ന്യൂദല്ഹി: ജമ്മു കശ്മീരിലെ നിയന്ത്രണങ്ങള് നീക്കുന്നത് പാക്കിസ്ഥാന്റെ പെരുമാറ്റം അനുസരിച്ചായിരിക്കുമെന്ന് ദേശീയ സുരക്ഷാ ഉപദേഷ്ടാവ് അജിത് ഡോവല്. എല്ലാ നിയന്ത്രണങ്ങളും മാറി കാണാന് ഞങ്ങള് ആഗ്രഹിക്കുന്നു, പക്ഷേ അത് പാകിസ്ഥാന് എങ്ങനെ പെരുമാറുന്നു എന്നതിനെ ആശ്രയിച്ചിരിക്കുന്നു. പാകിസ്ഥാന് മാന്യമായി പെരുമാറിയാല്, തീവ്രവാദികള് ഭീഷണിപ്പെടുത്തുകയും നുഴഞ്ഞുകയറുകയും ചെയ്യുകയില്ല, പാകിസ്ഥാന് അവരുടെ ടവറുകള് ഉപയോഗിച്ച് ഭീകരര്ക്ക് സിഗ്നലുകള് അയയ്ക്കുന്നത് നിര്ത്തുകയാണെങ്കില്, ഞങ്ങള്ക്ക് നിയന്ത്രണങ്ങള് നീക്കാന് സാധിക്കുമെന്ന് അജിത് ഡോവല് പറഞ്ഞു.
പാക്കിസ്ഥാന് അതിര്ത്തിയില് അസ്ഥതകള് പടര്ത്തുകയാണ്. നിയന്ത്രണങ്ങള് ഏര്പ്പെടുത്തേണ്ടിവന്നാലും പാകിസ്ഥാന് തീവ്രവാദികളില് നിന്ന് കശ്മീരികളുടെ ജീവന് സംരക്ഷിക്കാന് ഞങ്ങള് പ്രതിഞ്ജാബദ്ധരാണ്. പാക്കിസ്ഥാന് അശാന്തി സൃഷ്ടിക്കാനുള്ള ഏക ഉപകരണം ഭീകരതയാണ്. 230 പാകിസ്ഥാന് തീവ്രവാദികളെ കണ്ടെത്തി, അവരില് ചിലര് നുഴഞ്ഞുകയറിയവരാണ്, ചിലരെ അറസ്റ്റ് ചെയ്തുവെന്ന് ഡോവല് പറഞ്ഞു. ‘എത്ര ആപ്പിള് ട്രക്കുകള് ആണ് നീങ്ങുന്നത്, നിങ്ങള്ക്ക് തടയാന് കഴിയുന്നില്ലേ?, ഞങ്ങള് നിങ്ങള്ക്ക് വളകള് അയയ്ക്കണോ?’ തുടങ്ങിയ കോഡ്(രഹസ്യ) സന്ദേശങ്ങള് അതിര്ത്തിയില് 20 കിലോമീറ്റര് അകലെ കമ്മ്യൂണിക്കേഷന് ടവറുകളിലൂടെ പാകിസ്ഥാന് അയയ്ക്കാന് ശ്രമിച്ചത് ഇന്ത്യ കണ്ടെത്തി എന്നും അജിത് ഡോവല് പറഞ്ഞു. തങ്ങളുടെ കേന്ദ്രങ്ങളില് നിന്ന് സേവനങ്ങളും ഉപകരണങ്ങളും ആയുധങ്ങളും അഭ്യര്ത്ഥിക്കാന് തീവ്രവാദികള് ഉപയോഗിക്കുന്ന കോഡ് പദങ്ങളാതിതെന്ന് ഡോവല് പറഞ്ഞു.
പാക്കിസ്ഥാന് നുഴഞ്ഞുകയറ്റക്കാരെ പ്രോത്സാഹിപ്പിക്കാതിരുന്നാല്, അതിര്ത്തിയിലെ ഭീകരര്ക്ക് സന്ദേശങ്ങള് കൈമാറാതിരുന്നാല് ഇന്ത്യ കശ്മിരിലെ നിയന്ത്രണങ്ങള് കുറയ്ക്കുമെന്നും ഡോവല് വ്യക്തമാക്കി. ഭൂമിശാസ്ത്രപരമായി ജമ്മുകശ്മീരിലെ 92.5 ശതമാനം സ്ഥലങ്ങളിലും നിയന്ത്രണങ്ങളില്ല. അതിര്ത്തിയില് 20 കി.മീ. അടുത്ത് പാക്കിസ്ഥാന്റെ ടവറുകള് സ്ഥിതി ചെയ്യുന്നുണ്ട്. ഇതിലൂടെ പാകിസ്ഥാന് ഭീകരര്ക്ക് സന്ദേശങ്ങള് അയച്ചുകൊണ്ടിരിക്കുകയാണെന്നും ഡോവല് കുറ്റപ്പെടുത്തി. ആര്ട്ടിക്കിള് 370 റദ്ദാക്കിയ കേന്ദ്രതീരുമാനത്തെ പിന്തുണയ്ക്കുന്നവരാണ് ഭൂരിഭാഗം കശ്മീരികളും ജമ്മു കശ്മീരിലെ വിവിധ ഭാഗങ്ങള് സന്ദര്ശിക്കുകയും നാട്ടുകാരുമായി സംവദിക്കുകയും ചെയ്തതിന്രെ അടിസ്ഥാനത്തിലാണ് ഇക്കാര്യങ്ങള് ഡോവല് വ്യക്തമാക്കിയത്.
