ചെന്നൈ : ബലാകോട്ടില് ഇന്ത്യന് വ്യോമസേന നടത്തിയ ആക്രമണത്തില് തകര്ന്ന ഭീകര താവളങ്ങള് പാക്കിസ്ഥാന് വീണ്ടും സജീവമാക്കിയെന്ന് കരസേനാ മേധാവി ബിപിന് റാവത്ത്. അഞ്ഞൂറില് അധികം ഭീകരര് ഇന്ത്യയിലേക്ക് നുഴഞ്ഞുകയറാന് ഇവര് തയ്യാറെടുക്കുന്നതായി ശ്രദ്ധയില് പെട്ടിട്ടുണ്ട്. ഇതിനെതിരെ ഇന്ത്യ ശക്തമായി പ്രതികരിക്കുമെന്നും ബിപിന് റാവത്ത് മുന്നറിയിപ്പ് നല്കി. ചെന്നൈയില് പരിപാടിയില് പങ്കെടുക്കവേയാണ് കരസേനാ മേധാവി ഇക്കാര്യം വ്യക്തമാക്കിയത്.
വെടിനിര്ത്തല് കരാര് ലംഘനത്തിന്റെ മറവില് പാക്കിസ്ഥാന് അതിര്ത്തിയിലേക്ക് നുഴഞ്ഞുകയറ്റക്കാരെ വിടുന്നു. അതിര്ത്തിയിലെ ഇന്ത്യന് പോസ്റ്റിനു നേരെയുള്ള വെടിനിര്ത്തല് നിയമലംഘനങ്ങള് എങ്ങനെ കൈകാര്യം ചെയ്യണമെന്ന് ഞങ്ങള്ക്കറിയാം. നമ്മുടെ സൈനികര്ക്ക് ഇക്കാര്യത്തില് കൃത്യമായ നടപടിയെടുക്കാനറിയാം. അവിടെ ജാഗ്രത പാലിക്കുകയും, പരമാവധി നുഴഞ്ഞുകയറ്റ ശ്രമങ്ങള് പരാജയപ്പെടുത്തുകയും ചെയ്യുമെന്നും അദ്ദേഹം പറഞ്ഞു.
കശ്മീര് താഴ്വരയിലെ ഭീകരരും പാക്കിസ്ഥാനിലെ അവരുടെ ഭീകരവാദി നേതാക്കളും തമ്മില് ആശയവിനിമയ തകരാറുണ്ടെന്നും എന്നാല് ഇന്ത്യയിലെ ജനങ്ങളും സൈനികരും തമ്മില് ആശയവിനിമയ തകരാറില്ലെന്നും ജനറല് ബിപിന് റാവത്ത് പറഞ്ഞു.
