ന്യൂദല്ഹി : മധ്യപ്രദേശ് കോണ്ഗ്രസ് പ്രസിഡന്റ് സ്ഥാനത്തെച്ചൊല്ലി ഉടലെടുത്തിട്ടുള്ള പ്രശ്നം രൂക്ഷമായത് ഹൈക്കമാന്ഡിലും തലവേദനയാകുന്നു. പിസിസി അധ്യക്ഷസ്ഥാനം സംബന്ധിച്ച് സംസ്ഥാന കോണ്ഗ്രസ് നേതാക്കളായ ജ്യോതിരാദിത്യ സിന്ധ്യയും കമല്നാഥും തമ്മിലുള്ള തര്ക്കമാണ് ഇപ്പോള് ചര്ച്ച ആയിരിക്കുന്നത്. ലോക്സഭാ തെരഞ്ഞെടുപ്പ് തോല്വിയെ തുടര്ന്ന് കോണ്ഗ്രസ് പാര്ട്ടിയിലെ നേതൃത്വം തന്നെ പരുങ്ങലിലാണ്. രാഹുല് ഗാന്ധി അധ്യക്ഷ സ്ഥാനം രാജിവെച്ചതോടെ നിരവധി ചര്ച്ചകള്ക്കൊടുവിലാണ് സോണിയ ഗാന്ധിയെ ഇടക്കാല പ്രസിഡന്റായി തെരഞ്ഞെടുത്തത്.
അതിനിടയിലാണ് മധ്യപ്രദേശിലെ കോണ്ഗ്രസ് നേതാക്കള്ക്കിടയിലെ കലഹം. പ്രശ്നം തലവേദനയായതോടെ പ്രതിസന്ധി പരിഹരിക്കാന് മുന് കേന്ദ്രമന്ത്രി എ.കെ.ആന്റണിയുടെ നേതൃത്വത്തിലുളള സമിതിയെ സോണിയ നിയോഗിച്ചിട്ടുണ്ട്. മുഖ്യമന്ത്രി കമല്നാഥുമായി സോണിയ ഗാന്ധി ചര്ച്ച നടത്തിയതിന്റെ അടിസ്ഥാനത്തിലാണ് ആന്റണിയുടെ അധ്യക്ഷതയിലുള്ള പ്രത്യേക സമിതിയെ നിയോഗിച്ചിരിക്കുന്നത്.
അതേസമയം സംസ്ഥാന കോണ്ഗ്രസ് ഘടകത്തിലെ സിന്ധ്യയുടെ മുഖ്യ എതിരാളിയായ ദിഗ് വിജയ് സിങ് സിന്ധ്യയ്ക്കെതിരെ കരുനീക്കവുമായി രംഗത്തുണ്ട്. മുതിര്ന്ന കോണ്ഗ്രസ് നേതാവ് അര്ജുന് സിങ്ങിന്റെ മകന് അജയ് സിങ്ങിനെ മുന്നിര്ത്തിയാണ് ദിഗ് വിജയ് സിങ്ങിന്റെ നീക്കം. അജയ് സിങ്ങും പിസിസി പ്രസിഡന്റ് സ്ഥാനം ആവശ്യപ്പെട്ടിട്ടുണ്ട്.
എന്നാല് സിന്ധ്യ പിസിസി പ്രസിഡന്റ് സ്ഥാനം ഏറ്റെടുക്കാനുള്ള സമയം അതിക്രമിച്ചുവെന്നാണ് സിന്ധ്യ അനുകൂലികള് വാദിക്കുന്നത്. കമല്നാഥ് മന്ത്രിസഭയിലെ മന്ത്രിയായ ഇമര്തി ദേവിയെ പോലുളളവരും സിന്ധ്യ പ്രസിഡന്റാവണമെന്ന ആവശ്യവുമായി രംഗത്തെത്തിയിട്ടുണ്ട്.
