തിരുവനന്തപുരം: പ്രളയ ദുരിതാശ്വത്തിന്റെ പേരില് ജോലി സമയത്ത് നോട്ടീസുമായി കറങ്ങിയ ഇടതു സംഘടന നേതാക്കളും പൊതുഭരണ വകുപ്പ് സെക്രട്ടറിയും തമ്മില് വാക്പോര്. ജോലി സമയത്ത് തന്റെ മുറിയില് നോട്ടീസുമായി എത്തിയ ഇടതു നേതാക്കളെ ആട്ടി പുറത്താക്കിയ പൊതുഭരണ സെക്രട്ടറി ബിശ്വനാഥ് സിന്ഹ, ജോലി സമയത്ത് നോട്ടീസ് വിതരണം നടത്തരുതെന്ന് ആവശ്യപ്പെട്ടു. എന്നാല്, ഇതുപാടെ തള്ളിയ നേതാക്കള് തുടര്ന്നും നോട്ടീസ് വിതരണം തുടര്ന്നു.
പൊതുഭരണ സെക്രട്ടറി ബിശ്വനാഥ് സിന്ഹയും സെക്രട്ടേറിയറ്റിലെ ഇടത് അനുകൂല യൂണിയനും തമ്മില് ഏറെനാളായി തര്ക്കത്തിലായിരുന്നു. യൂണിയന്റെ ആവശ്യപ്രകാരം മാറ്റിയ പൊതുഭരണ സെക്രട്ടറിയെ മുഖ്യമന്ത്രി ഇടപെട്ടാണ് അതേ സ്ഥാനത്തു വീണ്ടും നിയമിച്ചത്. ഇതിനെതിരെ യൂണിയന് നോട്ടീസും ഇറക്കിയിരുന്നു. ജോലി ചെയ്യാതെ സംഘടന പ്രവര്ത്തനമെന്ന പേരില് സെക്രട്ടേറിയറ്റില് കറങ്ങുന്ന ചില യൂണിയന് നേതാക്കള്ക്കെതിരെ സെക്രട്ടറി അച്ചടക്ക നടപടി സ്വീകരിച്ചതോടെയാണു ഇവര്ക്കിടയിലെ കലഹം രൂക്ഷമാകുന്നത്. ഇനിതിനിടെയാണ് പ്രളയ ദുരിതാശ്വാസ സഹായം ശേഖരിക്കുന്നതിന്റെ നോട്ടീസുമായി യൂണിയന് പ്രവര്ത്തകര് പൊതുഭരണ സെക്രട്ടറിയുടെ ഓഫീസിലെത്തിയത്.
സെക്രട്ടറിയുടെ ഓഫീസിലെ ജീവനക്കാര്ക്ക് നോട്ടീസ് വിതരണം ചെയ്യുന്നത് ബിശ്വനാഥ് സിന്ഹ തടഞ്ഞതോടെ വാക്കുത്തര്ക്കമായി. ജോലി സമയത്ത് സംഘടനാ പ്രവര്ത്തനം അനുവദിക്കില്ലെന്നായിരുന്നു സെക്രട്ടറിയുടെ നിലപാട്. തന്റെ മുറിയില് നിന്ന് ഇറങ്ങിപ്പോകാനും നേതാക്കളോട് സിന്ഹ ആവശ്യപ്പെട്ടു. ഓഫീസ് സമയത്ത് പ്രചാരണം പാടില്ലെന്ന നിലവിലെ ചട്ടവും നേതാക്കളെ ഓര്മിപ്പിച്ചു. പക്ഷേ സെക്രട്ടറിയുടെ എതിര്പ്പ് അവഗണിച്ചും യൂണിയന് നേതാക്കള് നോട്ടീസ് വിതരണം ചെയ്തു.
തങ്ങളെ പൊതുഭരണ സെക്രട്ടറി അവഹേളിച്ചെന്നു കാട്ടി മുഖ്യമന്ത്രിക്ക് യൂണിയന് പരാതി നല്കിയിട്ടുണ്ട്. വരും ദിവസങ്ങളിലും ദുരിതാശ്വാസ നിധിയിലേക്കുള്ള ധനശേഖരണവും പ്രചാരണ പരിപടികളും ഓഫീസ് സമയത്ത് സംഘടിപ്പിക്കുമെന്നാണ് ഇടതു നേതാക്കളുടെ പ്രഖ്യാപനം.
