ന്യൂദല്ഹി: അറുപത്തിയാറാമത് ദേശീയ ചലച്ചിത്ര പുരസ്കാര പ്രഖ്യാപനത്തിനു പിന്നാലെ വിവാദങ്ങളും തലപൊക്കുന്നു. തമിഴ് ചിത്രം പേരന്പിലെ പ്രകടനത്തിന് നടന് മമ്മൂട്ടിക്ക് മികച്ച നടനുള്ള പുരസ്കാരം നല്കിയില്ലെന്ന് ആരോപിച്ചാണ് ഒരു സംഘം മമ്മൂട്ടി ഫാന്സ് എന്ന പേരില് കടുത്ത പ്രതിഷേധവുമായി രംഗത്തുവന്നത്. ജൂറി ചെയര്മാന് രാഹുല് റവൈലിന്റെ സോഷ്യല് മീഡിയ അക്കൗണ്ടുകളിലും ഫോണിലും അസഭ്യ സന്ദേശങ്ങളാണ് ഫാന്സില് ചിലരില് അയച്ചത്. ഇക്കാര്യം വ്യക്തമാക്കി രാഹുല് ഫേസ്ബുക്കില് പോസ്റ്റിട്ടതിനു പിന്നാലെ ക്ഷമ ചോദിച്ച് നടന് മമ്മൂട്ടിയും രംഗത്തെത്തി.
എന്തുകൊണ്ട് മമ്മൂട്ടിക്ക് അവാര്ഡ് കിട്ടിയില്ല എന്നു വ്യക്തമാക്കിയാണ് മമ്മൂട്ടിക്ക് താന് അയച്ച സന്ദേശം സോഷ്യല് മീഡിയയില് രാഹുല് പോസ്റ്റ് ചെയ്തത്. മമ്മൂട്ടി ആരാധകരുടെ രോഷം തനിക്കെതിരെ നീണ്ടതാണ് ഈ പോസ്റ്റിടാന് തന്നെ നിര്ബന്ധിതനാക്കിയതെന്ന് രാഹുല് റവൈല് കുറിക്കുന്നു. ‘മിസ്റ്റര് മമ്മൂട്ടി ..താങ്കളുടെ ആരാധകരെന്ന് അവകാശപ്പെടുന്നവരില് നിന്ന്, അല്ലെങ്കില് ഫാന്സ് ക്ലബുകളില് നിന്ന് എനിക്ക് നിരവധി വെറുപ്പും വിദ്വേഷവും വൃത്തികേടും നിറഞ്ഞ സന്ദേശങ്ങള് ലഭിക്കുന്നുണ്ട്. പേരന്പ് എന്ന ചിത്രത്തിലെ പ്രകടനത്തിന് എന്തുകൊണ്ട് താങ്കളെ മികച്ച നടനായി തിരഞ്ഞെടുത്തില്ല എന്നതിലാണ് ഈ സന്ദേശങ്ങള് മുഴുവനും ലഭിക്കുന്നത്…എന്നാല് ഞാന് ചില കാര്യങ്ങള് വ്യക്തമാക്കിക്കൊള്ളട്ടെ. ആദ്യമായി ആര്ക്കും തന്നെ ജൂറിയുടെ തീരുമാനത്തെ ചോദ്യം ചെയ്യാന് അധികാരമില്ല, രണ്ടാമതായി താങ്കളുടെ പേരന്പ് എന്ന ചിത്രം പ്രാദേശിക പാനല് തന്നെ തള്ളിക്കളഞ്ഞ ഒന്നാണ്. അതുകൊണ്ട് തന്നെ അത് സെന്ട്രല് പാനലിന് മുന്പാകെ അത് എത്തിയില്ല…നിങ്ങളുടെ ആരാധകര് അല്ലെങ്കില് നിങ്ങളുടെ ഭക്തര് വേണ്ടാത്ത ഒരു കാര്യത്തിന് പോരാടുന്നത് അവസാനിപ്പിക്കണം.ജൂറിയെ ഒരിക്കലും ചോദ്യം ചെയ്യരുതെന്നും റൈവല്.
ഇതിന് മമ്മൂട്ടി മറുപടി അയച്ചതായും രാഹുല് റവൈല് പിന്നീട് പോസ്റ്റിലൂടെ വ്യക്തമാക്കി. ഇപ്പോള് നടക്കുന്ന സംഭവങ്ങളെക്കുറിച്ച് അറിവില്ലെന്നും ബുദ്ധിമുട്ടില് ക്ഷമ ചോദിക്കുന്നതായും മമ്മൂട്ടി പറഞ്ഞ മറുപടിയാണ് റവൈല് പോസ്റ്റ് ചെയ്തിരിക്കുന്നത്.
