ന്യൂദല്ഹി :പ്രിയങ്ക വാദ്രയുടെ ഉത്തര് പ്രദേശ് വാര്ത്ത റിപ്പോര്ട്ട് ചെയ്യാനെത്തിയ മാധ്യമ പ്രവര്ത്തകനോട് സെക്രട്ടറി അപമര്യാദയായി പെരുമാറിയെന്ന് ആരോപണം. സോന്ഭദ്രയില് സന്ദര്ശനം നടത്താന് എത്തിയ പ്രിയങ്കയോട് ചോദ്യം ചോദിക്കാന് മുതിര്ന്നപ്പോള് സഹായി വന്ന് തടയുകയായിരുന്നു. പ്രിയങ്ക വാദ്രയുടെ സഹായിയും കോണ്ഗ്രസ് നേതാവുമായ സന്ദീപ് സിങ്ങാണ് അപമര്യാദയായി പെരുമാറിയത്.
വരാണസി സ്വദേശി നിതീഷ് കുമാര് പാണ്ഡെയാണ് പരാതി ഉന്നയിച്ചിരിക്കുന്നത്. ചോദ്യം ചോദിച്ചപ്പോള് പ്രിയങ്ക ഒഴിഞ്ഞുമാറുകയും പിന്നാലെ എത്തിയ സന്ദീപ് സിങ് നിതീഷിനെ പിടിച്ചുമാറ്റി. മാധ്യമ പ്രവര്ത്തകനെ സന്ദീപ് സിങ് കൈയേറ്റം ചെയ്യാനും ശ്രമിച്ചു.
കശ്മീര് വിഷയത്തില്പ്രിയങ്ക വാദ്രയോട് ചോദ്യം ഉന്നയിച്ചപ്പോഴാണ് സെക്രട്ടറി ഇടപെട്ടത്. ബിജെപിക്ക് വേണ്ടി ചോദ്യം ചോദിക്കാന് നിങ്ങള് പണം വാങ്ങിയിട്ടുണ്ടോയെന്ന് സെക്രട്ടറി മാധ്യമപ്രവര്ത്തകനോട് ചോദിച്ചു.
പ്രാദേശിക വാര്ത്താചാനല് പ്രവര്ത്തകനാണ് നിതീഷ്. പരാതി നല്കിയതിന്റെ അടിസ്ഥാനത്തില് പ്രിയങ്കാ ഗാന്ധിയുടെ സെക്രട്ടറിക്കെതിരെ കേസ് രജിസ്റ്റര് ചെയ്തിട്ടുണ്ടെന്ന് ഖൊരാവല് പോലീസ് അറിയിച്ചു. സന്ദീപ് സിങ് റിപ്പോര്ട്ടറോട് കയര്ക്കുന്ന വീഡിയോ സമൂഹ മാധ്യമങ്ങളിലും വൈറലാണ്. സമൂഹ മാധ്യമങ്ങളിലും സന്ദീപിനെതിരെ പ്രതിഷേധം ശക്തമായിട്ടുണ്ട്.
