കശ്മീരിന്റെ പേരില് വര്ഷങ്ങളായി ഇന്ത്യ അനുഭവിച്ചുകൊണ്ടിരുന്ന പ്രതിസന്ധികള്ക്ക് വിരാമമിടുന്ന തീരുമാനമാണ് 370, 35 എ എന്നീ വകുപ്പുകള് റദ്ദുചെയ്തതും അതുവഴി കശ്മീരിന്റെ പ്രത്യേക അവകാശാധികാരങ്ങള് എടുത്തുകളഞ്ഞതും. മതപ്രീണനത്തിനായി നെഹ്റു ഉണ്ടാക്കിയ കരാര് അതേനാണയത്തില്തന്നെ മടക്കിയത് ഭാരതത്തിന്റെ അഖണ്ഡഭാരത സ്വപ്നത്തിന് സാക്ഷാല്ക്കാരമാണ്.
ഇന്ത്യന് യൂണിയനില് നില്ക്കുമ്പോള്തന്നെ ഇന്ത്യയുടെ നിയമങ്ങള്ക്ക് യാതൊരു പരിഗണനയും നല്കാതെ ഇരട്ട പൗരത്വവും പ്രത്യേക പതാകയുമായി നിലനില്ക്കുന്നതുകൊണ്ടാണ് ഐക്യരാഷ്ട്ര സംഘടനയിലും ലോകരാജ്യങ്ങളുടെ ഇടയിലും കശ്മീരിനുവേണ്ടി വാദിക്കാന് പാക്കിസ്ഥാന് നാവുപൊങ്ങുന്നത്. മറ്റ് എല്ലാ സംസ്ഥാനത്തും ‘ലെജിസ്ലേറ്റീവ് അസംബ്ലി’ ആകുമ്പോള് കശ്മീരില് അത് കൊണ്സ്റ്റിട്യൂട്ട് അസംബ്ലി ആയി മാറി. ഇന്ത്യയുടെ നീതിന്യായ കോടതി പുറപ്പെടിവിക്കുന്ന നിയമംപോലും കശ്മീരിന് ബാധകമല്ലാതായി. അതുകൊണ്ടുതന്നെ കശ്മീരിലെ ജനങ്ങള്ക്ക് തങ്ങള് ഇന്ത്യന് പൗരന്മാരാണെന്നും ഇന്ത്യയുടെ ദേശീയതയുടെ ഭാഗമാണെന്നുമുള്ള ബോധം നഷ്ടമാകുകയും ദ്വിരാഷ്ട്രവാദത്തിന് അവരെ പ്രേരിപ്പിക്കുകയും ചെയ്തു.
സ്വാതന്ത്ര്യാനന്തരം കോണ്ഗ്രസ് ദീര്ഘവീഷണം ഇല്ലാതെ ചെയ്തുവച്ച പ്രത്യേക അവകാശനിയമം കാരണം അനേകം കശ്മീരി പണ്ഡിറ്റുകള്ക്ക് പിറന്ന നാട്ടില്നിന്ന് പലായനം ചെയ്യേണ്ടിവന്നു. 35 എ വകുപ്പ് സ്ഥിരതാമസക്കാരെ നിശ്ചയിക്കാന് നിയമസഭയ്ക്ക് അനുവാദം നല്കിയതോടെ കശ്മീര് മുസ്ലിം ഭൂരിപക്ഷ സംസ്ഥാനമായിമാറി. പാക്കിസ്ഥാനെ വെട്ടിമുറിക്കാന് കോണ്ഗ്രസ് നല്കിയ മൗനാനുവാദത്തിന്റെ ബാക്കിപത്രമായിരുന്നു കശ്മീരിന്റെ പ്രത്യേക പദവിയും. അത് ഇതോടെ ഇല്ലാതായി എന്നുമാത്രമല്ല എല്ലാ അര്ത്ഥത്തിലും കശ്മീര് അഖണ്ഡഭാരതത്തിന്റെ ഭാഗമായി മാറി.
ജന്മഭൂമി ഓണ്ലൈന്