തിരുവനന്തപുരം: മഴക്കെടുതിയില് കേരളത്തിലെ ജനങ്ങള് ദുരിതം അനുഭവിക്കുമ്പോള് സര്ക്കാരിന്റെ പ്രചാരണത്തിനായി അഞ്ച് കോടി ചെലവഴിക്കാനൊരുങ്ങി പിണറായി സര്ക്കാര്. സംസ്ഥാന സര്ക്കാരിന്റെ പ്രചാരണ പരിപാടികള്ക്കായി സ്ഥിരം ഹോര്ഡിങ് സ്ഥാപിക്കാനാണ് സര്ക്കാര് ഇപ്പോള് മുതിരുന്നത്.
സംസ്ഥാന സര്ക്കാരിന്റെ പ്രവര്ത്തനങ്ങള് സംബന്ധിച്ച് പരസ്യ പ്രദര്ശനത്തിനായി തിരുവനന്തപുരത്തെ 12 ഇടങ്ങളില് കൂറ്റന് ഹോര്ഡിങ്ങുകള് സ്ഥാപിക്കാനാണ് ഈ തുക വകയിരുത്തുന്നത്. പ്രാരംഭ പ്രവര്ത്തനങ്ങള്ക്കായി ഒരു കോടി രൂപ സര്ക്കാര് ചുമതലക്കാര്ക്ക് കൈമാറിക്കഴിഞ്ഞു. സിഡ്കോയ്ക്കാണ് ഹോര്ഡിങ്ങുകളുടെ നിര്മ്മാണ ചുമതല.
ഇതുവരെ ഹോര്ഡിങ്ങുകള് വാടകയ്ക്ക് എടുത്താണ് സര്ക്കാര് പ്രവര്ത്തനങ്ങള് പരസ്യ പ്രദര്ശനം നടത്തിയിരുന്നത്. പബ്ലിക് റിലേഷന്സ് വകുപ്പാണ് ഇത് ചെയ്തിരുന്നത്. എന്നാല് അറ്റകുറ്റപ്പണി നടത്തി സംരക്ഷിക്കുന്നതിന് ചെലവേറുമെന്നതിനാലാണ് പുതിയത് സ്ഥാപിക്കുന്നതെന്നാണ് സര്ക്കാര് വൃത്തങ്ങള് വാദിക്കുന്നത്.
ആനയറ വേള്ഡ് മാര്ക്കറ്റ്, കേശവദാസപുരം, വഴുതക്കാട് എന്നിവിടങ്ങളില് ഹോര്ഡിങ്ങുകളുടെ നിര്മ്മാണം പൂര്ത്തിയായി. ഇവ ആദ്യം വാടകയ്ക്കാണ് എടുത്തിരുന്നതെന്നാണ് വിവരം. അതേസമയം സംസ്ഥാനം കടുത്ത സാമ്പത്തിക പ്രതിസന്ധിയും ദുരിതവും നേരിടുമ്പോള് പരസ്യ പ്രചാരണത്തിനായി ഇത്രയും തുക ചെലവഴിക്കുന്നത് എറെ വിമര്ശനം ഉയര്ത്തിയിട്ടുണ്ട്.
