ഭാരതത്തിന് ഒരു പൊന്‍തൂവല്‍ കൂടി.ലോര്‍ഡ്‌സ് മൈതാനത്ത് ചരിത്രം തീര്‍ത്ത് റാണിമാര്‍

ലണ്ടന്‍: ക്രിക്കറ്റിന്റെ മെക്ക എന്നറിയപ്പെടുന്ന ലോര്‍ഡ്‌സ് മൈതാനത്ത് ഭാരതത്തിന് ഒരു പൊന്‍തൂവല്‍ കൂടി. ഈ വിഖ്യാത കളിമുറ്റത്തെ ആദ്യ അന്താരാഷ്‌ട്ര വനിതാ ക്രിക്കറ്റ് ടെസ്റ്റിന്റെ വിജയികള്‍ ഭാരതം.

ലോകം ഉള്ള കാലത്തോളം ഒളിമങ്ങാതെ തെളിഞ്ഞുനില്‍ക്കുന്ന ചരിത്ര രേഖയായി ഈ കീര്‍ത്തി നിലനില്‍ക്കും. ബാറ്റ് കൊണ്ടും ബോളുകൊണ്ടും സമ്പൂര്‍ണമായി ഇംഗ്ലണ്ട് നിരയെ തകര്‍ത്തുകൊണ്ട് തീര്‍ത്തും രാജകീയമായൊരു വിജയമാണ് ഇന്നലെ നേടിയത്.

സമീപകാലത്തെ ക്രിക്കറ്റ് പശ്ചാത്തലത്തില്‍ ഈ വിജയം ഭാരതത്തിന് നല്‍കുന്ന ആശ്വാസം വളരെ വലുതാണ്. ടെസ്റ്റ് ക്രിക്കറ്റില്‍ പുരുഷ ടീം വലിയ തിരിച്ചടിയിലൂടെ കടന്നുപൊയിക്കൊണ്ടിരിക്കുന്ന കാലഘട്ടം. നിലവിലെ ലോക ചാമ്പ്യന്‍മാരായിരിക്കെ തുടരെ രണ്ട് ട്വന്റി20 പരമ്പരകളില്‍ സമ്പൂര്‍ണ പരാജയം ഏറ്റുവാങ്ങിയ കാലം. ഈ ഒരവസ്ഥയില്‍ പ്രചോദനവും വിജയതീക്ഷ്ണതയും ഉയര്‍ത്താന്‍ പാകത്തിലുള്ള മാസ്മരിക വിജയമാണ് ഹര്‍മന്‍പ്രീത് കൗറിന് കീഴില്‍ ഭാരത വനിതാ ടീം സ്വന്തമാക്കിയത്.

ഭാരതത്തിന്റെ ഓരോ താരവും ചങ്കും കരളും നല്‍കി പയറ്റി നേടിയ വിജയത്തിന്റെ കഥ തുടങ്ങുന്നത് കഴിഞ്ഞ വെള്ളിയാഴ്‌ച്ചയാണ്, ടെസ്റ്റിന്റെ ആദ്യദിനം. 285 റണ്‍സെടുത്ത് ഭാരതം പുറത്താകുമ്പോള്‍ ഒരു തോല്‍വിയിലേക്കെന്നാണ് കരുതിയത്. ബാറ്റിങ്ങിനെയോ ബൗളിങ്ങിനെയോ അതിര് കവിഞ്ഞ് സ്‌നേഹിക്കാത്ത ലോര്‍ഡ്‌സിലെ പിച്ചിന്റെ സ്വഭാവത്തില്‍ പ്രതീക്ഷ ഉണ്ടായിരുന്നു. അതിനെ ശരിവയ്‌ക്കുന്ന തരത്തിലായിരുന്നു രണ്ടാം ദിനം ഭാരത ബൗളര്‍മാരുടെ പ്രകടനം. പേസര്‍ ക്രാന്തി ഗൗഡ് അഞ്ച് വിക്കറ്റ് നേട്ടവുമായി ഇംഗ്ലണ്ടിനെ കശക്കിയെറിയാന്‍ മുന്നില്‍ നിന്നു. 170 റണ്‍സില്‍ ഇംഗ്ലീഷ് പടയുടെ ആദ്യ ഇന്നിങ്‌സ് തീര്‍ത്തു. തുടര്‍ന്ന് ബാറ്റിങ് ആരംഭിച്ച ഭാരതത്തിനായി സെഞ്ചുറി തിളക്കത്തോടെ പൊരുതിക്കൊണ്ട് വിക്കറ്റ് കീപ്പര്‍ ബാറ്റര്‍ യാസ്തിക ഭാട്ടിയ(113 റണ്‍സ്)യുടെ പിന്‍ബലത്തില്‍ ഭാരതം സുരക്ഷിത ടോട്ടലിലേക്ക് കുതിച്ചു. ഒടുവില്‍ ഏഴിന് 341 റണ്‍സെന്ന നിലയില്‍ രണ്ടാം ഇന്നിങ്‌സ് ഡിക്ലയര്‍ ചെയ്തു. മറുപടി ബാറ്റിങ്ങില്‍ ഇംഗ്ലണ്ടിനെ ഭാരത ടീം വീണ്ടും തകര്‍ത്തെറിഞ്ഞു. നാല് വിക്കറ്റ് പ്രകടനവുമായ് സ്‌നേഹ് റാണ രണ്ടാം ഇന്നിങ്‌സിലെ വിക്കറ്റ് വേട്ടയില്‍ മുന്നിലെത്തി. രണ്ട് വീതം വിക്കറ്റുകള്‍ നേടിക്കൊണ്ട് സയാലി സത്ഘരെ, ക്രാന്തി ഗൗഡ്, ദീപ്തി ശര്‍മ എന്നിവരും വിലപ്പെട്ട സംഭാവന നല്‍കി. ഒടുവില്‍ ചരിത്ര പ്രസിദ്ധമായ ഈ ടെസ്റ്റില്‍ ഭാരതം ജേതാക്കളായത് 270 റണ്‍സിന്. ഭാരത ബൗളിങ്ങിനോട് ഇംഗ്ലണ്ടിനായി പൊരുതി നിന്നത് അമി ജോന്‍സും(54) സോഫി എക്ലെസ്റ്റോന്‍(50) മാത്രം.