ന്യൂദല്‍ഹി: കശ്മീരിന് പ്രത്യേക പദവി നല്‍കുന്ന ആര്‍ട്ടിക്കിള്‍ 370 എടുത്ത് മാറ്റിയത് ഭീകരവാദത്തിന് അന്ത്യം കുറിയ്‌ക്കുമെന്നും അത് കാശ്മീരില്‍ വികസനമുണ്ടാക്കുമെന്നും കേന്ദ്ര ആഭ്യന്തരമന്ത്രി അമിത് ഷാ. വിഷയത്തില്‍ തനിക്ക് യാതൊരു വിധത്തിലുള്ള സംശയവുമില്ലായിരുന്നെന്നും അദ്ദേഹം വ്യക്തമാക്കി. ഉപരാഷ്‌ട്രപതി എം.വെങ്കൈയ്യ നായിഡുവിന്റെ രണ്ടു വര്‍ഷം നീണ്ട സേവനത്തെ കുറിച്ചുള്ള പുസ്തകത്തിന്റെ പ്രകാശന ചടങ്ങില്‍ സംസാരിക്കുകയായിരുന്നു അമിത് ഷാ.
കശ്മീരിന്റെ പദവി എടുത്ത് കളഞ്ഞ നിര്‍ണായക തീരുമാനത്തിന് ശേഷം അവിടെ എന്ത് സംഭവിക്കും എന്നതിനെ കുറിച്ച് സംശയത്തിന്റെ ഒരണു പോലും തന്റെ മനസ്സില്‍ ഇല്ലായിരുന്നു എന്നും അമിത് ഷാ വ്യക്തമാക്കി. പ്രധാനമന്ത്രി നരേന്ദ്ര മോദിയും ബിജെപി സര്‍ക്കാരും ഈ രാജ്യത്തെ ആര്‍ട്ടിക്കിള്‍ 370യില്‍ നിന്നും രക്ഷിച്ചു എന്നും അദ്ദേഹം പറഞ്ഞു.
കശ്മീരിന്റെ പ്രത്യേക പദവി എടുത്ത് കളയേണ്ടതായിരുന്നു എന്ന് തന്നെയാണ് താന്‍ വിശ്വസിക്കുന്നതെന്നും ആര്‍ട്ടിക്കിള്‍ 370 ഒരിക്കലും രാജ്യത്തിന് ഗുണകരമല്ലെന്നും അമിത് ഷാ പറഞ്ഞു.
