ബംഗളൂരു: പ്രളയം നാശം വിതച്ച സ്വന്തം മണ്ഡലത്തില് സന്ദര്ശനം നടത്താതെ ഈദ് ആഘോഷത്തില് പങ്കെടുത്ത് വിഭവസമൃദ്ധമായ ഭക്ഷണം കഴിച്ച കര്ണാടക മുന് മുഖ്യമന്ത്രിയും കോണ്ഗ്രസ് നേതാവുമായ സിദ്ധരാമയ്യയെ രൂക്ഷമായി വിമര്ശിച്ച് ബിജെപി. സിദ്ധരാമയ്യയുടെ മണ്ഡലമായ ബദാമിയില് പ്രളയം കനത്ത നാശം വിതച്ചപ്പോള് അവിടം സന്ദര്ശിക്കാന് അദ്ദേഹം കൂട്ടാക്കിയിരുന്നില്ല. തിമിര ശസ്ത്രക്രിയയ്ക്ക് വിധേയനായതിനാല് യാത്ര ചെയ്യരുതെന്നും നല്ല വിശ്രമം വേണമെന്നും ഡോക്ടര്മാര് നിര്ദ്ദേശിച്ചിരുന്നു. അതുകൊണ്ട് ബദാമിയില് പോകാനോ പ്രളയബാധിത പ്രദേശങ്ങള് സന്ദര്ശിച്ച് സ്ഥിതിഗതികള് വിലയിരുത്താനോ തനിക്ക് സാധിച്ചിരുന്നില്ലെന്നാണു സിദ്ധരാമയ്യയുടെ ന്യായീകരണം. തനിക്ക് പകരം മകന് യതീന്ദ്ര ദുരിതബാധിത പ്രദേശങ്ങള് സന്ദര്ശിച്ചിരുന്നെന്നും സിദ്ധരാമയ്യ ട്വീറ്റ് ചെയ്തിരുന്നു. സിദ്ധരാമയ്യ ഈദ് ആഘോഷത്തില് പങ്കെടുത്ത് ഭക്ഷണം കഴിക്കുന്നതിന്റെ ദൃശ്യങ്ങള് സോഷ്യല് മീഡിയയില് വൈറലായതോടെയാണ് വിമര്ശനവുമായി ബിജെപി രംഗത്ത് എത്തിയത്. ബിരിയാണി കഴിക്കാന് സമയം കണ്ടെത്തിയ സിദ്ധരാമയ്യയ്ക്ക് സ്വന്തം മണ്ഡലത്തിലെ ജനങ്ങള്ക്ക് വേണ്ടി മാറ്റിവയ്ക്കാന് സമയമില്ലേയെന്നാണ് ബിജെപിയുടെ ചോദ്യം.
ബിരിയാണി കഴിച്ച് തീര്ന്നെങ്കില് സ്വന്തം മണ്ഡലം സന്ദര്ശിച്ച് നിങ്ങള്ക്ക് വോട്ട് ചെയ്തവരുടെ ആവശ്യങ്ങള് കേട്ടുകൂടേയെന്നും ബിജെപി ട്വീറ്റ് ചെയ്തു. സംസ്ഥാനത്ത് മഴക്കെടുതി രൂക്ഷമായത് മുതല് സിദ്ധരാമയ്യ മുഖ്യമന്ത്രി ബി.എസ.് യെദിയൂരപ്പയ്ക്ക് നേരെ രൂക്ഷമായ വിമര്ശനമാണ് ഉയര്ത്തിയത്. മന്ത്രിമാരെയും വകുപ്പുകളെയും തീരുമാനിക്കാന് വൈകിയതിനാല് നിലവിലെ സാഹചര്യം നേരിടാന് യെദിയൂരപ്പ പരാജയപ്പെട്ടുവെന്നാണ് സിദ്ധരാമയ്യ ആരോപണം ഉന്നയിച്ചത്. എന്നാല്, സ്വന്തം മണ്ഡലം പോലും സന്ദര്ശിക്കാതെ വിഭവസമൃദ്ധമായ ഭക്ഷണം കഴിച്ച് ആഘോഷിച്ച സിദ്ധരാമയ്യയ്ക്കെതിരേ പാര്ട്ടിയില് നിന്നും പ്രതിഷേധം ഉയരുന്നുണ്ട്. മല്ലികാര്ജുന് ഗാര്ഗെ അടക്കം മുതിര്ന്ന നേതാക്കളും ആഘോഷത്തില് പങ്കെടുത്തിരുന്നു.
