ന്യൂദല്ഹി : ഐഎന്എക്സ് അഴിമതിക്കേസില് സിബിഐ കസ്റ്റഡിയില് കഴിയുന്ന കോണ്ഗ്രസ് നേതാവ് പി. ചിദംബരത്തെ ഇന്ന് വീണ്ടും കോടതിയില് ഹാജരാക്കും. കസ്റ്റഡി കാലാവധി അവസാനിച്ചതിനെ തുടര്ന്ന് ദല്ഹി റോസ് അവന്യൂ കോടതിയിലാണ് ഹാജരാക്കുന്നത്.
കേസിന്റെ അന്വേഷണ പുരോഗതി സി.ബി.ഐ കോടതിയെ അറിയിക്കും. വിശദമായ അന്വേഷണത്തിനായി കസ്റ്റഡി നീട്ടി നല്കണമെന്ന് സിബിഐ കോടതിയില് ആവശ്യം ഉന്നയിച്ചില്ലെങ്കില് ചിദംബരത്തിന്റെ ജാമ്യാപേക്ഷ കോടതി പരിഗണിക്കും.
ദല്ഹി ഹൈക്കോടതി മുന്കൂര് ജാമ്യാപേക്ഷ തള്ളിതോടെ കഴിഞ്ഞ 21നാണ് ചിദംബരത്തെ സിബിഐ അറസ്റ്റ് ചെയ്തത്. പിറ്റേന്ന് റോസ് അവന്യു കോടതിയില് ഹാജരാത്തിയതോടെ അന്വേഷണ വിധേയമായി നാല് ദിവസത്തെ സിബിഐ കസ്റ്റഡിയില് വിടുകയായിരുന്നു. പിന്നീടത് നാലു ദിവസം കൂടി നീട്ടി നല്കി. ഇതോടെ എട്ടു ദിവസമായി സിബിഐ ചോദ്യം ചെയ്യല് തുടരുകയാണ്. ഈദിവസങ്ങളില് കേസിലെ കൂട്ട് പ്രതികള്ക്കൊപ്പം ചിദംബരത്തെ ചോദ്യം ചെയ്തതായാണ് വിവരം.
അതേസമയം എന്ഫോഴ്സ്മെന്റ് ഡയറക്ടറേറ്റ് കേസില് സമര്പ്പിച്ച മുന്കൂര് ജാമ്യാപേക്ഷയില് വിധി പറയാന് സുപ്രിം കോടതി അടുത്ത മാസം അഞ്ചിലേക്ക് മാറ്റി. ചോദ്യംചെയ്യലുമായി ബന്ധപ്പെട്ട രേഖകള് കൈമാറാന് നിര്ദ്ദേശം നല്കിയിട്ടുണ്ട്. അതുവരെ പരിരക്ഷയുള്ളതിനാല് എന്ഫോഴ്സ്മെന്റ് അറസ്റ്റ് ഉണ്ടാകാനിടയില്ല.
