞമാണ് സരസ്വതിയജ്ഞം. പ്രണവാഷ്ടോത്തര ശതനാമഅര്ച്ചനയും പാവകാന സരസ്വതീമന്ത്രജപവും മേധാകാമമന്ത്രജപവും ഇതോടൊപ്പം ഉണ്ടായിരിക്കും.
